Урысые Федерацием экономикэ хэхъоныгъэмкIэ иминистрэу Максим Решетниковым тхьамэтагъор зыщызэрихьэгъэ зэIукIэм пэIудзыгъэ шIыкIэм тетэу хэлэжьагъ Адыгеим и ЛIышъхьэу КъумпIыл Мурат.

ЗытегущыIэнхэм ащыщыгъэх шъолъыр­хэм ясоциальнэ-экономикэ хэхъоныгъэ иунэе программэхэр пхырыщыгъэнхэр, 2030-рэ илъэсым нэс къызэлъызыубытырэ унэе программакIэхэр ухэсыгъэнхэр.
ЗэIукIэр къызэIуихызэ Максим Решетниковым къызэрэхигъэщыгъэмкIэ, Урысыем и Президент а IофшIэныр зэрэкIорэм ынаIэ тырегъэты. УФ-м экономикэ хэхъоныгъэмкIэ иминистрэ къызэриIуагъэмкIэ, унэе программэхэр пхырыщыгъэнхэмкIэ хэгъэгум гъэхъэгъэ гъэнэфагъэхэр щашIыгъэх, пэрыт шIыкIэ-амалхэри щыIэх. Ащ дакIоу программэм иамалхэр къэралыгъо программэхэмрэ лъэпкъ проектхэмрэ зэшIохыгъэн­хэмкIэ Iофтхьабзэу зэрахьащтхэм ади­штэнхэ фае. АР-м хэхъоныгъэмкIэ унэе программэр 2024-рэ илъэсым нэс зэригъэцэкIагъэм осэшIу къыфашIыгъ. КъызэрэхагъэщыгъэмкIэ, мы программэм иамалхэр шIуагъэ къытэу Адыгеим ыгъэ­федэнхэ ылъэ­кIыгъ. Джыри зы мэхьанэ зиIэ лъэныкъо къыхагъэ­щыгъ: демографием ылъэныкъокIи Iоф­хэм язытет уигъэрэзэнэу щыт.
АР-м и ЛIышъхьэ зэIукIэм къыщыгущыIэзэ къызэриIуагъэмкIэ, Владимир Путиным унашъоу ышIыгъэм ишIуагъэкIэ Адыгеим илъэситфыкIэ узэкIэIэбэжьымэ IэпыIэгъум джыри нахь зегъэушъомбгъугъэ­ным иамал иIэ хъугъэ, хэхъоныгъэм иунэе программэ хэлажьэу ригъэжьагъ. А программэм республикэм иэкономикэ ихэхъо­ныгъэкIэ мэхьанэшхо иIагъ, Адыгеим социальнэ лъэныкъомкIи, иинфраструктурэ изэтегъэпсыхьанкIи ишIогъэшхо къэкIуагъ. А программэм сомэ миллиарди 5,1-рэ пэIухьагъ. БэшIагъэу зэтырихьэгъэ ыкIи анахь зыгъэ­гу­мэкIырэ Iофыгъохэу социальнэ лъэныкъохэмкIэ щыIэхэм а ахъщэр апэIуагъэхьагъ: псауныгъэм икъэухъу­мэнкIэ, культурэмкIэ, спортымкIэ уч­реждениехэр зыпкъ рагъэуцожьыгъэх, сабыибэ зэрыс унагъохэм къа­фыхагъэкIыгъэ чIыгу Iахьхэм инфраструктурэр аращэлIагъ. Ащ нэмыкIэу программэм къыдилъытэрэ сомэ мил­­лиарди 2,4-р промышленнэ паркы­шхоу «Инэм» зыфиIоу ашIырэм иинфраструктурэ пэIуагъэхьагъ.

Программэм къыдилъытэрэ ахъщэм щыщ газгощыпIэ станцием изэтегъэпсыхьан, къушъ­хьэлъэ чIыпIэхэм автомобиль гъо­гухэр ащыгъэ­цэкIэжьыгъэнхэм, къалэу Мыекъуа­пэкIэ псыхъоу Шъхьэгуащэ инэпкъхэм ягъэпытэн апэIуагъэхьагъ.
Программэм ишIуагъэкIэ бизнес цIыкIум­рэ гурытымрэ IэпыIэгъу аратыгъ, мэкъу­мэщ техникэр къащэфыным пае мэкъу­мэщ товархэр къэзышIыхэрэм ахъщэу агъэкIодыгъэр къафалъэгъу­жьыгъ, ахэм къахэкIэу инвестицие сомэ мил­лион 360-рэ Iофтхьабзэхэм апэIуагъэхьан алъэкIыгъ.
АР-м и ЛIышъхьэ къызэриIуагъэмкIэ, хэхъоныгъэмкIэ унэе программэм рес­публикэр зэрэхэлажьэрэм ишIуагъэкIэ гъэхъэгъэ гъэнэфагъэхэр ашIынхэ алъэ­кIыгъ: зэхэубытэгъэ продукциеу къахьы­жьырэм, цIыфхэм гурытымкIэ яхахъохэм, бюджетым къыхимыубытэрэ инвестициехэм ыкIи нэмыкIхэм нахь ахэхъуагъ, IофшIэнмыгъотыныгъэм къыкIичыгъ. ЩыIэныгъэм къыгъэлъэгъуагъ программэм шIуагъэу къытырэр. Президентым унашъоу ышIыгъэм ишIуагъэкIэ Адыгеим а программэм хэлэжьэн мурад джыри иI.
АР-м и ЛIышъхьэ Адыгэ Республикэм ихэхъоныгъэкIэ унэе программакIэм ипроект зэIукIэм хэлажьэхэрэр щигъэгъозагъэх. А проектыр 2025 – 2030-рэ илъэсхэм ателъытагъ, федеральнэ бюджетым щыщэу сомэ миллиарди 6 Iоф­тхьабзэхэм апэIухьащт.
Экономикэм ихэхъоныгъэ фытегъэ­псыхьэгъэ Iофтхьэбзи 7 зэкIэмкIи агъэ­нэфагъ. Бизнес цIыкIумрэ гурытымрэ IэпыIэгъоу аратыщтым, зекIонымрэ промышленностым илъэныкъо зэфэшъхьафхэм хэхъоныгъэ ашIыным анаIэ атырагъэтыщт. Ащ нэмыкIэу АПК-м IэпыIэгъоу ратырэр лъагъэкIотэщт: анахь гугъапIэхэр къэзытырэ лъэныкъохэм ащыщых хэтэрыкIхэмрэ пхъэшъхьэ-мы­шъхьэхэмрэ адэлэжьэгъэныр, цумпэ лъэпкъ зэфэшъхьафхэр къэгъэкIыгъэн- хэр. АР-м и ЛIышъхьэ къызэрэхигъэщыгъэмкIэ, унэе программэм къыдилъытэрэ Iофтхьабзэу 2030-рэ илъэсым ыкIэм нэс зэшIуахыщтхэм шIуагъэу къатыщтыр бэ – бюджетым къыхимыубытэрэ инвестициехэр, хэбзэIахьхэм къакIакIорэр нахьы­бэ хъущтых, ащ дакIоу IофшIэпIэ чIыпIакIэхэри бэу щыIэ хъущтых.
Адыгеим игъоу ылъэгъухэрэм атегущыIэхэ зэхъум 2025 – 2030-рэ илъэс­хэмкIэ программэм ипроект агъэцакIэ зыхъукIэ Максим Решетниковым респуб­ликэм игъо къыфилъэгъугъ унэе программэм къыдилъытэрэ Iофтхьабзэхэм язэшIохынкIэ бюджетым къыхимыубытэрэ къэкIуапIэхэр нахьыбэ шIыгъэнхэм анаIэ тырагъэтынэу. Ахэр республикэм иэкономикэ илъэныкъо шъхьаIэхэм джыри нахь хэхъоныгъэ ин зэрашIыщтым фытегъэпсыхьэгъэнхэ фае. Урысыем экономикэ хэхъоныгъэмкIэ и Министерствэ иIофышIэхэм республикэм иэкономикэкIэ гугъэпIэшIухэр зэрэщыIэхэр къыхагъэщыгъ, Адыгеим 2030-рэ илъэсым нэс зэхэубытэгъэ продукциеу къыхьыжьырэр процент 30-м нэсэу нахьыбэ хъущт.
«Программэм къыдилъытэрэ Iоф­тхьабзэхэр IэпыIэгъумкIэ нэмыкI амалхэм ягъусэу дгъэфедэщтых, ащ къыхеубытэх агъэкIэжьыгъэ лъэпкъ проектхэри. ЦIыфхэм ящыIакIэ на­хьышIу шIыгъэнымкIэ анахь мэхьанэ зиIэ социальнэ-экономикэ лъэныкъо­хэм тапэкIи хэхъоныгъэ ядгъэшIыщт. Тэ тыфэраз Президентэу Владимир Путиным Адыгэ Республикэм пае программэр джыри лъыгъэкIотэгъэным фэгъэхьыгъэ унашъо зэришIыгъэмкIэ. КIэщакIо тызыфэхъурэ Iоф­тхьабзэхэмкIэ ыкIи республикэм стратегическэ пшъэрылъхэр щызэшIохыгъэнхэмкIэ хэгъэгум и Правительстви IэпыIэгъу къызэрэтфэхъурэм пае тыфэраз», — къыIуагъ АР-м и ЛIышъхьэ.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет