Бердиев Исмахьил-хьаджэм идунай зэрихъожьыгъэм фэшI Адыгеим ыкIи Пшызэ шъолъыр ябыслъымэнхэм я Дин­дэ­лэжьапIэ ыкIи АР-м и ЛIышъхьэ ащ иIахьылхэм афэтхьа­усыхагъэх.
Темыр Кавказым ислъам диным зыкъыщиIэтыжьыным Бердиевым иIахьышхо хилъхьагъ. Къэрэщэе-Черкес Рес­публикэм имуфтиеу ыкIи Темыр Кавказым ибыслъымэнхэм я Координационнэ гупчэ итхьаматэу илъэс пчъагъэхэм Iоф ышIагъ. Лъэпкъ зэфэшъхьафхэм ыкIи дин зэмылIэужыгъохэр зылэжьыхэрэм язэгурыIоныгъэ игъэпытэн Исмахьил-хьаджэр ишъыпкъэу дэлэжьагъ.
— Исмахьил Алый ыкъом ищыIэныгъэ гъогу Хэгъэгум псэемыблэжьэу узэрэфэлэжьэн фаем ищысэтехыпI. Ислъам диным ищыIэныгъэ фигъэшъошагъэу, Къэрэщэе-Черкесым, Темыр Кавказым ямызакъоу, зэрэ Урысые Федерациеу лъэпкъ ыкIи дин зэшIуныгъэ арылъыным фэлэжьэгъэ динлэжь пэрытэу ар щытыгъ. Тикъэралыгъо ибыслымэнхэм ащ лъытэныгъэшхо фашIыщтыгъ, ныбжьыкIэхэр пIугъэнхэм, шэн-хабзэхэр къэухъумэгъэнхэм ишъыпкъэу адэлэжьагъ. Адыгеим щыпсэухэрэм ацIэкIи сэ сшъхьэкIи Бердиев Исмахьил иIахьыл-благъэхэм сафэтхьаусыхэ, идунай зэрихъожьыгъэр тыгу къео. Игунахьхэр фигъэгъунэу, ишIушIагъэхэр фигъэбэгъонэу Тхьэм телъэIу, — къыщеIо АР-м и ЛIышъхьэ защыфэтхьаусыхэгъэ тхыгъэм.