Мыекъопэ къэралыгъо технологическэ университетым программэу «Фермерым иеджапI» зыфиIорэм изэфэшIыжьын щыкIуагъ. А программэр зыкIугъэхэм пхъэшъхьэ-мышъхьэхэм якъэхьыжьынкIэ ыкIи былымхъуным зегъэушъомбгъугъэнымкIэ яIэпэIэсэныгъэ зэрэхагъэхъуагъэр къэзыушыхьатырэ дипломхэр къаратыжьыгъэх.

Сыхьат 250-м программэр телъытагъэу щытыгъ, теориемкIэ — сыхьати 150-рэ, хэушъхьа­фыкIыгъэ дисциплинэ зэфэ­шъхьаф­хэмкIэ — сыхьати 100. Анахь лъэшэу анаIэ зытырагъэ­тыгъэр практикэр ары.
Апшъэрэ еджапIэм иIофы­шIэхэм къызэрэхагъэщыгъэмкIэ, Адыгэ Республикэм иагропромышленнэ комплекс ихэхъоныгъэкIэ мэхьанэшхо зиIэ Iоф­тхьабзэу щыт «Фермерым иеджапIэ». Ащ дакIоу гъэхъагъэ хэлъэу фермер хъызмэтшIапIэхэр зэхэщэгъэнхэмкIи ар амалышIу.
2021-рэ илъэсым къыщегъэ­жьагъэу Адыгэ Республикэм а программэр щыпхыращы. Лъэныкъуищмэ: Мыекъопэ къэралыгъо технологическэ университетым, АР-м мэкъу-мэщымкIэ и Министерствэ ыкIи Iахьзэ­хэлъ обществэу «Россельхозбанкым» зэдашIыгъэ зэзэгъыныгъэм тетэу ар агъэцакIэ. Фермер хъызмэтшIапIэр нахь шIогъэ ин хэлъэу зещэгъэным ар фытегъэ­псыхьагъ, пхъэшъхьэ-мышъхьэ­хэр къэгъэкIыгъэнхэмкIи, бы­лымхъуным (мыщ хэхьэх щэмрэ лымрэ къэзытыхэрэр) хэхъоныгъэ егъэшIыгъэнымкIи ащ ишIуа­гъэ къэкIощт.
— IофшIэныр езыгъэжьэгъэ­кIэ фермерыбэ мыщ щеджагъ. 2021-рэ илъэсым нэбгырэ 25-мэ яIэпэIэсэныгъэ зэрэхагъэ­хъуагъэр къэзыушыхьатырэ дипломхэр къаратыжьы­гъэх. 2022-рэ илъэсым ахэм нэбгырэ 35-рэ къахэхъуагъ. 2024-рэ илъэсым нэбгырэ 43-мэ яшIэныгъэхэм ахагъэхъуагъ, ахэм ащыщэу 25-р зыфытегъэпсы­хьагъэр пхъэшъхьэ-мышъхьэ­хэм ядэлэжьэн, 10-р — бы­лымхъуным изегъэ­ушъом­бгъун, нэбгыри 8-мэ сертификатхэр къаратыжьыгъэх курсыр къызэраухыгъэм ишы­хьатэу, — къытыгъ МКъТУ-м ипресс-къулыкъу.