Урысые Федерацием и Федеральнэ ЗэIукIэ Владимир Путиным фигъэхьыгъэ Джэпсалъэм къыщиIогъагъэхэм ащыщ Урысые Федерацием щыпсэурэ лъэпкъхэм якультурнэ кIэн хэхьэрэ псэуалъэхэм якъызэтегъэнэжьынкIэ охътэ кIыхьэм телъытэгъэ программэ зэхэгъэуцогъэн зэрэфаер.

Мы лъэныкъом лъэшэу анаIэ зэрэтетыр ыкIи Мыекъуапэ итарихъ теплъэ зыпкъ игъэуцожьыгъэнымкIэ Iофыгъохэр зэрэзэшIуахыхэрэр исоциальнэ нэкIубгъохэм къащитхыгъ Адыгеим и ЛIышъхьэ. Ащ зэрэхигъэунэфыкIыгъэмкIэ, Пушкиным ыцIэ зыхьырэ лъэпкъ унэр, шъобжхэмкIэ IэзапIэр зычIэтыгъэ тарихъ унэм ышъхьэ, пчыхьэ еджапIэу N 1-р игъэкIотыгъэу агъэцэкIэжьыгъахэх.
Джащ фэдэу гъэцэкIэжьын куухэр ащашIых псы IэзапIэм ыкIи медицинэ колледжым, концерт гъэлъэгъуапIэу «Налмэсым». Мыр культурнэ кIэным иунэу щымытми, архитектурнэ ыкIи тарихъ мэхьанэ зиIэу алъытэ. УФ-м зыкъэухъумэжьынымкIэ и Министерствэ IофшIэнхэр щырегъэкIокIых шъолъыр мэхьанэ зиIэ культурнэ кIэным хэхьэрэ унэу «Зиньковецкэм и УнэкIэ (офицерхэм я Унэ)» заджэхэрэм.
Мыхэм анэмыкIэу джырэ уахътэм проект-сметэ тхылъхэр агъэхьазырых джыри унэ заулэу зитарихъ теплъэ зэрагъэгъотыжьыщтхэм — республикэ гъэзетхэр зычIэтхэу Альтшулерым иуц щапIэщтыгъэр, къэлэ гупчэм ит унитIоу кIэлэцIыкIу цэ IэзапIэр ыкIи хэгъэгу кIоцI IофхэмкIэ министерствэм икъулыкъухэм ащыщ зычIэтыгъэхэр.
«Ти Президент къызэрэкIигъэтхъы­гъэмкIэ, ижъырэ унэхэр – тилъэпкъ зэфэдэныгъэ, лIэужхэм язэпхыныгъэ янэпэеплъых. Сицыхьэ телъ Урысые Федерацием илъэпкъхэм якультурнэ кIэн икъызэтегъэнэн фэгъэхьыгъэ программакIэр тарихъ унэхэм ягъэкIэжьынкIэ IофшIэныр дгъэлъэшыным зэрэфэIорышIэщтым ыкIи мэхьэнэ ин зиIэ социальнэ, экономическэ пшъэрылъхэри зэшIохыгъэ зэрэхъущтхэм зекIоным, гъэсэныгъэм, культурэм, патриотическэ пIуныгъэм афэгъэ­хьыгъэхэу», — къытхыгъ КъумпIыл Мурат.