УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын Адыгеим имуниципальнэ образованиехэм ащылъагъэкIуатэ.

Ащ пае аштэгъэ федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу Тэхъутэмыкъое районым ит поселкэу Яблоновскэм фэтэрыбэу зэхэт унэу дэтхэм ящагухэр зэтырагъэпсыхьэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, урамэу Гагариным ыцIэ зыхьырэм тет унэу N 39/2-м ищагу игъэкIэжьын аухыгъ. Ащ автомобиль ыкIи лъэсрыкIо гъогоу иIэхэм асфальтэу ателъыр зэблахъугъ, чъыгхэр къаупкIэрэпхъухьагъэх, фабэм ирыкIопIэ Iэтыгъэхэм кIэгъэ­къон пытэхэр афашIыгъэх, тIысыпIэхэр, хэкIидзапIэхэр, гыкIыгъэ пылъапIэхэр щагъэуцугъэх, чъыг ыкIи кондэ цIыкIухэр, къэгъагъэхэр щагъэтIысхьагъэх.
Щагум изэтегъэпсыхьан пстэумкIи сомэ миллиони 4,6-рэ пэIуагъэхьагъ. ПIалъэхэм адиштэу Iоф­шIэнхэр зэшIуахыгъэх.