«Хвастовня» зыфиIорэ я III-рэ Гъэмэфэ фестивалыр Адыгеим и Кощхьэблэ район щызэхащагъ. Урыс, адыгэ, къэзэкъ, таджик, ермэл лъэпкъхэм ящагу зэIухыгъэхэр псэупIэу Натырбые къыщызэIуахыгъ.

Анахь дахэр къыхахыным фэшI лъэпкъхэр зэнэкъокъугъэх, яшэн-хабзэхэр хэгъэгум шIу­лъэгъоу фыряIэр, унагъом зэфыщытыкIэу илъыр, лэжьыгъэм икъэгъэкIын фэгъэхьыгъэ десэхэр IэпэIасэхэм къагъэлъэ­гъуагъ. Общественнэ зэхахьэу «ЗекIо Адыгеир» зыфиIорэр ащ кIэщакIо фэхъугъ. ПсэупIэу Натырбые изыгъэпсэфыпIэ парк «Адыгэ макъэри» еблэгъагъ.
Кощхьэблэ район администрациер иIэпыIэгъоу общест­веннэ зэхахьэу «ЗекIо Адыгеим» Iофтхьэбзэ гъэшIэгъон зэ­­хищагъ. Республикэм ирайон зэфэшъхьафхэм къарыкIыгъэ нэбгырэ 300 фэдиз ащ хэлэ­жьагъ, чIыпIэ 20 зэхащагъ. Зэхахьэм къекIолIагъэх: Iэпэ­Iасэхэр, чIыгулэжьхэр, бжьа­хъохэр, былымахъохэр, пщэры­хьакIохэр, къоешIыхэр, зекIоным хэщагъэхэр, Iэпэщысэ зэ­фэшъхьафхэр зышIыхэрэр.
ХьакIэхэм апае концерт гъэ­шIэгъон, лъэпкъ зэфэшъхьафхэр зыхэлэжьэгъэ хоровод къашъор, ощх къещхыным фэгъэхьыгъэ «хьанцэгуащэр», лъэпкъ гъомылапхъэм ихэIэн ыкIи нэмыкI Iофтхьабзэхэр рагъэкIокIыгъэх. Зэхахьэм икIэщакIохэм заIудгъэкIагъ.
— Мыщ фэдэ Iофтхьабзэ ящэнэрэу зэхэтэщэ. Мыгъэ Кощхьэблэ районыр загъэпсыгъэр илъэс 90-рэ Натырбый илъэс 55-рэ зэрэхъурэм афэгъэхьыгъэу зэхахьэр зэхэтщагъ. Пшызэ шъолъырым ыкIи Адыге­им яIэпэIасэхэр непэрэ фестивалым къекIолIагъэх. Лъэпкъ зэфэшъхьафмэ яшэн-хабзэхэр къагъэлъагъо, Iэпэщысэхэм яшIын идесэхэр цIыфхэм лъэшэу ашIогъэшIэгъон. ТапэкIэ хъугъэ­шIэгъэ зекIоным ылъэныкъокIэ Iофтхьэбзэ гъэшIэгъонхэр зэхэтщэнхэу тыфай. НэмыкI зыгъэ­псэфыкIэ шIыкIэу щыIэхэр яд­гъэлъэгъу тшIоигъу, — къыIуагъ Адыгеим изекIо-къэ­барлъыгъэIэс гупчэ ипащэу Ольга Ивановам.

Егъэджэнхэм ахэлажьэхэрэр нэIуасэ зэфэхъугъэх, шъхьадж зыхэлажьэ шIоигъо Iофтхьабзэр ыгъэнэфагъ. Iофыр егъэжьагъэ хъунымкIэ лъэныкъоу къыдыхалъытэщтхэр зэхафыгъэх. Iэ­пэ­Iасэхэм ягуапэу десэхэр ра­гъэкIокIыгъ. Ащ хэлэжьэрэ нэ­бгырэ пэпчъ ыIэкIэ ышIыгъэр шIухьафтынэу къыратыжьыгъ.
— Iофтхьабзэу зэхэтщагъэм мурад шъхьаIэу иIэр хьакIэу Адыгеим къеблагъэхэрэм яд­гъэлъэгъущтым изэмылIэужы­гъуагъэ нахьыбэ тшIын фаеу зэрэщытыр ары. Джащ фэдэу цIыф гъэшIэгъонхэр, IэпэIэсэныгъэ ин зыхэлъхэр ядгъэшIэнхэр типшъэрылъ. Ащ ишIуагъэкIэ тишъолъыр зекIохэр нахьыбэу къетщэлIэщтых, — къыхегъэщы общественнэ зэхахьэу «ЗекIо Адыгеим» хэтэу, Iофтхьабзэм икIэщакIомэ ащыщэу Марина Мельник.
Джащ фэдэу зэхэщакIохэм пшъэрылъэу зыфагъэуцужьырэр зекIоным изегъэушъомбгъун республикэм ирайонхэр зэкIэ хэщэгъэнхэр ары. Непэ Мые­къопэ районыр зекIоным игуп­чэу алъытэми, хьакIэхэм гъэшIэгъоныбэ къуаджэхэми къащяжэ. Ахэм яамалхэр къэгъэлъэгъогъэнхэмкIэ ыкIи шъо­лъы­рым къихьэхэрэм адэлэ­жьэнхэм фэгъэхьазырыгъэн­хэмкIэ проектым ишIогъэшхо къэкIо. Непэ ащ чанэу хэлажьэ Кощхьэблэ районыр, анахьэу къуаджэхэу Еджэркъуай, Фэдз, Кощхьабл, псэупIэу Натырбые. Джырэ зекIом чIыопс закъор арэп шIогъэшIэгъоныр, шъолъы­рэу къыздэкIуагъэм щыпсэу­хэрэм ящыIэкIэ-псэукIэ, лъэпкъ шхыныгъоу щызэрахьэхэрэр зэригъэлъэгъухэ шIоигъу. Мыщ фэдэ Iофтхьабзэм зекIоным зиушъомбгъунымкIэ мэхьанэ­шхо иI. Адыгеим щыпсэурэ лъэпкъхэм зэгурыIоныгъэу азыфагу илъыр къекIолIагъэхэм аушэтын амал яIагъ. Кощхьэблэ районым зэхищэгъэ щагум иIанэ адыгэ хьалыжъохэр, хьакухьалыжъо­хэр, хьалыур, къурамбыйхэр ыкIи нэмыкIхэр къытырагъэу­цуагъэх. Ари зекIохэм уапэгъо­кIын зэрэплъэкIыщтым изы щыс.
Гъэ къэс фестивалым хэлэ­жьэрэ ЛIышэ Ахьмэд идесэхэр гъэшIэгъоныгъэх. Пхъэм псэ зэрыпытым ищысэхэр къари­гъэлъэгъугъ, пкъыгъо пэпчъ та­рихъ гъэнэфагъэу пылъыр къафиIотагъ. Егъэджэнхэр анахь гъэшIэгъонэу зэхищагъ, цIыфыбэ зэрищэлIагъ.

Илъэс 50 хъугъэу Адыгеим щыпсэурэ таджик лIыжъэу Рахьмэт иунагъо игъусэу Iэнэ дахэ къызэIуихыгъ. Таджикмэ ашIырэ пловыр, псыжъо хьалыжъор, къуае зыдэлъ хьакухьалыжъор хьакIэхэм апагъохыгъ. Анахьэу щай зэрешъохэрэ лъэпкъ хьа­къу-шыкъухэр нэм къыкIидзэщтыгъ.
Фестивалым изэхэщакIоу Ольга Ивановар Iофтхьэбзэ гъэшIэгъонэу «Открытки по всему миру» зыфиIорэм хэлэ­жьагъ. Ягупсэхэу къэралыгъо зэфэшъхьафхэм ащыIэхэм письмэ афатхын амал зекIохэм яIагъ.
Мыекъуапэ икIыгъэ Цукъо Светланэ ипхъорэлъф цIыкIу Адыгеим илъэпкъ зэфэшъхьаф­хэм яшэн-хабзэхэр ригъэлъэ­гъунэу къэкIуагъ.
— ЛIэужхэм ядгъэлъэгъурэ гъогум рыкIощтых. Щыгъыжъые зыблэрэми, Iэнэ хъурае пхъэм хэзышIыкIырэми, хьакухьалы­жъоу пщэрыхьакIом ыгъажъэрэми ауасэ къыткIэхъухьэхэрэм ашIэн фае. Зэхахьэ пэпчъ зы кIэ гъэшIэгъон горэ къыхэпхыщт, — къыIуагъ Цукъо Светланэ.
Фестивалэу «Зыщытхъужьыныр» «Къуаджэм къыще­жьэрэ Iофыгъохэм яеджапI» зыфиIорэ проектым къыды­хэлъытагъ. Апэрэ Iофтхьабзэр Джэджэ районым ипсэупIэу Гончаркэ кIымафэм щыкIуагъ, ятIонэрэр гъатхэм Мыекъопэ районымкIэ Каменномостскэм щыре­кIокIыгъ. Джы къэкIолъыкIощт бжыхьэм зэхащэщт.
Лъэпшъыкъо
Фатим.
Сурэтхэр авторым иех.