ДзюдомкIэ Континентальнэ лигэм ифинал ихьа­гъэх клубхэу «Локо­мотив-Грин Хилл» ыкIи «Ахмат» зыфиIохэрэр.

Мыщ фэдэ зэфэхьысыжь фэ­хъугъ Олимпийскэ чемпионэу Мудрэнэ Беслан и Кубок икъыдэхын фэгъэхьыгъэ зэнэкъокъоу Мыекъуапэ щыкIуагъэм. Турнирым дивизионэу «Кавказым» хэтхэм зыщаушэтыгъ.
Налщык ыкIи Грознэр къэзыгъэ­лъэгъогъэ финалистхэм анэмы­кIэу зэнэкъокъум хэлэжьагъэх «Дзю­домкIэ Мыекъопэ еджапIэр» (Мыекъуапэ), «Эдельвейс» (Гроз­­нэр), «Жемчужина» (Шъачэ), «Чин­гиз» (Назрань), «Вудглейд» (Каспийск) ыкIи «Кано» (Баку).
АР-м иминистрэхэм я Кабинет и Тхьаматэ игуадзэу Виктор Орловыр турнирым ыкъызэIухын фэгъэхьыгъэ мэфэкI зэхахьэм къыщыгущыIагъ ыкIи Адыгеим и ЛIышъхьэ ыцIэкIэ ащ хэлажьэ­хэрэм шIуфэс къарихыгъ.
— Дзюдом зищыIэныгъэ гъогу езыпхыгъэхэм ыкIи мы спорт лъэпкъыр зыгу рихьыхэрэм Мые­къопэ еджапIэм ыкIи ар зыгъэ­псыгъэ Кобл Якъубэ дэгъу дэдэу афэнэIуасэх. Дзюдом хэхъоны-
гъэ ышIыным тренер IэпэIасэм иIа­хьышхо зэрэхэлъыр Урысыеми, IэкIыб къэралыгъохэми ащызэ­лъа­шIэ, ащ лъытэныгъэшхо фашIы, — къыIуагъ Виктор Орловым.
Купхэм язэнэкъокъу изэфэхьысыжьхэмкIэ, Мыекъуапэ илIыкIо­хэм аужырэ, яплIэнэрэ чIыпIэр аубытыгъ. Ахэр Азербайджан идзюдоистхэм 3:2-у атекIуагъэх. Ау етIанэ клубхэу «Ахматымрэ» «Чингизымрэ» нахь лъэшыгъэх. «Кано» зыфиIорэм Ингушетием иклуб 3:0-у къышIуихьыгъ ыкIи фи­налныкъом ихьагъ. «Ахматым­рэ» «Локомотивымрэ» язэIукIэгъу­хэр къахьыгъэх ыкIи финалым ихьагъэх. Грозненцэхэр Каспийскэ икомандэ 3:1-у текIуагъэх, Налщык илIыкIохэр Баку къэзыгъэлъэгъуагъэхэм анахь лъэшыгъэх, пчъагъэр — 3:1.

Финал зэIукIэгъур гъэшIэгъонэу кIуагъэ ыкIи дунэе зэнэкъокъу­хэм яшапхъэхэм адиштагъ. «Локомотивым» апэрэ очко къыфэзыхьыгъэр Таулан Байсиевыр ары, ар Турпал Тепкаевым нахь лъэшыгъ. Килограмм 90-м нэс къэзыщэ­чыхэрэм якуп щыбэнэгъэ Мансур Лорсановыр Абэзэ Астемир те­кIуагъ ыкIи пчъагъэр зэфэдиз ышIыгъ. «Ахматыр» ыпэ ригъэшъыгъ Тамерлан Башаевым, ар Билал Нияз нахь лъэшыгъ. Мыщ къыкIэлъыкIорэ зэIукIэгъум дунаим ичемпионат хагъэунэфыкIырэ чIыпIэ къыщыдэзыхыгъэ Якуб Шамиловымрэ Мысыр Ис­махьилрэ щызэбэныгъэх. Грознэм илIыкIо шъобж тещагъэ зэрэхъугъэм къыхэкIэу «Локомотивым» идзюдоист текIоныгъэр къыди-­
хыгъ. Финалым иаужырэ зэIу­кIэгъу мы клубым илIыкIоу Мухамед Алоевыр Сайхан Шабихановым текIуагъ ыкIи командэм апэрэ чIыпIэр къыфихьыгъ.
— Мы спорт лъэпкъыр зыгу рихьыхэрэм турнирыр ашIогъэшIэгъон зэрэхъугъэр лъэшэу си­гуапэ. ЗэкIэми дэгъоу ашIэ дивизионэу «Кавказым» хэхьэрэ командэхэр дзюдоист лъэшхэм къызэрагъэлъагъохэрэр. Анахьэу къахэзгъэщымэ сшIоигъу Якуб Шамиловыр, ар текIоныгъэм зэ­рэфэбэнагъэр ныбжьыкIэхэмкIэ щысэтехыпI, — къыIуагъ олимпийскэ чемпионэу Мудрэнэ Беслан.
ДзюдомкIэ Континентальнэ лигэм иедзыгъо шъхьаIэ хэлэ­жьэнхэу фитыныгъэ къыдахыгъ «Локомотивымрэ» «Ахматымрэ». Ахэр яжэщтых дивизионхэу «Къо­кIыпIэ», «Гупчэ» ыкIи «Динамо» зыфиIохэрэм текIоныгъэхэр къащыдэзыхыщтхэм.