ДзюдомкIэ Континентальнэ лигэм иапэрэ едзыгъо Мыекъуапэ щырагъэкIокIыщт. Физкультурникым и Мафэ ехъулIэу шышъхьэIум и 10-м ар зэхащэщт.

Iофтхьабзэр Адыгэ къэралыгъо университетым иордэунэу Кобл Якъубэ ыцIэ зыхьырэм щыкIощт. Лигэм дивизиони 4 хэхьэ. Мые­къуапэ щыкIощтым дивизионэу «Кавказым» хэтхэр щызэIукIэщтых, ащ цIэ тедзэу иIэр «Олимпийскэ чемпионэу Беслан Мудрановым и Кубок». Урысыем и Къыблэ иклубнэ команди 8-мэ ыкIи IэкIыб къэралыгъо благъэ­хэм ядзюдоист анахь лъэшхэр зэбэныщтых. ХэшыпыкIын едзы­гъом ыуж дивизион пэпчъ икомандэ анахь лъэшитIу къэ­нэфэщт ыкIи ахэр лигэм ифинал щызэIукIэщтых. Зэ­хэщакIохэм къызэраIуагъэмкIэ, апэ­рэ уцугъом ишIу­хьафтын фонд сомэ миллиони 5,6-рэ мэхъу, лигэм ифинал — сомэ миллиони 6.

ПэшIорыгъэшъ едзыгъом ящэнэрэ чIыпIэр къыщыдэзыхыгъэ командэ­хэр финал цIыкIум щызэIукIэщтых, ащ ишIухьафтын фонд сомэ миллион зэрэхъурэр.
Турнирыр шышъхьэIум и 10-м пчэдыжьым сыхьатыр 9-м рагъэ­жьэщт, финал зэIукIэгъур мафэм сыхьатыр 5-м. ЗэхэщакIохэм мыщ шъурагъэблагъэ, узэрэчIэхьащтым ыпкIэ лъыптыщтэп.