УФ-м и Президентэу Владимир Путиным иунашъохэм къадыхэлъытагъэу Адыгеим гъэсэныгъэм ихэхъоныгъэ ылъэныкъокIэ IофшIэнхэр лъагъэкIуатэх. Мы илъэсым еджэпIитфымэ яшIын аухынэу агъэнафэ — Мыекъуапэ, Тэхъу­тэмыкъое ыкIи Мыекъопэ районхэм.

Мыекъопэ районым ипсэупIэу Табачнэм дэтыр ахэм зэу ащыщ. Мыщ еджапIэу щашIырэм псэолъэшIын IофшIэнхэр зэрэщыкIохэрэм тыгъуасэ зыщигъэгъозагъ КъумпIыл Мурат.
IофшIэгъу дэкIыгъом джащ фэдэу хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет и Тхьаматэ игуадзэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, АР-м мэкъу- мэщымкIэ иминистрэу Къуанэ Анзаур, муниципальнэ гъэпсыкIэ зиIэ Мыекъопэ районым ипащэу Михаил Марьиныр, «Стройзаказчикым» ипащэу Хьаджымэ Аслъан, пшъэдэкIыжь гъэнэфагъэ зиIэ обществэу «Марк-Сервисым» игенеральнэ пащэу Цуекъо Мурат.

ПсэупIэу Табачнэм щашIырэ унэр Мыекъопэ районым гъэсэныгъэмкIэ и Гупчэу N 2-м хэхьэ. Ар нэбгырэ 250-мэ ателъы­тагъ ыкIи къэралыгъо программэу «Къо­джэ псэупIэхэм лъэныкъо зэфэ­шъхьаф­хэмкIэ хэхъоныгъэ ягъэшIыгъэныр» зыфиIорэм къыдыхэлъытагъэу агъэпсы. ПсэолъэшIыныр зыщыкIорэ чIыпIэм зеблагъэм, Адыгеим и ЛIышъхьэ уасэ афишIыгъ IофшIэнхэр зэрэзэшIуа­хырэм идэгъугъэрэ ипсынкIагъэрэ.
Къатищ хъурэ унитIоу зэпырыкIыпIэр азыфагу зыдэтхэр зэтыралъхьэгъах. Мыхэм къадыхэлъытагъэх кабинетхэр, егъэджэн-къыдэгъэкIын пщыпIэхэр, спорт ыкIи актовэ залхэр, клуб ыкIи кружок IофшIэным телъытэгъэ псэуалъэхэр, тхылъеджапIэр, шхапIэр, IэзапIэр, IэпыIэгъу псэуалъэхэр.
Джащ фэдэу еджапIэм къыпэIулъэу спортым зыщыпылъыщтхэр ыкIи зызщагъэпсэфыщтхэ чIыпIэхэр агъэпсыщтых. Пстэуми атефэщтыр сомэ миллион 416-м ехъу. Джырэ уахътэм псэолъэшIхэм унэ­кIоцI IофшIэнхэр агъэцакIэх, инженер псэуалъэхэр ращэх, чэур агъэуцу, еджа­пIэм ищагу зэтырагъэпсыхьэ. Анахьэу анаIэ зытырагъэтыщтыр Хэгъэгу зэошхом хэлэжьэгъэ ячIыпIэгъу дзэкIолIхэм ясаугъэтэу шIэжь ыкIи патриотическэ зэхахьэхэр зыщашIыхэрэм игъэкIэжьын.

Мы илъэсым ыкIэ нэс IофшIэнхэр зэкIэ къызэраухыщтхэр псэолъэшIхэм къаIуагъ. Табачнэм щыпсэухэрэмкIэ еджэпIакIэм икъызэIухын бэрэ зэжэгъэ­хэ хъугъэ-шIагъэу хъущт, сыда зыпIокIэ тапэкIэ ар зычIэтыгъэр жъы хъугъагъэ. Мы Iофыгъор АР-м и ЛIышъхьэ изэнкIэ зэдэгущыIэгъухэм ащыщ къыщаIэты­гъагъ. КъумпIыл Мурат чIыпIэхэм ащыпсэу­хэрэм зэIукIэгъухэр адыриIэхэ зэхъум, зэкIэми апэу зэшIохыгъэн фэе Iофыгъо­хэр агъэнэфэгъагъэх ыкIи ахэм ягъэцэкIэн ыуж ихьагъэх. Мыхэм ащыщ хъугъэ жъы хъуи Iуахыжьыгъэм ычIыпIэкIэ еджэпIакIэм ишIыни. Джырэ уахътэм Табачнэм щыпсэурэ кIэлэцIыкIухэр гъунэгъу псэупIэу Краснооктябрьскэм иеджапIэ ащэх. ИлъэсыкIэм къыщыублагъэу ахэр джы япсэупIэ дэмыкIыхэу лъэхъаным диштэрэ еджэпIакIэм гъэсэныгъэ щызэрагъэгъотын алъэкIыщт, мыщ егъэджэныр зыкI гъэсэныгъэм ипредмет пстэухэмкIэ щызэхащэщт (а 1 — 9-рэ классхэр), джащ фэдэу очнэ-заочнэ егъэджэныр (я 10 — 12-рэ классхэр); коррекционнэ класситIуи зэхащагъ.

Тыгъуасэ псэолъэшIыныр къыплъыхьэзэ КъумпIыл Мурат пшъэрылъхэр афишIыгъэх IофшIэнхэм япIалъэрэ ядэгъугъэрэ афэгъэхьыгъэу, социальнэ объектхэм яшIынкIэ IофшIэкIэ амалэу къаIэкIэхьагъэм елъытыгъэу шэпхъэшIу­хэр нахь къыхахыхэзэ псэунхэу. Адыгеим и ЛIышъхьэ афигъэпытагъ IофшIэнхэр зэдагъэцэкIэнхэу: еджапIэм лъэхъа­ным диштэрэ псэуалъэхэр ыкIи оборудованиер чIагъэуцозэ къыпэIулъ чIы­на­лъэ­ри зэтырагъэпсыхьанэу, ар зэрэнэфынэщтым, транспортыр къызэрэIухьащтым анаIэ атырагъэтынэу.

«УФ-м и Президентэу Владимир Путиным иунашъоу гъэсэныгъэм хэхъоныгъэ егъэшIыгъэным зэкIэлъыкIоу тыдэлажьэ. Къэралыгъо программэхэм, лъэпкъ проектэу «Гъэсэны­гъэм», «Единэ Россием» ипартийнэ проектхэм яамалхэр анахь шIуагъэ къатэу дгъэфе­дэнхэм тыпылъ. Федеральнэ IэпыIэгъум ишIуагъэкIэ охътэ благъэм еджэпIэ чIыпIэхэм бэу къахэхъощт ыкIи щыIэхэр нахь хъоо-пщау хъущтых. Мыщ дэжьым тыпылъ къалэми, къоджэ псэупIэхэми егъэджэнымкIэ амалэу яIэхэр зэфэдэ тшIынхэм. Мы IофшIэным изэфэхьысыжьхэм ащыщ джыри шIэхэу къэтлъэгъущт — Табачнэм илъэсым ыкIэ нэс кIэлэцIыкIухэм яегъэджэн, шIэныгъэ, пIуныгъэ дэгъу агъотыным апае лъэхъаным диштэрэ амалхэр иIэхэ хъущт. ТэркIэ апшъэу щыт республикэм исыд фэдэрэ чIыпIи цIыфхэм ящыIэныгъэ шэпхъэшIухэм адиштэу щыдгъэпсыныр», — къыхигъэщыгъ КъумпIыл Мурат.

АР-м ипресс-къулыкъу къытIэкIигъэхьэгъэ къэбарымкIэ.