Физкультурникым и Мафэ фэгъэхьыгъэ мэфэкI Iофтхьабзэхэр Адыгеим имуниципалитетхэм зэкIэми ащыкIуагъэх.

Ау анахь цIыфыбэ зыхэлэжьагъэхэр Мыекъуапэрэ Красногвардейскэ районымрэ ащырекIокIыгъэхэр ары.
Красногвардейскэ районым футболымкIэ, шахматхэмкIэ, теннис цIыкIумкIэ щызэнэкъокъугъэх, зыныбжь хэкIотагъэхэм ыкIи сэкъатныгъэ зи­Iэхэм я Спартакиадэ, нэмыкI Iофтхьа­бзэхэр щызэхащагъэх. Район администрацием ипащэ шъолъыр, муниципальнэ мэхьанэ зиIэ тынхэр спорт­смен ыкIи тренер анахь дэгъухэм афигъэшъошагъэх.
КъыткIэхъухьэрэ лIэужхэм хэхъоныгъэ ашIыным Iоф дэзышIэрэ ыкIи спортым ылъэныкъокIэ гъэхъэгъэшIу зиIэ нэбгырэ 20 фэдизмэ республикэм икъэлэ шъхьаIэ щафэгушIуагъэх. Ахэм къалэжьыгъэ щытхъу ыкIи рэзэныгъэ тхылъхэр, нэмыкI тынхэр язытыжьыгъэхэр Мыекъуапэ имэрэу Геннадий Митрофановыр, АР-м и Къэралыгъо Совет — Хасэм идепутатэу Шэуджэн Тембот ыкIи народнэ депутатхэм я Совет итхьаматэ игуадзэу Мекерэ Светланэ. Джащ фэдэу физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ибгъэхалъхьэхэр Адыгеим иныбжьыкIэ 18-мэ афагъэшъошагъэх. ФутболымкIэ, волейболымкIэ, шахматхэмкIэ ыкIи тенни­сымкIэ зэнэкъокъухэр Мыекъуапэ щыкIуагъэх.