ШышъхьэIум и 9-м тхылъыр зикIасэхэм я Дунэе мафэу хагъэунэфыкIы. Ащ ехъулIэу Адыгэ республикэ кIэлэцIыкIу тхылъеджапIэм иIофышIэу Жарэкъо Мариет Iофтхьабзэу ригъэкIокIыгъэм теблэгъагъ.

Социальнэ хъытыухэм, технологиякIэхэм дунаир зыщызэлъаштэгъэ лъэхъа­ным тхылъеджапIэхэмрэ тхылъ еджэнымрэ тIэкIу IугъэкIотыгъэ хъугъагъэх, ау аужырэ илъэсхэм щыIэныгъэм ахэр нахь къыхэуцожьыхэу аублагъ. Лъэпкъ проектэу «Культурэм» ащкIэ ишIогъэ­шхо къэкIо, ащ ихьатыркIэ Адыгеим модельнэ тхылъеджапIэхэр мымакIэу иIэхэ хъугъэ.
— Тхылъыр кIэлэцIыкIухэм яакъылкIэ гъомылэшIу мэхъу. Ахэр цIыкIухэзэ тхылъыр шIу алъэгъунымр ны-тыхэм Iоф дашIэн фае, — еIо Мариет. – Непэрэ Iофтхьабзэр тхылъыр зикIасэмэ я Мафэ фэгъэхьыгъ. КiэлэцIыкIоу мыщ къекIолIа­гъэхэм тхылъым имэхьанэ къа­фэтIотагъ, пшысэ хьалэмэтым хэтщагъэх.
Пшысэхэр зэрэзэтекIыхэрэр, ащ мэхьанэу яIэр къекIолIагъэхэм къафиIотагъ. Лъэпкъ музыкальнэ Iэмэ-псымэхэми нэIуасэ афишIыгъэх, шыкIэпщынэмрэ пхъэкIычымрэ лъэшэу ашIогъэшIэгъон хъугъэ. КIэлэцIыкIу пэпчъ шыкIэпщынэм мэкъамэ къыригъэIуагъ, пхъэкIычым теуагъ.
КIэлэцIыкIухэм аIэкIэ пшысэхэм япхыгъэу сурэтхэр ашIыгъэх, лъэпкъ Iэмэ-псымэхэр хабзыкIыгъэх, якIэсэ усэ цIыкIухэм адыгабзэкIэ къяджагъэх.

Непэрэ шапхъэхэм адиштэу кIэлэцIыкIу тхылъеджапIэр мэлажьэ, технологиякIэхэр яIофшIэн­кIэ агъэфедэх, кIэлэцIыкIу­хэм ямызакъоу, нахьыжъхэми ятворческэ амалхэр щаушэтынхэ алъэ­кIы. Ны-тыхэу кIэлэцIыкIухэм къада­кIо­хэрэми ашIогъэшIэгъонэу Iофтхьабзэхэм ахэщагъэхэ мэхъух. Мы мафэм видеотехыгъэхэр кIэлэцIыкIухэм къафагъэлъэ­гъуагъэх. Адыгэ пшысэ хьалэмэтым хаща­гъэх, джэгукIэ гъэшIэгъонхэм ахэлэжьагъэх.
— КIэлэцIыкIухэм тхылъым шIуагъэу пылъым гу лъябгъэтэн фае. Тхылъыр гъу­сэгъу дэгъу, цIыфым иIэпыIэгъу. Мурад шъхьаIэу Iоф­тхьабзэм иIагъэр кIэлэцIыкIухэм тхы­лъыр шIу ядгъэлъэ­гъуныр ары. АдыгабзэкIэ ахэр еджэнхэм къыфэтэщэх. Илъэсым къыкIоцI джыри бэ гъэшIэгъонэу кIэлэцIыкIухэм къя­жэрэр.
ТхылъеджапIэм тхылъыкIэхэр, журналхэр къы­IэкIэхьагъэх, сурэт зэмышъогъу­хэр къызэбэ­кIырэ хэутыгъакIэхэр агъоты­гъэх. Тхылъеджэ цIыкIухэр ана­хьэу къызкIэупчIэхэрэм ахэр ащы­­щых. Тхылъыр зикIасэхэм ти­пчъэ афызэIухыгъ, — еIо Мариет.
Ныдэлъфыбзэм изэгъэшIэн унагъом къыщежьэ. НыбжьыкIэхэм тхылъыр якIасэмэ, лIэужым титарихъ ышIэщт. Ахэр ары неущырэ мафэр лъызыгъэ­кIотэщтхэр. Ары мыщ фэдэ Iофтхьабзэхэм пIуныгъэ мэхьанэшхо яIэу зыкIалъытэрэр.
Лъэпшъыкъо
Фатим.
Сурэтхэр авторым иех.