Гъомылапхъэм цIыфым ипсауныгъэкIэ мэхьанэу иIэм, уз зэфэшъхьафхэм яIэзэгъэнымкIэ зэрэбгъэфедэмэ хъущтым ягугъу бэрэ тэшIы. ЕгъашIэм адыгэмэ яIанэ тет шъоум и Мафэ шышъхьэIум и 14-м хагъэунэфыкIы.

Ижъырэ лъэхъанхэм къащыублагъэу цIыфхэм шъоум ишIуагъэ ашIэщтыгъ. МашIом ыстыгъэхэм, уIагъэхэм, гум, нэгъум, шIум ыкIи жъэжъыехэм яIэзэгъэ­нымкIэ ар агъэфедэщтыгъ. Шъоур зыхэлъ щаир Iэзэгъоу, пчыхьэ гъолъыжьыгъом уешъоныр тэрэзэу алъытэщтыгъ.
Непэ бжьэхэм къатыхэрэр IэзэнымкIэ бэрэ агъэфедэх, ау а Iэзэгъухэр пкъышъолым зэрекIухэрэр икъоу джыри шIэныгъэлэжьхэм зэрагъэшIагъэп. Шъоур егъэлыягъэу пшхымэ, аллергие къыуитыщт.
Медицинэ шIэныгъэм зэригъэунэфыгъэмкIэ, шъоум вещество зэфэшъхьафэу 250-рэ фэдиз хэлъ, анахьэу глюкозэмрэ фруктозэмрэ. АхэмкIэ зыми ебгъэпшэн плъэкIыщтэп.
Уипсауныгъэ бгъэпытэнэу уфаемэ, зы шъоу джэмышх мафэм пшхын фаеу тинахьыжъмэ алъытэщтыгъ.
ШIэныгъэлэжьхэм зэрагъэунэфыгъэмкIэ, бжьэхэм «яIофшIэгъу уахътэ» зы бжьэ унагъом шъоу килограмми 120 — 150-рэ фэдиз ышIын елъэкIы. Зы килограмм ыгъэхьазырыным пае гурытымкIэ гъогогъуи 145-рэ нектар къыхьын фае, ащ пае километрэ пчъагъэ зэпечы.
Лъэпшъыкъо Фатим.