Адыгеим истудентхэм я Ассоциацие игъунапкъэхэм заушъомбгъугъэу, къэралыгъом икъэлэ зэфэшъхьафхэм ащеджэхэрэр джы зэрепхых.

ТапэкIэ Москва иеджапIэхэм ачIэсхэр ащ хахьэщтыгъэхэмэ, джы Санкт-Петербург, Ростов- на-Дону, Ставрополь, Саратов ащеджэхэрэри зыхащэх, Краснодар дэсхэри чанэу яIофшIэн хагъэлажьэх.
НыбжьыкIэ политикэм ылъэныкъокIэ Iофэу ашIэрэм исоциальнэ нэкIубгъохэм ягугъу къыщишIыгъ Адыгеим и ЛIышъхьэу КъумпIыл Мурат. ТичIыгогъу ныбжьыкIэхэу Урысыем икъэлэшхохэм ащеджэхэрэм ямыза­къоу, Iоф ащызышIэхэрэри зэ­хэхьанхэм, къэралыгъом, респуб­ликэм, лъэпкъым къафэфедэщт Iофыгъохэм афэлэжьэнхэм пае зэшIуахырэм ар къытегущыIагъ. НыбжьыкIэ политикэм ипхырыщынкIэ IэпыIэгъушIу хъурэр Адыгеим истудентхэм я Ассоциациеу Адыгеим и ЛIыкIо Гъэ­IорышIапIэу Москва дэтым дэжь щылажьэрэр ары.

БлэкIыгъэ зыгъэпсэфыгъо мафэхэм Рыфабгъо ипсыкъечъэххэм джащ фэдэу Ассоциацием IофышIэхэмкIэ (кадровэ) иеджапIэ имэфиплI егъэджэнхэр щыкIуагъэх. Гъэсэныгъэм епхыгъэ едзыгъохэр ащ къыдыхэлъытэгъагъэх, ныбжьыкIэхэр нахь благъэу нэIуасэ щызэфэхъугъэх, Iофтхьэбзэ зэфэшъхьафхэм язэхэщэнкIэ, зыщеджэхэрэм зэчIыгогъухэм язэхахьэхэр зэращызэхэпщэщтхэмкIэ шIэныгъэхэр зэрагъэгъотыгъэх.
Адыгеим истудентхэм я Ассоциацие илъэсрэ ныкъорэкIэ узэкIэIэбэжьмэ зэхащэгъагъ, нэбгырэ 40 фэдиз ащ хэт. Лъэныкъо зэфэшъхьафхэм атегъэпсыхьэгъэ проектхэр мыхэм щыIэныгъэм щыпхыращых, Адыгеим щызэхащагъэри ахэм зэу ащыщ.
Хьэпэе Рэдэд, Адыгеим истудентхэм я Ассоциацие IофышIэхэмкIэ иеджапIэ изэхэщакIу:
— НыбжьыкIэхэр хэбзэ, бзэ Iофхэм апылъынхэм мэхьанэшхо иI. Адыгэмэ зэраIоу, тызэкъотмэ – тылъэш! Ары имэхьанэ мы еджапIэу зэхэтщагъэм.

Арина Гузенко, Адыгеим истудентхэм я Ассоциацие IофышIэхэмкIэ иеджапIэ изэхэщакIу:
— Ти Ассоциацие иIофшIэн къыхиубытэу проект зэфэшъхьафхэр тэгъэцакIэх. ГущыIэм пае, «Чэщ зэхэс»; лекциехэм къызщяджэхэрэр, мыхэм ащытегущыIэх адыгэхэр модэм зэрэхэтхэм, генетикэ Iофыгъохэм… ЕджэпIэ зэфэшъхьафхэм ачIэсхэр зэхахьэхэшъ, лъэныкъоу зэреджэхэрэм елъытыгъэу яшIэныгъэхэм нэмыкIхэр ащагъэгъуазэх.
Рыфабгъо щырагъэкIокIыгъэ егъэджэн гъэшIэгъонхэр ныбжьыкIэхэм агу къызэринэжьыщтхэм имызакъоу, ежьхэми ашIэшъущтымкIэ яцыхьэ зытелъыжь ашIыгъэх.

Елгъэр Инал, къалэу Налщык щыщ, Саратов дэт юридическэ Академием ия 4-рэ курс щеджэ:
— Тыди щыщ адыгэхэм тызэрагъэшIагъ, пстэуми тызэдэIэпыIэжьэу, тызэкъотэу тыпсэунэу ары мы Iофтхьабзэм тызфищэу слъытэрэр. Саратов зызгъэзэжьыкIэ, мыщ фэдэ зэхахьэ щызэхасщэ сшIоигъу. Мары мэфэ заулэу тызыщыIэм тыфагъэсагъ ар зэрэпшIыщтым, акъылыгъэ хэлъэу укъызэрекIолIэщтым, епхьылIэн фаехэм. Пстэури дгъэцакIэмэ, мыдэеу ар тиеджапIэхэу тызчIэсхэм ащыпхырытщышъущт.

НыбжьыкIэхэр еджэгъэ къодыехэп, зэрэгъэчэфыгъэх, адыгэ культурэм епхыгъэ Iофтхьабзэхэм ахэлэжьагъэх, республикэм ичIыопс идэхагъэ зэрагъэлъэгъугъ.
«Сицыхьэ телъ IофшIэкIэ амалэу кадровэ еджапIэм щызэрагъэгъотыгъэр студентхэм зэкIэми яобщественнэ IофшIэнкIэ къызэрашъхьапэщтым, зэшIуахыщтыбэмкIэ егъэжьапIэ зэрафэхъущтым. Тэ талъэныкъокIэ тапэкIи IэпыIэгъу тафэхъущт тиныбжьыкIэхэм социальнэ гукъэкIэу яIэхэр пхыращынхэмкIэ, такъотыщт, дгъэдэIощтых», — къытхыгъ КъумпIыл Мурат.
МэшIодз Саид