Мы илъэсым Адыгеим социальнэ зэзэгъыныгъэкIэ заджэ­хэрэм пэIухьанэу сомэ миллиони 162-рэ къыщыхагъэкIыгъ. Зэтыгъоу сомэ 350000-рэ IэпыIэгъоу цIыфым къыратын алъэкIыщт.

Ахъщэр зыфэдизыщтыр зэлъытыгъэр социальнэ зэзэгъыныгъэу зэдашIыщтыр зыфэдэр ары. Нахьыбэм ежь яунэе Iоф къызэIуахыным пае ащ фэдэ IэпыIэгъур къызфагъэфедэ. Ащ ехьылIагъэу къыщаIуагъ АР-м IофшIэнымрэ социальнэ хэхъоныгъэмрэкIэ и Министерствэ. Гу­щы­Iэм пае, Мыекъуапэ щыщ Елена Шибинскаям бжалэм матэхэр хешIыкIых. Уахътэу а Iофым тыригъэкIуадэрэр фэдэ пчъагъэкIэ нахь макIэ ышIын ылъэкIыгъ социальнэ зэзэгъыныгъэм ишIуагъэкIэ.
Сэнэхьат гъэнэфагъэ зэрагъэгъотынымкIэ е яIэпэIэсэныгъэ хагъэхъонымкIэ амалышIоу непэкIэ щыIэхэм ар зэу ащыщ. Ащ фэдэ Iофтхьабзэхэм апэIу­хьэрэм щыщэу сомэ мин 30-р учреж­дением къафелъэгъужьы.
2024-рэ илъэсым къыщегъэжьагъэу ащ фэдэ IэпыIэгъум пае лъэIу тхылъхэм ятын нахь къызэрыкIо хъугъэ. Къэралыгъо фэIо-фашIэхэмкIэ порталым лъэIу тхылъыр IэкIахьэмэ икъущт. НэмыкI справкэ горэхэр ищыкIагъэхэу щытэп. Социальнэ ухъумэным икъулыкъухэм унагъом фэгъэхьыгъэ къэбарыр зэкIэ къызIэкIагъэхьан алъэкIыщт.
Социальнэ зэзэгъыныгъэм къикIырэр социальнэ ухъумэнымкIэ къулыкъумрэ цIыфэу зихахъо цIыкIумрэ зэзэгъыныгъэ зэдашIыныр ары. Учреждениер IэпыIэгъу зищыкIагъэм деIэ: е ахъщэ реты, е фэIо-фашIэ горэ фегъэцакIэ. Ежь лъэIу зиIэми IофшIапIэ горэ зэригъэгъотын, е еджэн, е иунэе Iоф къызэIуихын фае. Социальнэ зэзэгъыныгъэр адрэ IэпыIэгъухэм зэратекIырэр цIыфым мылъку къэкIопIэ гъэнэфагъэ иIэ хъун зэрэфаер ары.