Адыгэ къуаер мыкIодэу бэрэ щылъыным иамал МКъТУ-м къы­щыхахыгъ. Тиреспубликэ къакIо­хэрэм ащыщыбэмэ километрэ мин пчъагъэкIэ ядэжь зыдащэным пае адыгэ къуаер къащэфы. Джы мэфэ пчъагъэрэ гъогум тетыщтхэми, ар зытетым тетэу къэбгъэ­нэжьыным иIоф нахь къызэрыкIо хъугъэ. Илъэс заулэрэ ащ Iоф дишIагъ аспирантэу Къудайнэт Саидэ, ащ игъусагъ инаучнэ Iэшъхьэтетэу Хьаткъо Зурет.
— Къуаер бэрэ щылъыным иамал къэзыты хъугъэр пшхыми зэрар къыозымыхыщт кIышъоу ащ фашIырэр ары. ПектинкIэ заджэхэрэ веществор ары нахьыбэрэмкIэ ар зыхашIыкIырэр. Ащ хэхьэх хэубэ зэфэшъхьафхэри. Ащ нэмыкIэу къэкIыхэрэм къа­кIафырэ псыри хагъахъо, — къе­Iуа­тэ МКъТУ-м имладшэ научнэ IофышIэу Къудайнэт Саидэ. — Пкъыгъо гъэнэфагъэу «дозаторкIэ» заджэхэрэр къызфагъэфедэзэ пектин зэхэгъэкIу­хьагъэр къое кIыIум тыралъхьэ. Ащ нэужым гъэгъушъэпIэ шкафым ралъхьэ. Сыхьатищым нахьыбэп а Iофым ыхьырэр. КIышъоу къуаем телъ хъугъэр цIыфымкIэ щынагъоп, къуаем изытети зэблихъурэп. Ащ мэхьанэшхо иI. Джырэ уахътэм диштэрэ технологиехэр щагъэфедэх ащ фэдэ кIышъом игъэхьазырынкIэ. Патентыр къаратыгъах. Мы шIыкIэр къыхэзыхыгъэхэм яцыхьэ телъ пшхынкIэ щынэгъон­чъэу щыт кIышъор нахь игъэкIотыгъэу гъэфедэгъэнымкIэ амал­хэр зэриIэхэм.