Неущ къыщыублагъэу шышъхьэIум и 18-м нэс республи­кэм икъушъхьэлъэ чIыпIэхэм ныбжьыкIэхэм язэхахьэу «Фыщт» зыфиIорэр ащыкIощт.

Хабзэ зэрэхъугъэу, ащ хэлажьэх лъэныкъо зэфэшъхьафхэмкIэ къахэщыгъэ ныбжьыкIэхэу зэнэкъокъу зэмылIэужыгъохэм, олимпиадэхэм ащытекIуагъэ­хэр, ащыхагъэунэфыкIыгъэхэр, студент ыкIи пат­риотическэ объединениехэм чанэу ахэтхэр. Тирес­публикэ имызакъоу, нэмыкI шъолъырхэм къарыкIыщтхэри ащ къекIолIэщтых — Къэбэртэе-Бэлъкъарым, Къэрэщэе-Черкесым, Къалмыкъым, Краснодар краим, Херсон хэкум.
Къушъхьэу Фыщт ылъа­чIэ сыхьатиплI зекIонкIэ зэрэнэсыщтхэм имыза­къоу, ныбжьыкIэхэм нэмыкI Iофтхьэбзэ гъэшIэгъонхэри къяжэх — зекIоным, культурэм, спортым, тыкъэзыуцухьэрэ дунаим ахэр япхыгъэх.
ШъхьаIэу щытыщтыр Адыгеим ипащэхэм ныбжьыкIэхэр зэраIукIэщтхэр ары. Пхъэ машIом кIэ­рыс­хэу зэдэгущыIэгъур агъэ­псыныр хабзэ хъугъэ.
Адыгеим и ЛIышъхьэ игукъэкIкIэ 2017-рэ илъэсым къыщыублагъэу гъэ къэс ныбжьыкIэхэм язэ­IукIэ мыщ щашIы. Iофтхьабзэм шъолъыр зэфэшъхьафхэм къарыкIыгъэ ныб­жьыкIэхэр зэфещэх, зэрегъашIэх, Адыгеир гу­къэкIыжь дахэ афэхъу. НыбжьыкIэхэм ягукъэкIэу, къырахьыжьэрэ Iофыгъоу, зигугъу къыщашIырабэмэ тапэкIэ щыIэныгъэм чIыпIэ хэхыгъэ щагъоты, ащкIэ республикэ пащэхэр IэпыIэгъу мэхъух.