Спорт лъэпкъ зэфэшъхьафхэмкIэ Адыгеим илIыкIохэм гъэхъэгъэшIухэр ашIых, республикэм ыцIэ да­хэкIэ рарагъаIо. Ахэр лъэгэпIэ ин­хэм зэранэсхэрэр гушIуагъо. Шэуджэн районым икIэлэцIыкIу-ныб­жьыкIэ спорт еджапIэ икъутамэу къуаджэу Хьатыгъужъыкъуае дэтыр зэрифэшъуашэу зэтегъэпсыхьагъ.

Атлетикэ онтэгъумкIэ спортым имастер хъунымкIэ кандидатэу, тренер шъхьаIэу Хьагъур Хьалимрэ спортымкIэ дунэе класс зиIэ мастерэу Хьагъур Рэджэбрэ кIэлэ ныбжьыкIэхэр ащ щагъасэх.
Къуаджэм атлетикэ онтэгъур къыдэзыхьагъэр Хьатыгъужъыкъое гурыт еджапIэм химием-
кIэ кIэлэегъаджэу Iутыгъэ БжьэшIо Ким арэу къаIожьы. Ащ апэрэу Iоф зыдишIэнэу ригъэ­жьагъэр илъэс 16 зыныбжь Хьагъур Хьалим ары. ЕджапIэм ыуж Адыгэ къэралыгъо кIэлэ­егъэджэ институтым испорт фа­культет ащ къыухыгъ. 1984-рэ илъэсым щыублагъэу кIалэхэм адэлажьэ. Илъэс 40 хъугъэу Шэуджэн районым зыцIэ дахэкIэ щызэлъашIэрэ Хьалимэ не­пэрэ лIэужыкIэхэр егъасэ, испорт­сменхэм Адыгеим текIоныгъэхэр къыфахьы.
Спортым ылъэныкъокIэ Iофыгъо зэфэшъхьафыбэ еджапIэм щызэшIуахы. КIэлэцIыкIумэ япсауныгъэ агъэпытэным фэшI амалышIухэр аIэкIэлъ. Ахэм апае секцие зэфэшъхьафхэм Iоф ашIэ. Лъэшэу ягуапэу ащ ныбжьыкIэхэр якIуалIэх.

Мы мафэхэм спорт еджапIэм «Адыгэ макъэр» еблэгъагъ. Шэуджэн районым икIэлэцIыкIу-ныбжьыкIэ спорт еджапIэ ипащэу Бгъуашэ Кимэ гущыIэгъу тыфэхъугъ.
— Социальнэ инфраструктурэм ипсэуалъэхэр къуаджэм щыгъэпсыгъэнхэмкIэ, цIыфхэм ящыIэкIэ амалхэм зыкъягъэIэтыгъэнымкIэ Адыгеим Iофышхо щашIэ. Лъэпкъ проектэу «Демография» зыфиIорэм къыды­хэлъытагъэу Шэуджэн районым спорт комплекс щызэтырагъэ­псыхьагъ. Ар хэгъэгум и Президент къыгъэуцугъэ пшъэрылъхэр гъэцэкIэгъэнхэм, къэлэдэс­хэмрэ къоджэдэсхэмрэ зэфэдэ амалхэр яIэным фэIорышIэ. ВолейболымкIэ, футболымкIэ, атлетикэ онтэгъумкIэ, дзюдомкIэ, теннисымкIэ секциехэм Iоф ашIэ. Спортым пылъ кIэлэцIыкIу 420-мэ тадэлажьэ. ТиеджапIэ икъутамэу Хьатыгъужъыкъуае щылажьэрэм гъэхъэгъэшIухэр иIэх. Илъэс 40 хъугъэу еджапIэм Iут Хьагъур Хьалимэ иIофшIэн дэгъу дэдэу егъэцакIэ, батыр ныбжьыкIэхэм зэнэкъокъухэм къащахьырэ хагъэунэфыкIырэ чIыпIэхэм ар къаушыхьаты.
Мы спорт лъэпкъым IэпэIэсэныгъэ ин ищыкIагъ. А зэкIэ къыгурыIоу Хьалимэ зыныбжь илъэс 12 хъугъэхэм къащыу­благъэу Iоф адешIэ.
— Атлетикэ онтэгъумкIэ гъэ­хъагъэхэм уакъыфэкIоным пае Iоф зыдэпшIэжьын фае, мы спорт лъэпкъым ишъэфхэр къыз­IэкIэбгъэхьанхэм ыпэ пкIуачIэ упсыхьан фае. Спортышхом игъогу псынкIэп, лIыгъэрэ щэIэныгъэшхорэ ищыкIагъ. Зэнэ­къокъу пэпчъ хышхом иор фэд. Мыпшъыжьэу Iоф зыдэзышIэ­жьыхэрэр ыпэкIэ лъэкIуатэх, — еIо Хьалим.

Тренерым къызэриIуагъэмкIэ, кIэлэ ныбжьыкIэу Ордэкъо Астемир илъэс 16 ыныбжь. Илъэси 7 ыныбжьэу секцием хэхьагъ. Ыныбжь емылъыты­гъэу гъэхъэгъэшIухэр атлетикэ онтэгъум щешIы.
— Илъэси 10 сыныбжьэу апэрэ зэнэкъокъоу сыздэкIуагъэм текIоныгъэ къыщыдэсхыгъ. Сызгъэхьазырыгъэ тренерхэу Рэджэбрэ ащ ыужкIэ сыныбжь зыхэхъом Хьалимэрэ сафэраз. КъыкIегъэчи фэгъэкIуати ямыIэу ахэр къыздэлажьэх. СкIуачIэрэ сипсауныгъэрэ ащыублагъэу, сшыхэмрэ къэсщэчырэмрэ ащиухыжьэу гъунэ къыслъафы, анаIэ къыстет. Лыпцэхэмрэ къупшъхьэмрэ бгъэпытэнхэм фэшI илъэсыбэрэ уздэлэжьэн фае. ЩэIагъэ пхэмылъэу спортым илъэгапIэхэм уанэсын плъэ­кIыщтэп. Непэрэ мафэмкIэ Адыгеим ихэшыпыкIыгъэ командэ сыхэтэу Анапэ щыкIощт Спартакиадэм Анапэ щыIэщтым зыфэсэгъэхьазыры, — къы­Iуагъ Ордэкъо Астемир.
Илъэси 7 зыныбжь кIэлэцIыкIухэу секцием къакIохэрэм адэлэжьэрэ Хьагъур Рэщыдэ иIофшIэн псынкIэп.
— Тикъуаджэ мыщ фэдэ еджапIэ зэриIэм лъэшэу сырэгушхо. СыцIыкIоу сятэ спортым сыхищагъ, ащкIэ лъэшэу сы­фэраз. Ар сищысэтехыпI. Сырэ­гушхо непэ сыготэу сызэры­дэлажьэрэмкIэ. ТиеджапIэкIэ нэбгырэ 40-мэ зыщагъасэ. Ахэм ащыщхэу Ламыкъо Амир, Бырдж Айдэмыр, Ордэкъо Астемир, Бырдж Астемир, Анатолий Пугачевыр спортым имастер хъу­нымкIэ кандидатых. Тиспорт­смен ныбжьыкIэхэм гугъэпIэ инхэр къытатых. ТиеджапIэ игъэ­цэкIэжьынкIэ IэпыIэгъу къыт­фэхъугъэх тикъуаджэ къыщыхъугъэхэу Адыгэ Респуб­ли­кэм мэзхэмкIэ и ГъэIорышIапIэ ипащэу, АР-м атлетикэ онтэ­гъумкIэ ифедерацие итхьаматэу Былымыхьэ Рэщыдэрэ Санкт-­Петербург дэсэу, Iахьзэхэлъ обществэу «ПсэолъэшI трестым» ипащэу ХьакIэмыз Аскэррэ та­зэрэфэразэр ясIомэ сшIоигъу, — къыIуагъ Рэджэб.
Къоджэдэсхэр зэрыгушхохэрэ Хьалимэрэ Рэщыдэрэ ныбжьыкIэхэм щысэ афэхъух, ахэр ящыIэныгъэ гъогу псынкIэу теуцонхэм яIахьышIу халъхьэ.
Лъэпшъыкъо
Фатим.
Сурэтхэр: еджапIэм ихъарзынэщ, Iэшъынэ Аслъан.