Лэжьыгъэ дэгъу къытыным дэлажьэх
Мы илъэсым Адыгеим пындж гектар мини 9-м ехъу щапхъыгъ. Лэжьыгъэ дэгъу къахьыжьыным пынджлэжьхэр дэлажьэх, ащкIэ ищыкIагъэр зэшIуахы. Ау анахь шъхьаIэр псэу рагъэгъотырэр ары.
Адыгеямелиоводхозым иIофышIэхэм къызэраIорэмкIэ, пындж хьасэхэм псыр икъоу ягъэгъотыгъэным фэшI гъэлъэшыгъэ шIыкIэм тетэу Iоф ашIэным фэхьазырых. Псыр къычIэзыщырэ станциехэм Iоф ашIэ, ащ ишIуагъэкIэ псэу зыщыкIэхэрэр лэжьыгъэхэм аIэкIагъахьэ. Адыгэ ыкIи Афыпсыпэ псыубытыпIэ шъхьаIэхэм агъэфедэрэ техникэм зэрифэшъуашэу пшъэрылъхэр егъэцакIэх.
— Шэуджэн районыр пштэмэ, псыхъоу Лабэ ипсырыкIуапIэхэр экскаваторкIэ агъэкъабзэ, джащ фэдэу Красногвардейскэ ыкIи Тэхъутэмыкъое районхэм (Шапсыгъэ псыIыгъыпIэм) мэфэ заулэ хъугъэу мыщ фэдэ IофшIэнхэр ащэкIох. Пындж хьасэхэм игъом псыр арагъэгъотыным мы пстэури фэIорышIэ, — къыщаIуагъ АР-м мэкъу-мэщымкIэ и Министерствэ.