Адыгэ къужъым и Мафэ Мыекъопэ районым изыгъэпсэфыпIэу, зе­кIо­хэм якIэсэ чIыпIэхэм ащыщэу, псыкъефэхыпIэу Рыфабгъо дэжь илъэс 13 хъугъэу щыхагъэунэфыкIы.

ШышъхьэIум и 10-м мэфэкIыр аублэщт. Сыхьатыр 11-м Iуа­шъхьэм тет къужъ хатэм шIоигъоныгъэ зиIэ зекIохэр дэ­кIоещтых. Адыгеим, КъБР-м, КъЧР-м, Тыркуем, Ставрополь краим къарыкIыгъэхэр ащ хэлэжьэщтых. Адыгэ лъэпкъым ишэн-хабзэхэм, ишхынхэм, ита­рихъ ыкIи икультурэ нэIуасэ афэхъущтых.
Рыфабгъо къызщежьэрэ бгышъхьэм узыдэкIуаекIэ ижъы­рэ адыгэ къужъэе чъыгхэр хэ­тых. Анахьыжъым илъэс 250-рэ ыныбжьэу мэфэкIым изэхэща­кIохэм хагъэунэфыкIы. Къужъым и Мафэ изэхэщэн кIэщакIо фэхъугъэр компаниеу «Руфа-тур» ипащэщтыгъэу, этно­туризмэм тишъо-
лъыр зыщиушъомбгъуным ­ишъыпкъэу дэлажьэщтыгъэу Бибэ Мурат. Джы ишъхьэгъусэу Нуретрэ ыпхъухэу Заремэрэ Анерэ ятэ ипроект лъагъэкIуатэ.
Хабзэ зэрэхъугъэу, мэфэкIыр гъэшIэгъонэу зэхащэщт. ЫпэкIэ къызэрэтIуагъэу, ижъырэ адыгэ къужъхэм яплъынхэу Сырыфыбг зекIо куп дэкIоещт, къужъэу къапытэкъу­гъэхэр къашыпыщтых. ЗэхэщакIохэм мы чъыгым тарихъэу пылъыр къаIотэщт. ОрэдыIо-къэшъокIо купхэм мэфэкI концерт къатыщт, къужъым хэшIыкIыгъэ шхыныгъо зэфэ­шъхьафхэмкIэ хьакIэхэр агъэшIощтых, къужъыпс чъыIэр апа­­гъохыщт.
Iофтхьабзэм хэлэжьэнхэу шIоигъоныгъэ зиIэ пстэури зэ­хэщакIомэ рагъэблагъэх.