КъыткIэхъухьэрэ лIэужхэм языгъэпсэфыгъо уахътэ гъэшIэгъонэу, шIуагъэ къытэу зэхэщэгъэным сыдигъокIи Адыгеим мэхьанэшхо щыраты.

АР-м гъэсэныгъэмрэ шIэ­ныгъэмрэкIэ и Министерствэ къы­зэрэщаIуагъэмкIэ, 2024-рэ илъэсым кIэлэцIыкIухэм язы­гъэпсэфын изэхэщэн органи­зацие 95-рэ къыхагъэлажьэ. Ахэм ащыщых къалэм дэдзыгъэ лагеритIоу «Лань» ыкIи «Горная легенда», хы ШIуцIэ Iушъом щыIэ лагерэу «Морская волна» зыфиIохэрэр ыкIи кIэлэ­цIыкIухэр мафэрэ зыдэщыIэ­хэрэ лагерь 92-рэр. Ахэм Iоф ащы­зышIэщт вожатэ 200-мэ ыкIи кIэлэегъэджи 100-мэ хэушъхьафыкIыгъэ егъэджэнхэр афызэхащагъэх.
Зэхэубытагъэу къэпIон хъумэ, гъэмафэм республикэм икIэлэцIыкIу мини 8,6-м ехъумэ загъэпсэфын ыкIи япсауныгъэ агъэпытэн алъэкIыщт. Ахэм ащыщэу нэбгырэ 500-р Херсон хэкум къикIыгъэх. Мы ма­фэм ехъулIэу Геническэ районым щыщ нэбгырэ 344-мэ ыкIи Адыгеим икIэлэцIыкIу 721-мэ лагерэу «Лань» зыщагъэпсэфы. Адыгэ къэралыгъо универси­тетым епхыгъэ егъэджэн-Iоф­шIэн базэу «Горная легенда» зыфиIорэм кIэлэцIыкIуи 195-мэ зыщагъэпсэфыгъ.
Щынэгъончъэу кIэлэцIыкIухэм языгъэпсэфыгъо уахътэ респуб­ликэм щагъэкIоным пае Рос­потребнадзорым, ошIэ-дэмышIэ IофхэмкIэ Министерствэм, АР-м хэгъэгу кIоцI IофхэмкIэ и Министерствэ ыкIи Росгвардием игъэIорышIапIэу Адыгеим щыIэр гъэлъэшыгъэ шIыкIэм тетэу лагерьхэм алъэплъэх.

Путевкэхэр анахьэу зэраты­хэрэр хэушъхьафыкIыгъэ дзэ операцием хэлажьэхэрэм яуна­гъохэм арыс кIэлэцIыкIухэр, са­быибэ зэрысхэм ыкIи щыIэныгъэм чIыпIэ къин ригъэуцогъэ унагъохэм якIэлэцIыкIухэр ары. Дэеу зэхэзыхырэ ыкIи икъоу зымылъэгъурэ кIэлэцIыкIухэм яреспубликэ еджэпIэ-­интернат тегъэпсыхьагъэу мэкъуогъум «Содружество орлят» зыфиIорэм ублэпIэ еджапIэм чIэсхэм апае сменэ щызэхащагъ.
Ащ нэмыкIэу мы илъэсыр къызихьагъэм щыублагъэу Урысые гупчэхэу «Артек», «Смена», «Орленок» зыфиIохэрэм рес­публикэм икIэлэцIыкIуи 164-мэ защагъэпсэфыгъ, илъэсым ыкIэм нэс джыри нэбгырэ 92-рэ агъэ­кIонхэу агъэнафэ.

КIэлэцIыкIухэм
язэныбджэгъуныгъэ щэпытэ
Мыекъопэ районым ит псэу­пIэу Каменномостскэм дэт зыгъэпсэфыпIэу «Лань» зыфиIорэм тыщыIагъ, кIэлэцIыкIу­хэм языгъэпсэфыгъо уахътэ зэ­рагъакIорэр, ахэм ящынэ­гъон­чъагъэ зэрэзэхэщагъэр зэд­гъэ­лъэгъугъ.
Лагерыр зэрэзэтегъэпсыхьагъэм, кIэлэцIыкIухэм зэрифэшъуашэу загъэпсэфынымкIэ ащ амалэу IэкIэлъхэм осэшIу фэ­пшIы­нэу щыт. КIэлэпIухэм, кIэлэцIыкIухэм гущыIэгъу тафэ­хъугъ, языгъэпсэфыгъо зэрэзэхэщагъэм егъэразэхэмэ тыкIэупчIагъ.
КIэлэцIыкIу зыгъэпсэфыпIэм ипащэу Роберт Мардыросьян къызэрэтфиIотагъэмкIэ, мы илъэсымкIэ аужырэ я 4-рэ потокыр макIо, шышъхьэIум и 5-м къыщегъэжьагъэу и 25-м нэс ар рекIокIыщт. Мы илъэсымкIэ ятIонэрэу Херсон хэкум и Геническэ район къикIыгъэ кIэлэцIыкIухэм лагерым зы-
щагъэпсэфы. Мы уахътэм
ахэм япчъагъэ нэбгырэ 357-рэ мэхъу. Ахэм анэмыкIэу Адыгеим ичIыпIэ зэфэшъхьаф­хэм къарыкIыгъэхэми мыщ зыща­гъэпсэфы.

Лагерым ипащэ къызэриIуа­гъэмкIэ, кIэлэцIыкIухэм язы­гъэпсэфыгъо лъэхъан гъэшIэ­гъонэу, шIуагъэ къытэу зэрэ­кIощтым зэхэщакIохэр пылых. Вожатэу мыщ Iоф щызышIэхэрэр Адыгэ къэралыгъо университетым истудентых, ахэр рагъэджагъэх, тренинг зэфэшъхьафхэр арагъэкIугъэх, кIэлэцIы­кIухэм языгъэпсэфыгъо уахъ­тэ щынэгъончъэу зэрагъэкIощтым хэшIыкI фыряI.
НыбжьыкIэхэр дэгъоу зэгурыIуагъэх, Iофтхьэбзэ зэфэ­шъхьафхэу афызэхащэхэрэм ча­нэу хэлажьэх. Анахьэу пчы­хьэм афызэхащэрэ къэшъонхэм ахэр нахь благъэ зэфешIых.
Лагерьхэм ащыIэ кIэлэцIыкIухэм экскурсиехэр, зекIо зэ­фэ­шъхьафхэр, псауныгъэм, спор­тым, творчествэм атегъэ­псыхьэгъэ Iофтхьабзэхэр зэрафызэхащэхэрэр ягуапэу къаIотагъ. НыбжьыкIэхэм орэдхэр къаIох, къэшъох, зэрэгъэчэфых. Лагерым щыIэ кIэлэ­цIыкIоу гущыIэгъу тызфэхъу­гъэхэм зэкIэми зэдырагъаштэу мыр агу зэрэрихьырэр къаIуагъ, къэкIорэ илъэсми къэкIонхэу зэрэфаехэри къыхагъэщыгъ.

Языгъэпсэфыгъо уахътэ зэ­рэзэхащэрэм тыкIэупчIагъ. Зе­кIо, Iофтхьэбзэ гъэшIэгъонхэр, адыгэ къашъомкIэ мастер-классхэр зэрафызэхащэхэрэр кIэлэ­цIыкIухэм ягуапэу къаIотагъ. Спортым пылъхэм футболымкIэ ыкIи боксымкIэ тренировкэхэр Мыекъуапэ испорт еджапIэхэм ащарагъэхьых.
— Щынэгъончъэу ыкIи культурэ программэхэмкIэ гъэшIэгъонэу кIэлэцIыкIухэм языгъэ­псэфыгъо уахътэ республикэм щагъэкIоным пае тфэлъэкIыщтыр зэкIэ тэшIэ, — къыIуагъ Роберт Мардыросьян. — Ны-тыхэм яцыхьэ телъын фае якIэ­лэцIыкIухэм дэгъоу лагерым зызэращагъэпсэфыщтым, япсау­ныгъэ зэрэщагъэпытэщтым. Ащ­кIэ зиIоф хэшIыкIышхо фызиIэ вожатэхэр, кIэлэегъаджэхэр ти­Iэх. Гъэмэфэ зыгъэпсэфыгъо лъэхъаным кIэлэцIыкIу­хэм на­хьыбэу гухахъо агъотын, алъэгъу­гъэр шIукIэ агу къинэ­жьын фае.
Джащ фэдэу джэгукIэхэр агъэфедэзэ, кIэлэцIыкIухэм ама­лэу яIэхэм зыкъызэIуягъэхы­гъэным мэхьанэшхо зэриIэр лагерым ипащэ къыхигъэщыгъ. Щынэгъончъэным лъэшэу анаIэ тет. Художественнэ, техническэ ыкIи социальнэ творчествэм ылъэныкъокIэ зыныбжь имыкъу­гъэхэм Iоф адашIэ.
КIэлэцIыкIухэри, нахьыжъ­хэри лагерым щыIэкIэ амалэу щы­ря­Iэм егъэразэх, агу рехьы, зы­пкъ итэу Iоф ешIэ. Ащ фытегъэ­псыхьэгъэ программэ иI. Iоф­тхьабзэхэм язэхэщэн тишъо­лъыр культурэмкIэ и Минис­терствэ, Адыгеим физическэ культурэмкIэ ыкIи спортымкIэ и Комитет, АР-м гъэсэныгъэмкIэ ыкIи шIэныгъэмкIэ и Минис­терствэ къыхагъэлажьэх. Джащ фэдэу муниципальнэ ыкIи рес­публикэ творческэ купхэр къы­рагъэблагъэх.
КъэIогъэн фае республикэм итворческэ коллективхэм ахэт­хэр мафэ къэс лагерьхэм зэ­рэкIохэрэр, концертхэр къызэратыхэрэр, мастер-классхэр зэ­рэзэхащэхэрэр, кIэлэцIыкIу­хэр народнэ творчествэм, лъэпкъ хабзэхэм нэIуасэ зэрафашIы­хэрэр.
КIэлэцIыкIухэр мафэм тфэгъо­гогъо зэфэшъхьафэу агъашхэх. Чэщ-зымафэм къыкIоцI мед­сестра нэбгыритIумэ зэблэкIэу Iоф ашIэ.
КIАРЭ Фатим.
Сурэтхэр: Iэшъынэ Аслъан.