Ящэнэрэу республикэм ипцэжъыеешэхэр къэралыгъомкIэ анахь лъэшых. ШышъхьэIум и 6-м щегъэжьагъэу и 9-м нэс Ленинградскэ хэкум ит псыубытыпIэу «Борисов пруд» зыфиIорэм пцэжъыеешэнымкIэ Урысыем ичемпионат щыкIуагъ. Адыгеир къэзыгъэлъэгъуагъэхэр: Руслан Брызгуновымрэ Александр Гол­добинымрэ, Сергей ыкIи Алексей Артюхинхэр, Александр Нитиевскэмрэ Сергей Ткаченкэмрэ. Мыхэм зэкIэми дэгъу дэдэу зыкъагъэлъэгъуагъ.
Командэхэм язэнэкъокъу Адыгеим текIоныгъэр къыщыдихыгъ. Мы спорт лъэпкъым ифедерацие зызэхащагъэм щегъэжьагъэу апэрэ чIыпIэр ящэнэрэу республикэм къыфагъэшъошагъ. ЯтIонэрэ ыкIи ящэнэрэ чIыпIэхэр къахьыгъэх Орловскэ хэкумрэ Санкт-Петербургрэ якомандэхэм.
Унэе зэнэкъокъухэм Руслан Брызгуновымрэ Александр Голдобинымрэ джэрз медаль къащахьыгъ. Джащ фэдэу Александр Нитиевскэмрэ Сергей Ткачен­кэмрэ зэнэкъокъум ишIухьафтынэу «Биг Фиш» зыфиIорэр къалэжьыгъ. Мыхэм килограмм 16-м ехъу къэзыщэчырэ пцэжъые къыхахыгъ.