Хабзэ зэрэхъугъэу, шышъхьэIум иятIонэрэ шэмбэт физкультурникым и Мафэ Урысыем щыхагъэунэфыкIы. Физическэ культурэм ыкIи спортым пыщагъэхэм, зипсауныгъэ зыгъэпытэ зышIоигъо пстэуми мыр зэдырямэфэкI. 2024-рэ илъэсым ар зытефэрэр шышъхьэIум и 10-р ары ыкIи я 85-у хагъэунэфыкIы.

Физкультурникым и Мафэ тикъэралыгъо зыщагъэнэфагъэр 1939-рэ илъэсыр ары. ЦIыфхэм физическэ хэхъоныгъэ ашIыным, япсауныгъэ агъэпытэным ыкIи спортым пыщагъэхэм япчъагъэ нахьыбэ шIыгъэным ар фытегъэ­псыхьагъ. Джырэ уахътэм мы мэфэкIым цIыф куп зэфэшъхьаф­­­хэр, аныбжь емылъытыгъэу, зэрепхых.
ЦIыфым ииммунитет ыгъэпытэным, гу-лъынтфэхэм нахьышIоу Iоф ашIэным физическэ культурэмрэ спортымрэ фэIорышIэх. Арышъ, мыхэм апыщагъэхэм япчъагъэ хэгъэхъогъэ­ныр къэралыгъом ипшъэрылъ шъхьаIэхэм ащыщ. Нэбгырэ пэпчъ ежь зыфэе лъэныкъор къыхихын ылъэкIыщт: йогэр, фитнесыр, футболыр, волейболыр, баскетболыр, теннисыр, нэмыкIхэри.

Спортсменхэм ягъэхъагъэхэм тарыгушхон амал зэрэтиIэм дакIоу, псауныгъэр гъэпытэгъэным фытегъэпсыхьэгъэ Iоф­тхьэбзэ зэфэшъхьафхэр мы мафэм зэхащэх: зэнэкъокъухэр, къызэдэчъэнхэр, мастер-классхэр, флешмобхэр, марафонхэр, концертхэр ыкIи нэмыкIхэри.
Физкультурникым и Мафэ ихэгъэунэфыкIын фэгъэхьыгъэ Iофтхьэбзэ гъэшIэгъонхэр Мые­къуапэ щыкIощтых. ВолейболымкIэ, футболымкIэ, теннисымкIэ, лъэс зекIонымкIэ, дзюдомкIэ зэнэкъокъухэр рагъэкIокIыщтых. Джащ фэдэу Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ибгъэхалъхьэхэр къэзыхьыгъэхэр, физическэ культурэм ыкIи спортым хэхъоныгъэ ашIыным зиIахьышIу хэлъхэр агъэшIощтых.