ФутболымкIэ Урысыем изэнэкъокъу иятIонэрэ лигэ щешIэрэ «Зэкъошныгъэм» станицэу Павловскаям щыриIэ зичэзыу ешIэгъум текIоныгъэр къыщыдихыгъ.

«Кубань Холдинг» — «Зэ­къош­ныгъ» — 1:2 (1:0).
«Кубань Холдингым» щешIагъэх: А. Стенякиныр, А. Дашаевыр, Р. Гараевыр, Р. Бабаян, А. Ревазовыр (Д. Чигиревыр), Р. Трефиловыр (С. Копыловыр), Е. Цимбал, А. Колтаковыр (А. Гуровыр), С. Багиевыр, И. Сапожниковыр (Н. Фадеевыр), А. Малолетовыр (Р. Веселовскэр).
Тренер шъхьаIэр: Д. Фомин.
«Зэкъошныгъэм» хэтыгъэх: Т. Хачировыр, Д. Савиных (С. Новиковыр), И. Абдуллаевыр, М. Ягьяевыр, И. Оразаевыр, К. Юшко, Ш. Гайдаровыр (А. Зезэрахь), З. Коблыр (А. Хьасанэкъор), Д. Антоненкэр (У. Ма­гомедбековыр), Н. Сергеевыр (М. Къэбжьыр), А. Делэ­къор.
Тренер шъхьаIэр: С. Мирошниченкэр.
ЕшIэгъум нэбгырэ 300 еп­лъыгъ. Бысымхэр апэрэ таймым нахь лъэшыгъэх, бэрэ ыпэкIэ илъыщтыгъэх. Ащ ишIуагъэкIэ я 24-рэ такъикъым пчъагъэр къызэIуа­хыгъ, къэлапчъэм Iэгуаор дэзыдзагъэр Андрей Малолетовыр ары. Мыщ дэжьым Тамерлан Хачировым хэукъоныгъэ ышIыгъ. Ау нэужым ар цыхьэшIэгъоу ешIагъ. Апэрэ едзыгъор 1:0-у командэхэм аухыгъ.
ЯтIонэрэ таймым Сергей Мирошниченкэм зэхъокIыныгъэхэр ышIыгъэх, ешIапIэм къихьагъэх Зезэрэхьэ Артуррэ Сергей Новиковымрэ. Мыхэм яшIуагъэкIэ хьакIэхэм яешIакIэ нахь рагъэ­хъугъ. А. Зезэрахьэр ешIапIэм къызихьагъэм ыуж такъикъитIу тешIагъэу пчъагъэр зэфэдиз ышIыгъ. Нэужым Никита Сергеевым къэлапчъэм Iэгуаор ди­дзагъ, пчъагъэр 1:2 хъугъэ. Къэнэгъэ уахътэм бысымхэр нахь псынкIэу ешIагъэх, пчъагъэр зэфэдиз ашIыным фэбэнагъэх. Ау Тамерлан Хачировыр мыщ дэжьым дэгъоу ешIагъ. Я 79-рэ такъикъым «Кубань Холдингым» метрэ 11 хъурэ тазырыр ыгъэцэкIагъ, ау Садыг Багиевыр къэлапчъэм блэугъ. «Зэкъошныгъэм» текIоныгъэр къыдихыгъ.
— Тифутболистхэм ащыщхэр бэшIагъэу ешIагъэхэп, шъобжэу атещагъэхэм къахэкIэу тренировкэхэм афежьэгъэхэ къодый. Зэ­IукIэгъур къиныгъ, ау пстэуми анахь шъхьаIэр очкоуи 3 къызэ­рэтхьыгъэр ары. ЫпэкIэ тылъэкIуа­тэ, — къы­Iуагъ зэфэхьысыжьхэр къышIызэ «Зэкъошныгъэм» итренер шъхьаIэу Сергей Мирошниченкэм.
Я 20-рэ турым изэфэхьысыжьхэр:
«Динамо-2» — «Рубин Ялта» — 1:2, «Победа» — «Легион» — 0:2, «Форте» — «Строитель» — 0:0, «Астрахань» — «Ангушт» — 0:1, «Кубань Холдинг» — «Зэкъошныгъ» — 1:2, «Нарт» — «Динамо Ставрополь» — 1:2, «Ростов-2» — «Алания-2» — 1:0, «Севастополь» — «Спартак-Налщык» — 3:0.
Командэхэр зыдэщыт чIыпIэхэр ыкIи очко пчъагъэу ра­гъэ­къугъэр:

1. «Форте» — 37.
2. «Ростов-2» — 36.
3. «Легион» — 36.
4. «Динамо Ставрополь» — 36.
5. «Астрахань» — 33.
6. «Рубин Ялта» — 30.
7. «Севастополь» — 29.
8. «Строитель» — 27.
9. «Ангушт» — 27.
10. «Нарт» — 23.
11. «Спартак-Налщык» — 23.
12. «Биолог-Новокубанск» — 22.
13. «Зэкъошныгъ» — 20.
14. «Кубань Холдинг» — 20.
15. «Победа» — 16.
16. «Алания-2» — 12.
17. «Динамо-2» — 9.
    КъыкIэлъыкIощт зэIукIэгъур «Зэкъошныгъэм» непэ Мыекъуапэ щыриIэщт, командэу «Форте» тихьакIэщт. ЕшIэгъур мафэм сыхьатыр 5-м рагъэжьэщт.