Армением июристхэм я Ассоциацие икъутамэ Адыгеим щыгъэпсыгъэным фэгъэхьыгъэ IофшIэгъу зэIукIэгъу АР-м и Очылхэм япалатэ щыкIуагъ. Iофтхьабзэм хэлэжьагъэх мы Ассоциацием иправление илIыкIохэр, джащ фэдэу юридическэ сообществэхэм ыкIи Адыгеим илъэпкъ-культурнэ организациехэм ялIыкIохэр.

Армением июристхэм я Ассоциацие икъутамэу Адыгеим щагъэпсыщтым пшъэрылъэу иIэщтыр правэм ылъэныкъокIэ ыпкIэ зыхэмылъ юридическэ IэпыIэгъур цIыфхэм ягъэгъотыгъэныр ары.
Iофтхьабзэм ипэублэ Урысыем июристхэм я Ассоциацие ишъолъыр къута­мэ игъэцэкIэкIо комитет ипащэу, Адыгеим и Очылхэм япалатэ итхьаматэу Мамый Алый адыгэ шэн-хабзэхэм атетэу хьакIэхэм адыгэ Iанэм тырагъэуцорэ лагъэр ыкIи Адыгеим щыщхэу Хэгъэгу зэошхом хэлэжьагъэхэм яшIэжь зыдэт тхылъыр шIухьафтын афишIыгъ.
Джащ фэдэу Урысыем июристхэм я Ассоциацие ишъолъыр къутамэ игъэцэкIэкIо комитет ыцIэкIэ Мамый Алый Урысыем иермэлхэм я Союз и Адыгэ республикэ къутамэ ипащэ игуадзэу Леван Амирханян имэфэкIкIэ фэгу­шIуагъ, Адыгеим щыпсэурэ лъэпкъхэм шIуагъэ къафихьэу зэрэлажьэрэм фэшI нахьыжъ гъэшIуагъэм зэрэфэразэр риIуагъ.
Ежь Леван Амирханян гущыIэр зыратым Армением июристхэм я Ассоциацие икъутамэу Адыгеим щагъэпсырэм гъэхъагъэхэр ышIынхэу, адыгэхэмрэ ермэлхэмрэ тарихъ зэныбджэгъуныгъэу азыфагу илъыр лъагъэкIотэнэу къафэлъэIуагъ.
Нэужым лъэныкъуитIуми Iоф зэрэзэдашIэщт Iофыгъохэм атегущыIагъэх. Армением июристхэм я Ассоциацие итхьаматэу Шаген Петросян къызэри­IуагъэмкIэ, УФ-м ишъолъыр 50-м ехъумэ организацием икъутамэхэр ащагъэпсыгъэх.
— Сицыхьэ телъ мыщ фэдэ зэпхыныгъэм ишIуагъэкIэ тиорганизациерэ Адыгеим июридическэ сообществэрэ адрэ шъо­лъырхэм щысэтехыпIэ зэрафэхъущтхэм, — къыIуагъ Шаген Петросян.
Армением июристхэм я Ассоциацие пшъэрылъ шъхьаIэу иIэр цIыфхэм ыкIи организациехэм яфитыныгъэхэр ыкIи яхэбзэ шIоигъоныгъэхэр Урысыем ыкIи IэкIыб къэралыгъохэм къащыухъумэгъэн­хэр, джащ фэдэу зисэнэхьат хэшIыкIы­шхо фызиIэ IофышIэхэр къыхэгъэщыгъэн­хэр. Ассоциацием хэтых IэпэIэсэныгъэ­шхо зыIэкIэлъ юристхэу ыкIи очылхэу хьыкум зэхэфынхэм текIоныгъэ пчъагъэ ащызышIыгъэхэр.
Зэхэсыгъом хэлэжьагъэхэм къызэрэхагъэщыгъэмкIэ, Урысыем июристхэм я Ассоциацие ишъолъыр къутамэу АР-м щыIэмрэ Армением юристхэм я Ассоциациерэ пшъэрылъэу яIэр нахьыбэмкIэ зэтефэ. Ахэр ыпкIэ зыхэмылъ юридическэ IэпыIэгъур цIыфхэм ягъэгъотыгъэ­ныр, хэбзэ фитыныгъэу яIэхэм ащыгъэ­гъозэгъэнхэр, зыныбжь имыкъугъэхэм хэбзэукъоныгъэхэр зэрамыхьанхэмкIэ пэшIорыгъэшъ Iофтхьабзэхэр адызехьэгъэнхэр, юристхэм яшIэныгъэхэм ахагъэхъон амал ятыгъэныр.
Iофтхьабзэм хэлэжьагъэхэр яIофшIэн­кIэ IэпэIэсэныгъэу аIэкIэлъымкIэ зэхъо­жьыгъэх. Адыгеим и Очылхэм япалатэ ивице-президентэу, Адыгеим и Общественнэ палатэ хэтэу Щыкъ Раситэ къызэриIуагъэмкIэ, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм ыпкIэ зыхэмылъ правовой IэпыIэгъу арагъэгъоты. Адыгеим и Очылхэм япалатэрэ Къэралыгъо фондэу «Хэгъэгум иухъумакIохэр» зыфиIорэмрэ зэзэгъыныгъэм зэдыкIэтхагъэх ыкIи къэралыгъо фондым иофис мафэ къэс дежурствэ щахьы. Мыщ фэдэ IофшIэныр Адыгеим ирайонхэми ащэкIо.
Джащ фэдэу Щыкъ Раситэ къызэриIуа­гъэмкIэ, кIэлэеджакIохэм ыкIи студентхэм яхэбзэ фитыныгъэхэр ашIэнхэмкIэ университетэу «Синергия», «Движение Первых» зыфиIохэрэм ыкIи Урысыем июристхэм я Ассоциацие зэхащэгъэ къэралыгъо проектым игъэцэкIэн Адыгеим июристхэри хэлэжьэщтых. Проектыр мы илъэсым Санкт-Петербург мэкъуогъум щыкIогъэ я XII-рэ дунэе юридическэ форумым къыщагъэлъэ­гъуагъ.
Мы узыгъэгъозэрэ проектэу «ВПРАВЕ» зыфиIорэр зыфэгъэхьыгъэр къэра- лы­гъом ихэбзэ шъхьаIэхэм, цIыфхэм яфитыныгъэ­хэм ыкIи япшъэрылъхэм Iэтахъохэмрэ ныбжьыкIэхэмрэ нэIуасэ афэшIыгъэнхэр, джащ фэдэу ахэр юридическэ сэнэхьатым ыкIи юриспруденцием ишъэфхэм ащыгъэгъозэгъэнхэр ары.
Рахъухьагъэр агъэцэкIэным фэшI шъолъыр мэхьанэ иIэу институтхэм егъэджэн материалхэр икъоу аIэкIэ­лъынхэ фае. Ащ пае Урысыем июристхэм я Ассоциацие ыкIи «Синергия» зыфиIорэм яэкспертхэр, джащ фэдэу Адыгеим и Очылхэм япалатэ илIыкIохэр мы Iофтхьабзэм хэлажьэх.
КIэухым къызэраIуагъэмкIэ, зыныбжь имыкъугъэхэм бзэджэшIагъэхэр зэрамыхьанхэмкIэ пэшIорыгъэшъ Iофтхьабзэу зэрахьэхэрэм яIофыгъохэм афэгъэхьыгъэ зэхэсыгъо Адыгеим и Къэралыгъо Совет – Хасэм зэхищэщт. Ащ Урысыем июристхэм я Ассоциацие ишъолъыр къутамэрэ Адыгеим и Очылхэм япалатэрэ хэлэжьэщтых.
КIАРЭ Фатим.
Сурэтыр: Къэрдэн Азэмат.