Теннис цIыкIум зыфэбгъэсэным ыкIи ащ епхыгъэ зэнэкъокъухэр зэхэщэгъэнхэм афытегъэпсыхьэгъэ спорт оборудованиер Адыгеим къыIэкIэхьагъ. Урысыем теннис цIыкIумкIэ ифедерацие къытIупщыгъэ сомэ миллиони 2,5-рэ фэдиз ащ пэIуагъэхьагъ.

КъызэраIуагъэмкIэ, теннис стол 12 къащэфыгъ, зым сомэ мини 150-рэ ыуас, мы спорт лъэпкъым зыфэбгъэсэнымкIэ оборудование зэфэшъхьафхэр ахэм ягъусэх.
Шъолъыр ыкIи къэралыгъо мэхьанэ зиIэ зэнэкъокъухэм тиспорт­сменхэм зэрифэшъуашэу зафагъэхьазырыным мыр фэIорышIэщт, материальнэ-техническэ базэр нахь зэтегъэпсыхьагъэ хъущт. Мы спорт лъэпкъыр зыгу рихьырэ ныбжьыкIэхэм ыкIи республикэм щыпсэухэрэм гъэхъагъэхэр ашIынхэмкIэ джыри нахь амалышIухэр аIэкIэлъ хъущт, IэпыIэгъум сыд фэдэрэ лъэныкъокIи ишIогъэшхо къэкIощт.
Къэлэ спорт еджапIэм зыщызыгъэсэрэ кIэлэцIыкIухэм янэ-ятэхэм яшIуагъэкIэ оборудованиякIэр аугъоигъах ыкIи шышъхьэIум и 20-м щегъэжьагъэу и 25-м нэс республикэм икъэлэ шъхьаIэ щызэхащэщт зэIухыгъэ зэнэкъокъум ахэр щагъэфедэщтых.