Мыекъуапэ иIофшIэкIо купхэм я Спартакиадэ къыдыхэлъытэгъэ спорт лъэпкъи 4 ащ хэлажьэхэрэм къызэранэкIыгъ. БлэкIыгъэ зыгъэпсэфыгъо мафэхэм организацие зэфэшъхьафхэм ялIыкIохэр щэрыонымкIэ ыкIи теннис цIыкIумкIэ зэнэкъокъугъэх.
ЩэрыонымкIэ нахь къахэщыгъэхэр ХъокIо Маринэрэ Эдуард Чаусянскэмрэ. Теннис цIыкIумкIэ анахь лъэшыгъэх Оксана Шевченкэмрэ Андрей Чердакрэ. Командэхэм язэнэкъокъу пштэмэ, джырэ уахътэм апэрэ чIыпIэм щыт АР-м гигиенэмрэ эпидемиологиемрэкIэ и Гупчэ, Мыекъопэ къэлэ администрацием гъэсэныгъэмкIэ и Комитет ятIонэр, ящэнэрэ чIыпIэр еубыты республикэм икъэлэ шъхьаIэ инароднэ депутатхэм я Совет.

Спартакиадэм хэлажьэхэрэр, шышъхьэIум и 10-м физкультурникым и Урысые Мафэ ехъулIэу, дартсымрэ шахматхэмрэкIэ зэнэкъокъунхэу къафэнагъ.