Тэхъутэмыкъое районым ипоселкэу Инэм илъэс заулэкIэ узэкIэIэбэжьмэ къыщызэIуахыгъэхэ еджэпIакIэу N 2-р, кIэлэцIыкIу IыгъыпIитIур, спорткомплексышхор, поселкэу Яблоновскэм иеджапIэу N 27-р, мы псэупIэ дэдэм иурамэу Дружбэм джырэблагъэ щаухыгъэ еджапIэр, Мыекъуапэ дэт Мыл ордэунэжъыр, Адыгэкъалэ дэт спорт псэуалъэу Лъэцэр Хьазрэт ыцIэ зыхьырэр… Урысыем шъолъырыкIэу къыхэхьа­жьыгъэхэм ащыщэу Херсонскэ хэкум и Геническэ районэу Адыгеир IэпыIэгъу зыфэхъурэм, зэтыригъэуцожьырэм спорт комплекситIоу щагъэуцугъэр, кIэлэцIыкIу IыгъыпIэу икIэрыкIэу ашIыжьыгъэр, мы уахътэм ашIырэ социальнэ псэолъакIэхэр…

Мыхэр зэкIэп псэолъэшI хъыз­мэтшIапIэу «Форвард» зы­фиIорэм 2014-рэ илъэсэу Iоф зишIэрэм къыщыублагъэу ыгъэу­цугъэр.
— Сатыу псэуалъэхэмрэ фэтэрыбэу зэхэт унэхэмрэ яшIын зыщедгъэжьэгъагъэр. Апэу дгъэуцугъагъэр «Декатлон» зыфиIорэ щэпIэ зэхэтыр зычIэтыгъэр ары. Ащ ыуж фэтэрыбэу зэхэт унэхэр къызэ­кIэлъыкIуагъэх. Ахэр зэкIэ 2014 — 2017-рэ илъэсхэр ары зы­хъугъэр. ЕтIанэ къэралыгъо зэзэгъыныгъэхэм тахэхьанэу хъугъэ. Джы нахьыбэу тшIырэр социальнэ псэуалъэх, — къы­Iуагъ хъызмэтшIапIэм ипащэу, АР-м изаслуженнэ псэолъэшIэу Хъодэ Ислъам.
Ясэнэхьат мэфэкI ипэгъокIэу ащ зыIудгъэкIагъ. Джырэ фэдэ уахътэм псэолъэшIхэм яIофшIэн «къэжъо» зыфаIорэм фэд. «Форвардым» илъэсыкIэ еджэгъур къэмысызэ ыухынышъ ытын фэе псэуалъэхэр иIэх. Арышъ, Ислъам къэгущыIэнэу охътабэ иIагъэп. ЕтIани ар щытхъур зимыкIэсэ цIыф шъырытхэм ащыщ. Ежь фэгъэхьыгъэу къыIотэнэу фэягъэп, ау Iофэу ышIэрэм гухахъо зэрэхигъуатэрэр къыхэщэу, ащ игугъу игуапэу къышIыгъ.

Ислъам апэрэ мафэм къыщегъэжьагъэу хъызмэтшIапIэм пэщэныгъэр дызэрехьэ. Мы лъэныкъом пэщэ IэнатIэр щызыIыгъ анахь ныбжьыкIэхэм ар ащыщ. Поселкэу Инэм къыщы­хъугъ, щапIугъ, еджапIэри ащ къыщиухыгъ. ПсэолъэшIыным сыдми IофшIапIэ зэриIэщтым пай ошIэ-дэмышIэу къыхэхьа­гъэу щытэп. КъызэриIуагъэмкIэ, ицIыкIугъом къыщыублагъэу ащ фэнэIосагъ, щылэжьэнэу ыгукIэ ыштэгъагъ. АщкIэ янэшыр ары щысэтехыпIэ фэхъугъэр. Ащ мыщ ищыIэныгъэ гъогу рипхыгъ, ипхъорэлъф цIыкIур IофшIапIэм зыдищэу хъущтыгъ. Ащ тетэу псэолъэшI IофшIэныр шIу ри­гъэлъэгъугъ.
Псэолъэшхохэр зыгъэуцурэ хъызмэтшIапIэу бэдзэршIыпIэм апэрэ чIыпIэхэр щызыIыгъхэм ащыщыр ыгъэIорышIэным а лъэхъаным емыгупшысэщты­гъэми, псэолъэшI сэнэхьатыр ыгукIэ къыхихыгъэу Краснодар имонтажнэ техникум чIэхьэ­гъагъ. Мы къэлэ дэдэр ары ащ­кIэ Iоф ышIэнэу зыщыригъэ­жьэгъагъэри. Нахь кIасэу Краснодар имэкъумэщ университет псэолъэшIынымкIэ ифакультет къыухыжьыгъ.

IофшIэн пстэуми къин горэ ахэлъ, ау унэу цIыфхэр зычIэсыщтхэр, псэуалъэу кIэлэцIыкIухэм охътабэ зыщагъэкIощтхэр пIалъэхэм уашIомыкIэу, шап­хъэу щыIэхэм адиштэхэу, щынэгъончъэхэу, пытэхэу, ом зэхъокIыныгъэу фэхъухэрэм яягъэ ямы­кIынэу, илъэсипшI пчъагъэхэм ателъытагъэхэу бгъэуцунхэр анахь мыIэшIэххэм ащыщ. Арэу щытми, Ислъам шIу ылъэгъурэ Iофэу зыпылъым гухахъо зэрэхигъуатэрэм ишыхьатэу, зыпари къин хэмылъэу еIо. Зыгъэпсэфыгъор макIэу, пчэдыжьым жьы дэдэу иIофшIэн ригъажьэу, чэщыр кIогъахэу иунэ екIужьэу бэрэ къыхэкIыми, пшъэдэкIы­жьэу иIэри ины, псэолъэшI сэ­нэхьатым ищыIэныгъэ зэрэрипхыгъэм рыкIэгъожьэу зыпарэкIи къыхэкIыгъэп.
— Анахь къиныр Iоф зышIэн рабочэ Iашъхьэ зэрэщымыIэр, псэолъэшIыным хэшIыкI фызиIэ специалист дэгъухэр зэрэгъотыгъуаехэр ары, — къыIуагъ ащ. — Iоф зышIэнэу къакIо­хэрэми ыгу етыгъэу ипшъэрылъхэр ыгъэцэкIэнхэу къахэкIырэр бэп.

«Форвардым» IофшIэпIэ чIыпIэ 80-м ехъу къытыгъ, ау ащ нахьыби ящыкIагъ. Ащ фэшI псэуалъэу ашIырэм елъытыгъэу джыри цIыфхэр къыра­гъэбла­гъэх.
ХъызмэтшIапIэм поселкэу Яблоновскэм еджэпIитIоу щи­шIырэм язырэр джырэблагъэ ыухыгъ, илъэсыкIэ еджэгъум ар къызэIуахыщт. ЯтIонэрэри ыкIэм рафылIэ, илъэсыр имыкIызэ аухынышъ, атынэу ары гухэ­лъэу яIэр. Джащ фэдэу Херсонскэ хэкум и Геническэ район ща­шIырэ спорт псэуалъэхэри Iоныгъом и 1-м нэмысызэ аухынхэм ыуж итых. Ислъам къызэриIуагъэмкIэ, ахэр Iоф зышIэрэ гурыт еджапIэхэм ящагухэм адашIыхьэх, арышъ, илъэсыкIэ еджэгъум кIэлэеджакIохэм агъэ­федэшъунхэу аухынхэр пшъэ­рылъ шъхьаIэу яIэхэм ащыщ.

Анахьэу зэрыгушхорэр псэуа­лъэу ышIырэр цIыфхэм шъхьапэ афэхъуныр арэу еIо Ислъам. Ащ пэщэныгъэ зыдызэрихьэрэ хъызмэтшIапIэм ащ фэдэ псэо­лъабэ ышIыгъ. Тызэрэщыгъуа­зэмкIэ, ежь исабыйхэр кIэлэцIыкIу IыгъыпIэу агъэуцугъэхэм ащыщ макIох. Арышъ, зэрыгу­шхоныбэ Ислъам зэриIэр нафэ. Джыри ащ фэдабэ ыпэ къэ­кIынэу тыфэлъаIо.
Джыри тапэкIэ Адыгеим хэ­хъоныгъэхэр ышIынхэм, цIыфэу исхэм щыIэкIэшIу яIэным фэIорышIэщт проектыбэ «Фор­вардым» щыIэныгъэм щыпхырищынэу гухэлъышхохэр иIэх. Зэпстэур къадэхъунэу тэри та­­фэлъаIо, ямэфэкIкIэ тафэгушIо!
ХЪУТ Нэфсэт.
Сурэтхэр: Iэшъынэ Аслъан, «Форвардым» ихъарзынэщ.