АР-м ыкIи Пшызэ шъолъыр ащыпсэурэ быслъымэнхэм я Диндэлэ­жьапIэрэ Краснодар краим иобщественнэ организациеу «Адыгэ Хасэм» хэхьэрэ шIушIэ фондэу «Пробуждение» зыфиIорэмрэ зэ­дэлэжьэнхэу зэдаштагъ.

АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ ипащэу, муфтиеу Къэрдэн Аскэрбыйрэ шIушIэ фондэу зыцIэ къетIуагъэм ипащэу Уракъ Валерэрэ зэзэгъыныгъэм кIэтхэжьыгъэх. Зигъот макIэхэм, чIыпIэ къин ифагъэ­хэм мылъку, социальнэ ыкIи гушъхьэ IэпыIэгъу ягъэгъоты­гъэныр, япсауныгъэкIэ е нэ­мыкI лъэныкъохэм апкъ къикIыкIэ яфитыныгъэхэр агъэфедэнхэу амал зимыIэхэм социальнэ IэпыIэгъу арагъэкIыныр, Дин­дэлэжьапIэмрэ фондымрэ зэ­гъусэхэу шIушIэ Iофыгъохэр зэшIуахызэ ашIынэу, культурэм, шIэныгъэм, гъэсэныгъэм яхэ­гъэхъон IэпыIэгъу Iахь рахьы­лIэныр — ары лъэныкъуитIум пшъэрылъэу зыфагъэуцужьы­гъэхэр.
IэпыIэгъухэм апэIухьащт мылъкур зэрагъэуIуныр, шIушIэ Iофтхьабзэхэр зэхэщэгъэнхэр, фондым Iоф зэришIэрэр цIыфхэм ягъэшIэгъэныр, мыщ фэдэ нэмыкI фондхэм адэлэжьэгъэныр ары зэзэгъыныгъэм кIэтхагъэхэм зигъо Iофыгъоу алъы­тэхэрэр.
АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ илIыкIоу Краснодар щыIэ имамэу Тхьаркъохъо Аскэррэ Краснодар краим и Адыгэ Хасэ ишIушIэ фондэу «Пробуждение» зыфиIорэм ипащэу Уракъ Валерэрэ ­«Адыгэ макъэм» къызэрэфаIотагъэмкIэ, зэгъусэхэу рахъухьэгъэ Iофтхьа­бзэхэм ащыщхэр мы илъэсым ыкIэ нэс зэшIохыгъэ хъущтых.
ЗыцIэ къетIогъэ шIушIэ фондыр 2021-рэ илъэсым щегъэжьагъэу зэхэщагъэ хъугъэ. Ау щыIэ зэрэхъугъэр затхыгъэр 2023-рэ илъэсым иIоныгъо маз.
— ШIушIэ Iофтхьэбзэ зэфэшъхьафхэр а уахътэм къыкIоцI зэшIохыгъэ хъугъэх. Дагъэ къы­дэзыгъэкIырэ заводэу Ново­кубанскэ районым итым иIофышIэхэм ямэзэ лэжьапкIэ щыщ къыхалъхьэзэ, ащ фэдэ мылъкоу къаугъоирэмкIэ фондым иIоф­шIэн ригъэжьэгъагъ, — къеIуатэ Уракъ Валерэ. — Хасэри къыд­гоуцуи, фондым нахь зиу­шъомбгъугъ. Мазэ къэс нэбгырэ 40-мэ IэпыIэгъу афэхъух. Агъэнэфагъэхэм анэмыкIэу уз хьылъэ къызэузыгъэхэу, чIыпIэ къин ифагъэхэу IэпыIэгъу щыкIэхэрэри къытэуалIэх. Iоф
зы­т­шIэрэм къыщыублагъэу нэ­бгырэ миным ехъумэ IэпыIэгъу тафэхъугъ. Ахэм янахьыбэр уна­гъохэу сабый сымаджэхэр зиIэхэр ары. Врачхэм я Хасэу зэхэхьагъэри IэпыIэгъу къытфэхъу, сымаджэхэу операцие е Iэзэгъу уц гъэнэфагъэхэр зи­­щыкIагъэхэм тызэрадеIэшъущтыр къагъэпсынкIэ, яшIогъэшхо къагъакIо.
Джащ фэдэу Барцо Руслъан зипэщэ фондэу Тэхъутэмыкъое районым щылажьэрэми Краснодар краим и Адыгэ Хасэ ишIушIэ фонд зэпхыныгъэхэр дыриIэх. Фонд Iофыгъохэм язэхэщэнкIэ IэпыIэгъу зэфэ­хъух. Уракъ Валерэ къызэриIуагъэмкIэ, шIушIэ Iофтхьабзэхэм зэрахэщагъэхэр ягуапэу ныбжьыкIэхэр бэу къяуалIэх. Зигъот макIэхэм, унэгъо Iужъухэм, зи­закъоу къэнэгъэ нэжъ-Iужъхэм гъомылапхъэ афящэлIэгъэнымкIи, нэмыкI Iофтхьабзэ горэхэмкIи ныбжьыкIэхэм яшIуагъэ къагъакIо.
— ШIушIэ фондым зыцIэ ыхьырэ Къамбые Махьмуд къы­хэгъэщыгъэн фаеу сэлъытэ. Дагъэ къыдэзыгъэкIырэ заводэу Новокубанскэ районым итым иIофышIэхэр шIушIэ Iофтхьабзэм ары хэзыщагъэхэр, ары фондым ыцIэ зыкIыфаусыгъэри. Ежьыр щыIэжьэп нахь мышIэми, Iофыгъо дахэу ыублагъэр щыIэныгъэм щыпхырыщыгъэ хъугъэ, лъэкIуатэ, ар зымыуасэ щыIэп, — къыIуагъ Тхьаркъо­хъо Аскэр. — Сэ ДиндэлэжьапIэм Краснодар илIыкIоу сызагъакIом, IэпыIэгъу зищыкIэгъэ цIыфхэр, бэ шIэн, макIэ шIэн къызэрэсэолIэщтхэр сшIагъэ. Ащ фэдэуи хъугъэ. Ахэм шэпхъэ гъэнэфагъэ пылъэу Iоф адэпшIэн фае. ЕтIанэ Валерэ зипэщэ фондыр къыддэлэжьэнэу фаети, зэзэгъыныгъэ зэдэтшIынэу къыхэслъхьагъ. Тхьалъэ­IупIэ къызэIутхымэ, цIыфэу къы­тэуалIэрэм елъытыгъэу, нахь игъэкIотыгъэу Iоф зэдэтшIэн тимурад.
— Социальнэ IэпыIэгъу зищы­кIэгъэ цIыфхэм тадеIэ зы­хъукIэ, къэралыгъом IэпыIэгъу ты­фэхъу, — къыпедзэжьы Уракъ Валерэ. — ЕтIани ахэр цIыф лъэпкъ зэфэшъхьафхэм ащыщых. Ау тынаIэ нахь зытедгъэтыхэрэр лъэпкъым щыщ цIыфхэр ары. ГущыIэм пае, фондыр Адыгэ Хасэм епхыгъэшъ, тичылэ щыщхэу К. Темирязевым ыцIэ зыхьырэ къэралыгъо академиеу Москва дэтым щеджэрэ сту­дентищмэ хасэмкIэ IэпыIэгъу тафэхъу.
— IэпыIэгъум нэмыкIэу форум инхэм, конференциехэм, Iэнэ хъураехэм язэхэщэнкIэ фондыр къыздэдгъэIэпыIэн тыгу хэлъ, — хегъэунэфыкIы Тхьаркъохъо Аскэр, — ныбжьыкIэхэу гукъэкI гъэшIэгъонхэр зиIэхэм, волонтер IофшIэныр зэхэзыщэнэу фаехэм якъыхэгъэщынкIэ ахэм яшIуагъэ къэкIощт. Мыщ фэдэ Iофтхьабзэхэм мылъкукIэ IэпыIэгъу афэхъун зы­лъэкIыщтхэр къызэтщэлIэнхэ тимурад. А зэпстэуми тызэгъу­сэу тадэлэжьэщт.
— Муфтиеу Къэрдэн Аскэрбый тынаIэ зытыригъэтырэр шIу пшIэныр быслъымэн диным ишапхъэмэ зэращыщыр ыкIи ащ хьалэлэу узэрэфэлэжьэн фаер ары, — кIэухым къыхигъэщыгъ Уракъ Валерэ. — Мылъкум изакъоп, цIыфым джэуапэгъу уфэхъуным, гущыIэ дахэкIэ ыгу къыдэпщэеными мэхьанэшхо яI. Арышъ, цIыфым тишIуагъэ едгъэкIыныр типшъэрылъ шъхьаIэу ДиндэлэжьапIэмрэ фондымрэ тызэгоуцуагъ.
Тэу Замир.