УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын Адыгеим имуниципальнэ образованиехэм ащылъагъэкIуатэ.

Мары проектым къыдыхэ­лъытагъэу джыри джэгупIитIу Тэхъутэмыкъое районым щагъэ­псыгъ. Муниципальнэ образованием ипащэ иинтернет нэкIубгъохэм ащыщ къызэрэритха­гъэмкIэ, поселкэу Инэм иурамэу Сединым ыцIэ зыхьырэм Зэ­къошныгъэм игупчэу тетым зыр щашIыгъ, адрэр Лениным ыцIэ зыхьырэ урамым щагъэпсыгъ.
КIэлэцIыкIухэр зыщыджэгущт псэуалъэхэм анэмыкIэу тIысыпIэхэр, хэкIидзапIэхэр агъэуцугъэх, джэгупIэр щынэгъончъэным фэшI хьашъо тырабзагъ, видеокамерэхэр па­лъагъэх.
ПстэумкIи чIыпIи 6 мы илъэ­сым Тэхъутэмыкъое районым щызэтырагъэпсыхьан гухэлъ яI. Мы уахътэм поселкэу Ябло­новскэм IофшIэнхэр щылъагъэ­кIуатэх. Ащ фэтэрыбэу зэхэт унэу дэтхэм ащыщхэм ящагу­хэр, общественнэ чIыпIэхэр щагъэ­кIэжьых.
ПIалъэхэм адиштэу зэкIэ псэуалъэхэр ашIынхэр пшъэ­рылъ шъхьаIэхэм зэращыщым Тэхъутэмыкъое район адми­нистрацием ипащэ къыкIигъэтхъыгъ.