Информационнэ технологиехэмкIэ, механикэмкIэ ыкIи оптикэмкIэ Санкт-Петербург дэт университетым инфохимиемкIэ ишIэныгъэ-гъэсэныгъэ гупчэ ипащэу Екатерина Скорб мы мафэхэм Адыгэ къэралыгъо университетым иректорэу Мамый Даутэ ыкIи апшъэрэ еджапIэм ипрофессорхэм, кIэлэегъаджэхэм аIукIагъ.

Химическэ инжинирингым епхыгъэу апшъэрэ еджэпIитIумэ язэдэлэжьэныгъэ шIуагъэу къы­хьын ылъэкIыщтым ыкIи инфохимиемкIэ гъэсэныгъэ программэм изэхэгъэуцон ахэр атегущыIагъэх.
IофшIэгъу зэIукIэгъум къыдыхэлъытагъэу Екатерина Скорб апшъэрэ еджапIэм илабораториехэр къыкIухьагъэх. Химиемрэ биологиемрэ зикIэсэ кIэлэеджа­кIохэр къызэкIолIэрэ гъэмэфэ лагерэу Адыгэ къэралыгъо университетым илъэс къэс зэхищэрэм нэужым ар щыIагъ. Мы предметхэмкIэ сэнаущыгъэ зыхэлъ кIэлэеджа­кIохэу шъолъыр зэфэшъхьаф­хэм къарыкIыхэрэр мыщ щызэIокIэх. Студентхэми гущыIэгъу ар афэ­хъугъ, иIофшIэн зэрэзэхищэрэр къафиIотагъ.
Профессорэу Екатерина Скорб нэужым апшъэрэ еджапIэм иIофышIэхэм къафиIотагъ ежь зыщылэжьэрэ университетым гъэхъагъэу иIэхэр. ШIэныгъэ-гъэсэныгъэ корпорацием епхыгъэу ап­шъэрэ еджапIэм хэхъоныгъэхэр ышIынхэм, ушэтынхэр зыгъэцэкIэщтхэ купхэм язэхэщэн афэгъэхьыгъэ Iофыгъохэм, химие инжинирингым епхыгъэ лъэныкъохэм игъэкIотыгъэу атегущыIагъэх.

Адыгэ къэралыгъо
университетым
ипресс-къулыкъу.