КъэбарлъыгъэIэс агентствэу «РИА Новости» зыфиIорэм Урысыем ишъолъырхэм ягъогухэм язытет зэригъэпшагъ.

Зэфэхьысыжьхэм къызэрагъэлъагъорэмкIэ, Адыгеир апэрипшIым ащыщ хъугъэ. Зигъогухэр анахь дэгъоу алъытэгъэ субъект 40-м яблэнэрэу республикэр щыт. Адыгеим игъогухэм япроцент 77,1-р шапхъэхэм адештэ.
Шъугу къэдгъэкIыжьын, «Щынэгъон­чъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым ишIуагъэкIэ Адыгеим игъогу Iахь 53-рэ километрэ 77-рэ хъоу агъэцэкIэ­жьынэу агъэнэфагъ. Ахэм янахьыбэр, ар километрэ 43-р ары, шъолъыр гъогух.
АгъэкIэжьыщт чIыпIэхэм якъыхэ­хынкIэ асфальтэу телъым изытет, транспортэу тетыр зыфэдизыр, цIыф­хэм яеплъыкIэхэр, къулыкъоу алъыплъэхэрэм язэфэхьысыжьхэр, гъогу­хэм ягъэцэкIэжьын пIалъэу пылъхэр къыдалъытагъэх.
Гъогу Iахь 20-м щыщэу 4-р респуб­ликэм игъунапкъэу Джэджэ районым щыIэхэм къахеубытэх, чIыпIи 3-р Шэу­джэн ыкIи Кощхьэблэ районхэм ягъогух. Ахэм анэмыкIэу Теу­цожь, Тэхъутэмыкъое ыкIи Красногвардейскэ районхэмкIэ чIыпIи 2, Мыекъопэ районымкIэ щыIэ гъунапкъэхэм аха­хьэуи Iахьи 4 агъэцэкIэжьыщт.
Поселкэу Тульскэм екIурэ гъогум щыщэу агъэкIэжьыщтыр анахь кIыхь, километри 7,2-рэ мэхъу. Ар район гупчэм, поселкэхэу Удобнэм, Сов­хоз­нэм якIуалIэ, сымэджэщыр пэчыжьэп.
Мы илъэсым шъолъыр гъогоу агъэ­цэкIэжьыщтхэм федеральнэ бюджетым къыхэхыгъэу сомэ миллион 996-рэ апэIухьащт.