ШышъхьэIум и 2 — 5-м творческэ купхэм яфестивалэу «Сыгу къушъхьэхэм ащыI» зыфиIорэр Темыр Осетием щыкIуагъ. Ижъы­рэ адыгэ орэдхэр къэзыIорэ ансамблэу «Джэныкъу» зыфиIоу Шэуджэн районым щызэхэщагъэр ащ хэлэжьагъ.

Лъэпкъ проектэу «Культурэм» къыдыхэлъытэгъэ федеральнэ проектэу «Творческэ цIыфхэр» зыфиIорэм епхыгъэу Iоф зы­шIэрэ «Урысыем культурэмкIэ ифонд» игрант ишIуагъэкIэ проектыр гъэцэкIагъэ хъугъэ.
Темыр Кавказым иреспуб­ликэхэм, Закавказьем, Къыблэ федеральнэ шъолъырым, Рес­публикэу Къырым ятворческэ купибгъу фестивалым хэлэ­жьагъ.
«Джэныкъом» ипащэу Юсып Заур къызэриIуагъэмкIэ, фес­тивалым изэхэщакIохэр фэбагъэ хэлъэу къапэгъокIыгъэх. ЦIыф лъэпкъхэм якультурэ къэухъу­мэгъэнымкIэ ыкIи хэхъоныгъэ егъэшIыгъэнымкIэ, къошныгъэ зэфыщытыкIэр гъэпытэгъэнымкIэ мыщ фэдэ Iофтхьабзэхэм мэхьанэшхо яI. Адыгеим иорэдыIо куп фестивалым чанэу зыкъыщигъэлъэгъуагъ, Владикавказ изэIухыгъэ культурнэ чIыпIэхэм концерт къащитыгъ. Iофтхьабзэм хэлэжьэрэ орэды­Iохэр нэIуасэ зэфэшIыгъэнхэм фытегъэпсыхьэгъэ зэIу­кIэхэр ра­гъэкIокIыгъэх. Iофтхьабзэм хэлэжьагъэхэр зыщыщ лъэп­къымрэ бзэу аIулъымрэ ямылъы­тыгъэу орэдым зэфи­щагъэх.
— Тикъэгъэлъэгъон хэхьа­гъэх «Нарт пщыналъэр», «Кавказ зэо лъэхъаныр», «ЛIыхъужъ орэд­хэр», «Къэбэртаемэ ячэщ теу». ФэIо-фэшIэ орэдхэу «Нысэищэ ыкIи Шъэощэжь орэдхэр» зыфи­Iорэ лъэпкъ орэдыжъхэр фес­тивалым къыщытIуагъ». Лъэпкъ мэфэкIэу «Задалески Нана» зыфиIорэм тыхэлэжьагъ. Осетин тарихъым ыгъэлъэпIэрэ тхыдэжъым къызэриIоу, Тамерлан лъащэр аланхэм къызатебанэм, Нана зыцIэ лIыхъужъэу, кIэлэцIыкIу миным нэс псаоу къэзыгъэнэжьыгъэм ишIэжь мэфэкIыр фэгъэхьыгъ. Аужырэ мафэм гала-концертымкIэ фес­тивалыр зэфашIыжьыгъ, — къы­Iуагъ купым ипащэу Юсып Заур.
— «Джэныкъом» непэ Адыге­им ыцIэ дахэкIэ зэраригъаIорэм тырэгушхо. Купым хэтхэу Юсып Заур, ЦуукI СултIан, Мерэм Аскэр, ПашIо Айдэмыр, Тутарыщ Заурбый, Хьамыцу Щамиль, Ламыкъо Асхьад адыгэ лъэпкъым икультурэ, ишэн-хэбзэ дахэхэр искусствэм иамалхэмкIэ цIыфхэм ашIэнхэм дэлажьэх, — хигъэунэфыкIыгъ Шэуджэн районым культурэмкIэ игъэIорышIапIэ ипащэу Къэрэбытэ Айдэмыр.
Лъэпшъыкъо
Фатим.