Мыекъуапэ искусствэхэмкIэ икIэлэцIыкIу еджапIэхэу n 1-м ыкIи n 6-м ямышIыкIэ гъэпсыкIэхэмкIэ ЕджапIэхэр илъэскIэ узэкIэIэбэжьмэ къащызэIуа­хыгъэх.

Мыхэм творчествэм илъэныкъо зэфэшъхьафхэм кIэлэцIыкIухэм защаушэтын алъэкIы: макъэмкIэ режиссурэм, сурэт ыкIи видео техынымкIэ, анимациемрэ 3D-графикэмрэкIэ, электрон мэкъа­мэмкIэ, дизайнымкIэ ыкIи театрэ технологиехэмкIэ.

Федеральнэ проектэу «Урысыем къы­щаугупшысыгъ» ыкIи лъэпкъ проектэу «Культурэм» къадыхэлъытагъэу унэ кIоцI­хэр агъэкIэжьыгъэх, сурэт, видео техынымкIэ, макъэм, нэфынэм Iоф зэрадэ­пшIэщтымкIэ, виртуальнэ зэхэгъэуцоным­кIэ лъэхъанэм диштэрэ Iэмэ-псымэхэр — зэпстэоу кIэлэцIыкIухэм зыфэдэ къэ­мыхъугъэ япроект гъэшIэгъонхэм адэлэ­жьэшъунхэмкIэ ящыкIэгъэщтхэр ащэфыгъэх. Сэнэхьат зэфэшъхьафхэр зыIэ илъ егъэджакIохэри къыращэлIа­гъэх — яIоф­шIэкIэ амалхэмкIэ еджакIохэм адэгуащэх актерхэмрэ музыкантхэмрэ, режиссер­хэмрэ мэкъамэр зыгъэуцухэрэмрэ, телеоператорхэмрэ сурэттеххэмрэ.

ИскусствэхэмкIэ кIэлэцIыкIу еджапIэу n 1-м зэрэщыIагъэр исоциальнэ хъытыухэм къащиIотагъ Адыгеим и ЛIышъхьэ. Джырэ уахътэм еджэгъу илъэсыкIэм зыфэзыгъэхьазырырэ кIэлэегъаджэхэм-
рэ ахэм агъасэхэрэмрэ зэраIукIагъэр ащ къытхыгъ.
«Мы еджапIэхэр ящыкIэгъэ шъыпкъэу зэрэщытхэр къэлъэгъогъах. Апэрэ илъэсым мыщ щеджэхэрэм язакъоуи, зэхэтхэуи япроектхэр щыпхыращынхэу рагъэжьагъ, ащыщхэр игъо ифагъэх лъэныкъо зэфэшъхьафхэмкIэ щы­Iэгъэ зэнэкъокъухэм ахэлэжьэнхэу ыкIи хагъэунэфыкIырэ чIыпIэхэр къы­дахынхэу.

Культурэм ихэхъоныгъэ — къэ­ралыгъом анахьэу ынаIэ зытыригъэтыхэрэм ащыщ. ЗэкIэми апэ идгъэ­шъырэр кIэлэцIыкIухэр ары, ахэр зыщыщ культурэр, джащ фэдэу тикъэралыгъошхо щыпсэурэ цIыф лъэпкъыбэхэм якультурэ шIу алъэгъуным, алъы­тэным фэтэгъасэх. Федеральнэ пащэхэм яIэпыIэгъу ишIуагъэкIэ пшъэрылъ инэу творческэ хэхъоныгъэр зэфэдэу республикэм щагъотын алъэкIыныр пхырытэщы. Аужырэ илъэс заулэм искусствэхэмкIэ кIэлэцIыкIу еджэпIи 10 лъэхъанэм диштэу зэтедгъэпсыхьагъ», — къытхыгъ КъумпIыл Мурат.