Мыекъопэ къэлэ сымэ­джэ­щым иврачэу Валерий Ковалевым медицинэ оборудованиякIэ къыугупшысыгъ ыкIи ащкIэ патент къыратыгъ. Ащ ишIуагъэкIэ, гу-лъынтфэ узхэм яIэзэгъэнымкIэ амалыкIэ щыIэ хъугъэ.

Адыгэ Республикэм псауныгъэр къэухъумэгъэнымкIэ и Ми­нистерствэ макъэ къызэригъэIугъэмкIэ, Валерий Ковалевым къыугупшысыгъэ велотренажерэу датчикхэр зыхэтхэм ишIуагъэкIэ гу-лъынтфэ зэхэтым физическэ хьылъэу зэрар ащ езымыхыщтыр зыфэдизыр къы­хэпхын плъэкIыщт. Датчикхэм къагъэлъагъо цIыфыр зыщырэхьат уахътэм къыщыублагъэу тренажерым къызехыжьэу, зы­зигъэпсэфырэм нэс гур къызэ­рэтеорэр зыфэдизыр.
Нэужым компьютерым къеты цIыфым физическэ хьылъэу ратыгъэм елъытыгъэу гу лыпцэ­хэм Iоф зэрашIагъэм играфик. Ащ ишIуагъэкIэ нэбгырэ пэпчъ къыфэплъытэщт физическэ хьылъэу гум «теплъхьэмэ» хъу­щтыр.
Мы оборудованиер нэбгыри 100 фэдизмэ къызфагъэфедагъ. Валерий Ковалевым къызэрэхигъэщырэмкIэ, нэбгырэ пэпчъ ипсауныгъэ изытет зэхъокIыныгъэу фэхъурэм лъыплъэн ылъэ­кIыщт. ГущыIэм пае, мы оборудованиемкIэ гум физическэ хьылъэу ыщэчын ылъэкIыщтыр зыууплъэкIурэм ыуж илъэс ­зытешIэкIэ, зэхъокIыныгъэ ащ фэ­хъугъэ-фэмыхъугъэр, нахь дэгъу е нахь дэй хъугъэмэ зэ­бгъэшIэшъущт.

Валерий Ковалевыр апшъэрэ категорие зиIэ врач, Урысыем медикэ-техническэ шIэ­ны­гъэхэмкIэ и Академие ичлен-­корреспондент, Мыекъопэ медицинэ колледжым илъэс пчъа­гъэрэ ипэщагъ. Ащ орденэу «Хэгъэгум ыпашъхьэ гъэхъа­гъэу щыриIэхэм апай» зыфиIорэм имедалэу я II-рэ шъуашэ зиIэр къыфагъэшъошагъ. Мыщ ыпэкIи В. Ковалевым къыугупшысыгъ ыкIи патент къыдихыгъ оборудованиер цIыф псаум ыкIи сымаджэм, спортсменхэм агу­хэм физическэ хьылъэу ащэчыщтыр къэлъытэгъэным фыте­гъэпсыхьагъэр.