«Илъэсым иунагъу» зыфиIорэ Урысые зэнэкъокъум текIоныгъэ къыщыдэзыхыгъэхэр бэмышIэу къэнэфагъэх. Анахь дэгъоу къыхахыгъэхэм ащыщ Адыгеим щыщ Колесниковхэм яунагъо. Шъолъыр зэнэкъокъухэм текIоныгъэ къащыдэзыхыгъэ унэгъо 388-рэ ащ хэлэжьагъэх, ахэр Урысые Федерацием ишъолъыр 88-мэ къарыкIыгъэх.

Зэнэкъокъур лъэныкъуитфыкIэ зэтеутыгъэу кIуагъэ. «Шэн-хабзэхэр зыухъумэрэ унагъу», «Унэгъо Iужъу», «Къоджэ псэупIэм щыпсэурэ унагъу», «Унэгъо ныбжьыкI», «Дышъэ унагъу». Джэджэ районым щыщхэ Колесниковхэм Викторрэ Светланэрэ «Шэн- хабзэр зыухъумэрэ унагъу» зыфиIо- рэ лъэныкъомкIэ текIоныгъэ къыда­хыгъ.
Адыгэ къэралыгъо университетым ипресс-къулыкъу къызэритыгъэмкIэ, Колесниковхэм ялъэужищымэ кIэлэ­егъэ­джэ сэнэхьатыр къыхахыгъ. Виктор 1995-рэ илъэсым Адыгэ къэралыгъо университетым физическэ гъэсэ­ныгъэм­кIэ ифакультет къыухыгъ, гурыт еджапIэм ОБЖ-мкIэ кIэлэегъаджэу Iоф щешIэ. Ишъхьэгъусэ Адыгэ къэралыгъо кIэлэ­егъэджэ институтым естествознаниемкIэ ифакультет 1992-рэ илъэсым къыухыгъ. ХимиемкIэ ыкIи биологиемкIэ кIэлэегъа­джэу ыкIи пIуныгъэ IофымкIэ пащэм игуадзэу Iоф ешIэ. Ащ янэ 1965-рэ илъэсым Кировскэ къэралыгъо кIэлэ­егъэджэ институтыр къыу­хыгъ ыкIи ищыIэныгъэ гъогу кIэлэегъэджэ сэнэхьатым рипхыгъ. Викторрэ Светланэрэ япшъашъэу Аринэ Адыгэ къэралыгъо университетым естествознаниемкIэ ифакультет иящэ­нэрэ къурс ис, нахьыжъхэм ялъагъо рыкIон гу­хэлъ иI.
Урысые зэнэкъокъоу «Илъэсым иунагъу» зыфиIорэм текIоныгъэ къыщыдэзыхыгъэхэм чъэпыогъум и 18-м Москва ащыфэгушIощтых.
Шъугу къэдгъэ­кIыжьын, мы зэнэ­къокъур я 9-у зэхащэ. Урысые Фе­дерацием IофшIэнымкIэ ыкIи социальнэ къэухъумэнымкIэ и Министерствэ, щыIэныгъэм чIыпIэ къин ригъэуцогъэ кIэлэцIыкIу­хэм IэпыIэгъу языгъэгъотырэ Фондыр, УФ-м ишъолъырхэм ащыIэ гъэцэкIэкIо хэбзэ къулыкъухэр Iофтхьабзэм кIэщакIо фэхъугъэх.
Лъэпкъ проектэу «Демографием» къыдыхэлъытагъэу ар зэхащэ, унагъом имэхьанэ къэIэтыгъэным фэIорышIэ.