ФутболымкIэ Адыгеим ичемпионатэу Адыгэ Республикэм и ЛIышъхьэу КъумпIыл Мурат ишIухьафтын зэрылъым ия 6-рэ ешIэгъу гъэшIэгъонэу кIуагъэ.

БлэкIыгъэ зыгъэпсэфыгъо мафэхэм ешIэгъуищ щыIагъ, ахэр Мыекъуапэ, псэупIэу Красногвардейскэм ыкIи къуаджэу Пэнэжьыкъуае ащыкIуагъэх. ЗэIукIэгъухэр зэкIэ бысымхэм къахьыгъэх. Фут­болистхэу Артем Мельникрэ Роман Селютинымрэ къэлапчъэм Iэгоо плIырыплI дадзагъ.
Командэу «Кавказ Адэмый» зыфиIорэр поселкэу Тульскэр къэзыгъэлъэгъорэ «Урожаим» дешIагъ ыкIи 6:1-у текIоныгъэр къыдихыгъ. Теуцожь районым икомандэу «Чэчэнаир» «Мые­къуа­пэ» IукIагъ ыкIи 7:2-у ешIэгъур къышIуихьыгъ. Адыгэ къэралыгъо университетыр «Кощхьаблэм» нахь лъэшыгъ, пчъагъэр — 5:0.

Зэнэкъокъур аухынкIэ ешIэ­гъуи 4 къэнагъ, джырэ уахътэм пэрытныгъэр зыIыгъыр командэу «Кавказ Адэмый». ЯтIонэрэ чIыпIэм «Чэчэнаир» щыт, «АГУ-р» ящэнэр. ЗэрэхъурэмкIэ, мы командэхэр ары хагъэунэфыкIырэ чIыпIэхэм афэбэнэщтхэр.
Командэхэр зыдэщыт чIыпIэхэр ыкIи очко
пчъагъэу рагъэкъугъэр:

1. «Кавказ Адэмый» — 18.
2. «Чэчэнай» — 13.
3. «АГУ» — 12.
4. «Кощхьабл» — 5.
5. «Урожай» — 4.
6. «Мыекъуапэ» — 0.