Къэралыгъо программэу «Культурэм ихэхъоныгъ» зыфиIорэм игъэцэкIэн къыды­хэлъытагъэу Адыгэ Республикэм искусствэхэмкIэ икIэлэцIыкIу еджапIэхэм IэпыIэгъур арагъэгъоты. Шэуджэн районым ит къуаджэу Хьакурынэхьаблэ искусствэхэмкIэ кIэлэцIыкIу еджапIэу дэтым ар ищыкIэгъэ дэд. Ар илъэс 55-рэ хъугъэу мэлажьэ. ЕджапIэм ипащэу Бгъошэ Сулиет зыIудгъэкIагъ, игъэкIотыгъэ гъэцэкIэжьынхэу еджапIэм ищыкIагъэхэр ыкIи ащ щеджэхэрэм ягъэхъагъэхэр къытфиIотагъ.

Пащэм къызэриIуагъэмкIэ, мы еджапIэм чIэсхэр музыкальнэ Iэмэ-псымэхэм къарагъэIошъунхэм, сурэт ашIыным, орэд къаIоным афагъасэх, театральнэ искусствэм ыкIи нэмыкIхэм нэIуасэ афашIых. КIэлэеджакIохэр творческэ зэнэкъо­къухэм, Iофтхьэбзэ зэфэшъхьафхэм ча­нэу ахэлажьэх. Агу рихьэу, фэчэфхэу кIэлэцIыкIухэр еджапIэм къекIуалIэх.
Илъэс зэкIэлъыкIохэм мыщ зыщызыгъэсэрэ ныбжьыкIэхэм гъэхъэгъэшIу­хэр ашIыгъэх. Зэнэкъокъу зэфэ­шъхьаф­хэм текIоныгъэ къащыдахыгъ, федеральнэ уцугъохэм пчъагъэрэ анэсыгъэх.
— Районым ис кIэлэцIыкIухэм ясэнаущыгъэ хэгъэхъогъэныр пшъэрылъ шъхьаIэу зыфэдгъэуцужьыхэрэм ащыщ. ГъэцэкIэжьынхэм ауж тиеджапIэ чIэсхэм япчъагъэ нахьыбэ хъунэу сыщэгугъы. Тэ тиIоф­шIэн ыпэкIэ лъыдгъэкIотэщт, тигъэхъагъэхэм ахэдгъэ­хъощт, — еIо Бгъошэ Сулиет.
ЕджапIэм кIэлэегъэджэ 11 Iут, шъхьадж ипшъэрылъ зэрифэшъуашэу егъэцакIэ. Гъэсэныгъэ тедзэм ипрограммэ къыдыхэлъытагъэу егъэджэнхэр зэхащэх, ны-тыхэм яшIоигъоныгъэхэр къыдалъытэзэ кIэлэеджакIохэр агъасэх. Непэрэ мафэм ехъулIэу бюджетым къытIупщырэ мылъкумкIэ нэбгыри 133-рэ рагъаджэ.

Орэдыр зикIасэу, апшъэрэ категорие зиIэ кIэлэегъаджэу Хъымыщэкъо Эммэ илъэсыбэ хъугъэу мыщ щэлажьэ. Ащ орэдкъэIоным ныбжьыкIэхэр фегъасэх. 2017-рэ илъэсым республикэ зэнэкъо­къоу «Кiэлэегъэджэ анахь дэгъу» зыфиIорэм илауреат хъугъэ. БэмышIэу Эммэрэ икIэлэеджакIоу Хъуажъ Самирэрэ «Белый пароход» зыфиIорэ проектэу Москва щырекIокIыгъэм текIоныгъэ къыщыдахыгъ. ЕджапIэм ыцIэ дахэкIэ Урысыем щагъэIугъ, Адыгеир зэрифэшъуашэу къагъэлъэгъуагъ.
Апшъэрэ категорие зиIэ Мырзэ Асиет илъэс 20 хъугъэу еджапIэм ипащэ игуа­дзэу мэлажьэ. ОрэдыIо купэу «Гумнэс» зыфиIорэр игъусэу лIэужхэр орэдкъэIоным фегъасэх. 2021-рэ илъэсым респуб­ликэ зэнэкъокъоу «КIэлэегъэджэ анахь дэгъу» зыфиIорэм илауреат хъугъэ.
ЕджапIэм зэнэкъокъу зэфэшъхьафхэм текIоныгъэу къащыдихыгъэр къэпчъы­гъуай, ащ ишыхьатэу узычIахьэкIэ щытхъу тхылъхэмкIэ дэпкъыр гъэпкIагъэ.
— ТишIэныгъэхэм ахэдгъэхъоным, нэмыкI еджапIэхэм яIоф­шIэн зэрэзэхащэрэр зэдгъэлъэ­гъуным, ащ фытегъэпсыхьэгъэ Iофтхьабзэхэм тахэлэжьэным мэхьанэшхо иI, — еIо Мырзэ Асиет. — КIэлэцIыкIухэм Iоф адэсшIэныр сикIас, ахэм сэнаущыгъэ зыхэлъхэр къахэкIых. Арышъ, къыткIэхъухьэрэ лIэужхэм яIэпэIэсэныгъэ нахь зедгъэушъомбгъуныр ары типшъэрылъыр. ЕджапIэм къэкIорэ кIэлэцIыкIухэм Iоф адэпшIэныр нахь гъэшIэгъонэу сэлъытэ. Ахэр тхьэпэ фыжь нэкIэу сурэтышIым IэкIэхьа­гъэм есэгъапшэх. УкIэлэ­егъэджэ Iазэмэ, сурэт зэмы­шъогъу дахэу щыIэр тхьапэм ебгъэкIущт. Джыри тиIоф­шIэн лъыдгъэкIотэщт, ти­гъэхъагъэхэм ахэдгъэхъощт, ащкIэ амалышIухэр тиIэх.

Зигугъу дахэкIэ рязыгъаIохэрэ Набэкъо Зитэ, Дзыбэ Саидэ ыкIи Хьамырзэкъо Гитэ фортепианэмкIэ кIэлэегъа­джэх. ЛъэпцIэрыкъо Мариет, Тюльпэрэ Нуриет, Тутарыщ Заурбый лъэпкъ музыкальнэ Iэмэ-псымэхэм ныбжьыкIэхэр фагъасэх. Осмэн Айдэмыррэ Жарэкъо Аидэрэ адыгэ къашъохэмкIэ кIэлэегъа­джэх. Аидэ ыгъасэхэрэм лъэпкъ къа­шъом­кIэ гъэхъагъэхэр ашIы.
ЕджапIэм къычIэкIыгъэхэм янахьыбэр искусствэхэмкIэ колледжэу Тхьабысымэ Умар ыцIэ зыхьырэм щеджэнхэу чIэхьэх. Хьатыгъужъыкъуае щыщэу Шырынэ Альбинэ (вокал) диплом плъыжькIэ колледжыр къыухыгъ. Сапый Рузанэрэ (фортепиано) Датхъужъ Ислъамрэ (вокал) дэгъоу колледжым щеджэх. НыбжьыкIэхэм ягъэхъагъэхэм еджапIэр арэгушхо, алъэплъэ. А зэпстэур зишIушIагъэр кIэлэегъэджэ IэпэIасэхэр ары.
Лъэпшъыкъо Фатим.
Сурэтхэр: еджапIэм ихъарзынэщ, Iэшъынэ Аслъан.