КIэлэцIыкIу литературэ произведениехэр зытхыхэрэм апае зэхащэрэ Дунэе зэнэкъокъоу Жэнэ Къырымызэ ыцIэ зыхьырэм хэлажьэ зышIоигъохэм джыри уахътэ яI. ШышъхьэIум и 31-м тхыгъэхэм ыкIи сурэт шIыгъэхэм яштэн аухыщт.

Хабзэ зэрэхъугъэу, зэнэкъокъур лъэ­ныкъуитIоу гощыгъэу кIощт: прозэмрэ поэзиемрэ ыкIи иллюстрациер. АдыгабзэкIэ, къэбэртэябзэкIэ ыкIи урысыбзэкIэ тхыгъэхэр зэнэкъокъум аштэщтых, джащ фэдэу кIэлэцIыкIухэм апае сурэт шIыгъэхэр къырахьылIэнхэ алъэкIыщт. Илъэс 18 зыныбжьыхэм къащегъэжьагъэу зэнэкъокъум хэлэжьэнхэ алъэ­кIыщт.
«СшIэнэу сыфай» — ары зэнэкъо­къум мы илъэсым шъхьэу фашIыгъэр ыкIи илъэсищым къыщегъэжьагъэу илъэс 12-м нэс зыныбжьыхэм апае тхыгъэхэр, сурэтхэр къырахьылIэнхэр ары зэрагъэ­нэфагъэр.
Адыгеим щыпсэурэ цIыф цIэрыIохэм афэгъэхьыгъэу, адыгэхэм ятарихъ ыкIи этнографие япхыгъэу, адыгэ хабзэр къыраIотыкIэу, Хэгъэгу зэошхом илIы­хъужъ­хэм, зэо-зэпэуцужь зэфэшъхьаф­хэм къатегущыIэхэу тхыгъэхэр къагъэ­хьазырынхэ фае. Джащ фэдэу тыкъэзыуцухьэрэ дунаим идэхагъэ, чIыопсым, къэкIыхэрэм, шIэныгъэ зэфэшъхьафхэм, техникэм афэгъэхьыгъэу къатхыми хъущт. Сабыйхэм ашIогъэшIэгъонынэу IофшIэнхэр гъэпсыгъэнхэ, художественнэ нэшанэ хэлъэу, купкI иIэу, зэгъэфагъэу тхыгъэн­хэ фае. IофшIэныр ыпэкIэ къыхамыутыгъэхэу ыкIи Интернетым къимыхьагъэхэу щытынхэр шапхъэхэм къыдалъытэ.
ТекIоныгъэ ыкIи хагъэунэфыкIырэ чIыпIэ къыдэзыхыгъэхэм ахъщэ шIухьафтынхэр аратыщтых. «Прозэр ыкIи поэзиер» зыфиIорэ лъэныкъомкIэ текIоныгъэ къыдэзыхыгъэхэм атхыгъэхэр тхы­лъэу къыдагъэкIыщтых, текIоныгъэ къы­­дэзыхыгъэ сурэтхэр ахэм апалъхьажьыщтых. Джащ фэдэу хэушъхьафыкIыгъэ шIухьафтынхэри аратыщтых.
Зэнэкъокъум хэлажьэ зышIоигъохэм ятхьапэхэр мэкъуогъум и 1-м къыщегъэ­жьагъэу шышъхьэIум и 31-м нэс зэнэ­къокъум исайт рагъэхьан фае. ТекIоныгъэ къыдэзыхыгъэхэр шэкIогъум и 15-м къэнэфэщтых.

Жэнэ Къырымызэ ыцIэкIэ рагъэкIокIырэ Дунэе литературэ зэнэкъокъур 2022-рэ илъэсым къыщегъэжьагъэу зэхащэ. Адыгэ къэралыгъо университетыр кIэщакIо ащ фэхъугъ. Сэнаущыгъэ зыхэлъэу тхэхэрэр къыхэгъэщыгъэнхэр, кIэ­лэцIыкIухэм апае къыдэкIырэ тхылъхэр нахьыбэ шIыгъэнхэр, лъэпкъ культурэм хэхъоныгъэ егъэшIыгъэныр ары зэхэщакIохэм пшъэрылъ шъхьаIэу зыфагъэуцужьырэр.
ТхакIохэр, сурэтышIхэр, шIэныгъэлэжьхэр жюрим хэтых. Анахь шъхьаIэу ахэтыр театральнэ продюсерэу, шъо­лъыр гъэсэныгъэ гупчэу «Полярис-Адыгея» зыфиIорэм исовет хэтэу Куращынэ Лейл ары. Мы зэнэкъокъум изэхэщэн ащ игукъэкI. Адыгэ къэралыгъо университетым искусствэмкIэ и Институт ыкIи дизайнымкIэ Британскэ апшъэрэ еджапIэр къэзыухыгъэ сурэтышI ныбжьыкIэу ТIэшъу Мэзагъо исурэтэу «Мэзгуащ» зыфиIорэр зэнэкъокъум итамыгъэ хъугъэ.
2022-рэ илъэсым зэнэкъокъум Iоф­шIэн 623-рэ къырахьылIэгъагъ. Дунаим ихэгъэгуи 5-мэ ыкIи Урысыем ишъо­лъыр 35-мэ ащыпсэухэу тхэныр ыкIи сурэтшIыныр зикIасэхэр хэлэжьэгъагъэх. «ЦIыкIужъый» зыфиIорэ цIэр иIагъ, илъэсищым къыщегъэжьагъэу тфым нэс зыныбжьыхэм апае агъэхьазырыгъэхэр ары къырахьылIэгъагъэхэр. Зэнэкъо­къум текIоныгъэ къыщыдэзыхыгъэхэм яIоф­шIэнхэр къызыдэхьэгъэ тхылъи 6 къы­дагъэкIыгъ.
2023-рэ илъэсым «СиеджакIу» зыфиIорэр цIэу иIагъ ыкIи илъэси 7-м къыщегъэжьагъэу 9-м нэс зыныбжьыхэм апае тхыгъэхэр ыкIи сурэтхэр къырахьылIэгъагъэх. Нэбгырэ 51-мэ яIоф­шIэни 125-рэ, Урысыем ишъолъыри 10-мэ ялIыкIохэр хэлэжьэгъагъэх.
Сурэтхэр: Адыгэ къэралыгъо университетым ипресс-къулыкъу.