Республикэм иеджэпIэ анахьыжъхэм ащыщэу Адыгэ кIэлэегъэджэ колледжым лIэшIэгъу тарихъ къызэрэзэ­ри­нэ­кIыгъэр шIэхэу хигъэунэфыкIыщт.

Шэн-хэбзэшIу пытэхэр зыщыгъэу­цугъэхэу, джырэ лъэхъаным диштэрэ егъэджакIэм тетэу, шъхьэкIафэ къэзылэжьыгъэ кIэлэегъэджэ пэрытхэр зыщаугъоигъэхэ чIыпIэу мыр щыт.
КIэлэегъэджэ гъэсэныгъэм лъэхъан пэпчъ ежь пшъэрылъ гъэнэфагъэхэр къегъэуцух, кIэлэегъаджэр зэрыгъозэн фэе шапхъэхэр агъэлъэшых, ау мы колледжым щызэмыхъокIэу къанэрэр зы — зипредмет хэшIыкI фызиIэ специалистхэр къызэригъэхьазырхэрэм дакIоу, сабыйхэр шIу алъэгъунхэм фегъасэх. Къыдэхъугъэм къыщымыуцоу джыри ыпэ зэрэригъэхъущтым ыуж ит.
Зинасып къыхьи кIэлэегъэджэ колледжым щеджагъэхэм сэри сащыщ. Ар къызысыухыгъэр мыгъэ илъэс 17 мэхъу, ау сигукъэкIыжьхэр кIуасэхэрэп. КIэлэегъэджэ дэгъу дэдэхэм илъэс 14 — 15 нахь тымыныбжьэу таIэкIафи, тапIугъ, тагъэсагъ, шIэныгъэу тагъэгъотыгъэр щыIэныгъэм къыщытшъхьэпагъ. Ахэм ацIэ къесIомэ сшIоигъу: сикураторы­гъэу ТIэшъу Фатим Анзор ыпхъур, Шэртэнэ Хана Нухьэ ыпхъур, Анзэрэкъо Светланэ Аскэрбый ыпхъур, Тхьабысымэ Фатимэ Умар ыпхъур, Шэуджэн Светланэ Мыхьамодэ ыпхъур. Мыхэм лъэшэу сафэраз, сыгу шIукIэ илъыщтых. ШIэныгъэу сагъэгъотыгъэр сищыIэныгъэ гъогу лъэшэу къыщысшъхьэпагъ.
Цэй Саида.