Адыгеим икъэлэ шъхьаIэ икIэу Кавказ биосфернэ заповедникым екIурэ гъогоу «А-159» зыфиIорэм щыщ апэрэ Iахьым игъэцэкIэжьын Мыекъопэ районым щырагъэжьагъ.

ТранспортымкIэ федеральнэ Министерствэм игъогу ГъэIорышIапIэу «Черноморье» зыфиIорэм ар епхыгъ. Ащ къызэрэщаIуагъэмкIэ, Iоныгъом и 1-м щыублагъэу и 20-м нэс псыхъоу Шэнтыкъо телъ лъэмыджым автомашинэхэр зэрэщызэблэкIыхэрэр «реверсивнэ» шIыкIэм тетэу агъэIорышIэщт.
— Мы псэуалъэр гъогу Iахьым хэхьэ. IофшIэнхэр ащ зыщыщыкIохэрэ уахътэм автотранспортым пае нэмыкI кIуапIэ гъэпсыгъэн амал щыIэп. Ащ фэшI мы шIыкIэр лъэмыджым щыгъэфедэгъэнэу мэхъу. Адрэ къанэрэм гъогу гъунэхэри къыхагъэхьанхэшъ щызэблэкIынхэ алъэкIынэу ашIыщт, — къыщаIуагъ ГъэIорышIапIэм.
АР-м и ЛIышъхьэ къызэрэхигъэщыгъэмкIэ, гъогум игъэцэкIэжьынкIэ шэпхъэшIухэм адиштэрэ шIыкIэхэр агъэфедэх. Транспортыр бэу зэрэщызэб­лэкIырэр къыдэлъытагъэу, илъэсыбэрэ зэщымыкъощт материалхэр гъогушIхэм агъэфедэх. Асфальт зэхэгъэчъыхьагъэу телъым имызакъоу, ащ ычIэгъ чIэлъ мыжъо жъгъэй зэхэлъыри зэблахъущт, инфраструктурэр агъэкIэжьыщт.
ПстэумкIи километри 10 агъэкIэжьыщтыр. Ащ ишIуагъэкIэ гъогум ущызекIоныр нахь Iэрыфэгъу ыкIи щынэгъончъэ хъущт.

— Мыр Адыгеим икъушъхьэ лъэныкъо зыгъэпсэфыпIэ чIыпIэу иIэхэм уязыщэлIэрэ гъогу закъоу щытышъ, цIыфэу тишъолъыр исхэми, хьакIэу къакIохэрэми мымакIэу агъэфедэ, — къыIуагъ АР-м и ЛIышъхьэу КъумпIыл Мурат.