Урысые Федерацием и Дзэ-ошъогу кIуачIэхэм я Мафэ Адыгеим щыхагъэунэфыкIыгъ. Ахэр зызэхащагъэхэр мыгъэ илъэси 112-рэ мэхъу.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, я 761-рэ авиационнэ полкым ипащэу, полковникэу Сергей Хрыковыр, Мыекъопэ гарнизоным ипащэхэр, ветеранхэр ыкIи дзэ частым икъулыкъушIэхэр.
Республикэм и ЛIышъхьэ Адыгеим щыIэ полкым ипащэхэм, ипилотхэм ыкIи иинструкторхэм ямэфэкI пае афэгу­шIуагъ, хэгъэгум ищынэгъончъагъэкIэ мы кIуачIэхэм мэхьэнэ ин дэдэ зэряIэр къыхигъэщыгъ.
«Адыгеим IэпэIэсэныгъэ ин зыхэлъ пилот ыкIи инструктор лIэуж пчъагъэ хэгъэгум къыфигъэхьазырыгъ, Хэгъэгу зэошхом илъэхъан фашизмэр зэхакъу­тэ­ным ахэм яIахьышхо хашIыхьагъ, дзэ авиацием пае IофышIэхэр агъэхьазыры­гъэх ыкIи къыкIэлъыкIорэ илъэсхэм гъэ­хъагъэ хэлъэу япшъэрылъхэр агъэцэкIагъэх. Хэгъэгум идзэ авиацие итарихъ тичIыпIэгъубэмэ ацIэхэр егъэшIэрэу хэхьагъэх», — къыIуагъ КъумпIыл Мурат.
Ащ зэрэхигъэунэфыкIыгъэмкIэ, непэрэ урысые пилотхэм ыпэкIэ щыIагъэхэм яхэбзэ шIагъохэр лъагъэкIуатэх, ахэм ащыщых я 761-рэ авиационнэ полкэу республикэм щыIэм идзэкъулыкъушIэ-
хэр. Республикэм щагъэхьазырыгъэ дзэ­къулыкъушIэхэм дунэе терроризмэм пэшIуекIорэ бэнэныгъэм яIахь хашIыхьэ, хэушъхьафыкIыгъэ дзэ операцием ишъо­лъыр гъэхъагъэ хэлъэу япшъэрылъхэр щагъэцакIэх, ошIэ-дэмышIагъэ зыхэлъ тхьамыкIагъохэм афэхъурэ кIэуххэм ядэгъэзыжьын хэлажьэх.
Республикэм ращырэ шIушIэ хьылъэу хэушъхьафыкIыгъэ дзэ операцием ишъо­лъыр нагъэсырэм ыкIи дзэ операцием хэлажьэхэрэмрэ ахэм яунагъохэм арыс­хэмрэ IэпыIэгъоу аратырэм КъумпIыл Мурат къащыуцугъ.
Мы Iофтхьабзэм джащ фэдэу авиаполкым идзэкъулыкъушIэхэм шIухьафтынхэр щаратыгъэх. Адыгеим и ЛIы­шъхьэ и Рэзэныгъэ тхылъ аратыгъ полкым ипа­щэ игуадзэу, подполковникэу Дмитрий Борисенкэм, техникэм ылъэныкъокIэ ящыкIагъэхэр аIэкIэгъэхьэгъэнхэм фэгъэ­зэгъэ батальоным ипащэу, подполковникэу Дмитрий Смирновым, быбыным фэгъэхьазырыгъэнхэмкIэ полкым ипащэу, подполковникэу Андрей Тивановым, эскадрильем иштурманэу, майо­рэу Григорий Рыбкиным, инженер-авиа­ционнэ къулыкъумкIэ эскадрильем ипа­щэу, майорэу Вадим Чечулиным.
Джащ фэдэу мэфэкI Iофтхьабзэм хэлажьэхэрэм къафэгушIуагъэх АР-м и Къэралыгъо Совет — Хасэм и Тхьаматэу Владимир Нарожнэр, я 761-рэ авиа­ционнэ полкым ипащэу, полковникэу Сергей Хрыковыр.
Ахэм къыхагъэщыгъэх подразделением гъэхъагъэу ышIыгъэхэр ыкIи хэгъэ­гум ищынэгъончъагъэ къэухъумэгъэнымкIэ тапэкIи гъэхъагъэхэр ашIынхэу афэлъэIуа­гъэх. ДзэкъулыкъушIэхэм ащыщхэм рес­публикэм и Къэралыгъо Совет — Хасэм ирэзэныгъэ тхылъхэр, званияцIэ­хэр ыкIи къулыкъу тынхэр афагъэшъошагъэх.
ИскусствэхэмкIэ кIэлэцIыкIу еджапIэу N 1-м чIэсхэм къэзэрэугъоигъэхэм апашъхьэ яIэпэIэсэныгъэ къыщагъэ­лъэгъуагъ.
АР-м и ЛIышъхьэ ипресс-къулыкъу
къытыгъэ къэбархэмкIэ
Тхьаркъохъо Сафыет.