АР-м и ЛIышъхьэу КъумпIыл Мурат тыгъуасэ Тэхъутэмыкъое районым щыIагъ. социальнэ мэхьанэ зиIэ псэолъэ заулэмэ яшIын зэрэкIорэр ыуплъэкIугъ, промышленнэ паркэу «Инэм» псэолъэшIыныр зэрэщыкIорэр зэригъэлъэгъугъ.

Социальнэ
псэуалъэхэр
АР-м и ЛIышъхьэ къызэрэхигъэщыгъэмкIэ, Тэхъутэмыкъое районыр зызэхащагъэр илъэси 100 зэрэхъурэр Iоныгъом ха­гъэунэфыкIыщт ыкIи ащ ехъулIэу проект ин заулэ гъэцэкIагъэ хъущт: охътэ благъэхэм еджэпIакIэ, IэзэпIакIэ районым къитэджэщтых, псауныгъэр зыщагъэпытэн алъэкIыщт модульнэ комплексэу республикэмкIэ апэрэу щытыщтым ишIын ра­гъэжьагъ. УФ-м и Президентэу Владимир Путиным къыгъэуцугъэ пшъэрылъхэм ягъэцэкIэн те­гъэпсыхьагъэу, федеральнэ гупчэм иIэпыIэгъу хэлъэу а Iоф­тхьабзэхэр зэкIэ зэшIуахых.

Адыгеим и ЛIышъхьэ псэо­лъэшIыпIэхэм ащыIагъ, Iофэу ашIэрэм уасэ фишIыгъ. Мы илъэсым Iоныгъом къыщегъэ­жьагъэу къуаджэу АдыгеякIэмрэ псэупIэу Яблоновскэмрэ ащагъэпсыгъэ еджапIэхэм ачIэхьа­жьыщтых. Джыри зы еджапIэ мы илъэсым псэупIэу Ябло­новскэм щатIуп-
щыщт. НэмыкIэу къэпIон хъумэ, Тэхъутэмыкъое районым нэбгырэ 3550-рэ зы­чIэфэщт еджэпIакIэхэр иIэ хъу­щтых.
Муниципальнэ образованиеу «Тэхъутэмыкъое районым» ипа­щэу Шъао Аскэр IофшIэнхэр зэрэкIохэрэм фэгъэхьыгъэу ЛIы­шъхьэм къыфиIотагъ. Шэп­хъэшIухэм адиштэрэ псэолъапхъэхэр агъэфедэхэзэ джырэ лъэхъаным ипроектхэм атетэу еджэпIакIэхэр зэкIэ ашIыгъэх. ЕджапIэм гъэсэныгъэ Iофыр икъоу щызэхэщэгъэным пае ищыкIагъэр зэкIэ къыдалъытагъ. Актовэ залыр, спортым зыщыпылъыщтхэ ыкIи тренажернэ залхэр, шхапIэр, медицинэ Iоф­тхьабзэхэр зыщызэшIуахыщтхэ унэр ыкIи нэмыкIхэр хэтых. АР-м и ЛIышъхьэ пшъэрылъ афишIыгъ ящыкIэгъэ Iэмэ-псы­мэхэмкIэ еджапIэхэр зэтыра­гъэпсыхьанхэу, ащ къыпэIулъ чIыпIэхэм чъыгхэр, къэгъагъэ­хэр ащагъэтIысхьанхэу ыкIи нахь теплъэ дахэ яIэу ашIынхэу.

ХэушъхьафыкIыгъэу зытегущыIагъэхэм ащыщых еджапIэм Iоф щызышIэщтхэм ягъэхьазырын. АР-м и ЛIышъхьэ игъоу афилъэгъугъ гъэсэныгъэ зыщарагъэгъотырэ организациехэм яIофшIэнкIэ апшъэрэ еджапIэхэм, республикэ естественнэ-хьисап еджапIэм, «Полярис — Адыгея» зыфиIорэм икъутамэхэм зэдэлэжьэныгъэ адыряIэнэу, республикэм гъэсэныгъэмкIэ иинфраструктурэ иамалхэр зэкIэ зэрищыкIагъэм тетэу агъэфедэнхэу, сэнаущыгъэ зыхэлъ кIэлэцIыкIухэр къыхэ­гъэщыгъэнхэм ыкIи ахэм IэпыIэгъу ятыгъэным атегъэпсыхьэгъэ Iофтхьабзэхэр зэшIуахынхэу.
«Къэралыгъо программэхэр амал зэриIэкIэ нахь шIогъэ ин хэлъэу гъэфедэгъэнхэм, федеральнэ пащэхэм къытатырэ Iэ­пыIэгъур нахь икъоу зищы­кIагъэхэм анэдгъэсыным, гъэ­сэ­ны­гъэм иинфраструктурэ дгъэ­кIэжьыным, кIэлэцIыкIухэм яегъэджэнкIэ амал дэгъухэр щыIэнхэм, шIэныгъэ куу яIэу пIуныгъэ тэрэз зэрагъэгъотыгъэ цIыфхэу ахэр хъунхэм ыуж тит. УФ-м и Президентэу Владимир Путиным къыгъэуцугъэ пшъэ­рылъ анахь шъхьаIэхэм ар зы­кIэ ащыщ», — къыхигъэщыгъ КъумпIыл Мурат.

Джащ фэдэу анахь мэхьанэшхо зиIэ ыкIи зигъо Iофыгъохэм ащыщ а чIыпIэм щыпсэухэрэм ащыщыбэм зыкъызэрэфагъэзагъэр: спорт инфраструктурэм хэхъоныгъэ егъэшIыгъэныр. Мы илъэсым ыкIэхэм адэжь псэу­пIэу Яблоновскэм республикэмкIэ апэрэу модульнэ физкультурэ комплекс щагъэпсынэу рахъухьагъ, ащ нэмыкIэу стадионым псауныгъэм икъэухъу­мэн фытегъэпсыхьэгъэщт гупчэшхо щашIыщт. Федеральнэ программэу «Спортыр —щыIэныгъэм ишапхъ» зыфиIо­рэм, лъэпкъ проектэу «Демографием» ипроектэу «Бизнес-спринтым» атегъэпсыхьа­гъэу ахэр ашIыщтых. НепэкIэ спорт еджапIэу N 3-м тегъэкIагъэр нахь макIэ хъунымкIэ кIэу ашIыщт спорт псэолъитIумэ яшIогъэшхо къэкIощт. Зыщагъэ­сэным имызакъоу, зэнэкъокъу зэфэшъхьафхэр щызэхащэнхэмкIи ахэр къызфагъэфедэщтых.
Районым ипащэхэм ыкIи под­ряднэ организациехэм гущы­Iэгъу зафэхъум, республикэм и ЛIышъхьэ къыхигъэщыгъ районым ипсэупIэхэм гуIэтыпIэ чIы­пIэхэр ащызэхэщэгъэнхэм епхыгъэ IофшIэныр лъыгъэкIотэгъэным мэхьанэшхо зэриIэр. Мыщ дэжьым цIыфхэм яеплъы­кIэ къыпкъырыкIынхэ ыкIи зэгъусэхэу зигъо Iофыгъохэр зэ­шIуахынхэ фае.

«Тэхъутэмыкъое рай­оным щыпсэухэрэм япчъагъэ хэхъо зэ­пыт, арышъ, социаль­нэ, инженер ин­фра­­структурэм зедгъэу­шъомбгъун фае. А лъэныкъомкIэ Iоф­шIэнышхохэр мы аужырэ лъэхъаным зэшIотэхых. ЕджапIэхэр ыкIи IэзапIэхэр тэшIых, физическэ культурэмрэ спор­тымрэ япхыгъэ гуп­ча-
кIэхэр къызэIутэхых, гъогухэр тэгъэцэкIэ­-жьых. ЦIыфхэм ящы­IакIэ нахьышIу хъуным пае учреж­де­ниехэм яIофшIэн уахътэм диштэу щы­тыным тынаIэ тедгъэ­тыщт», — къыIуагъ АР-м и ЛIышъхьэ.
Республикэм
иэкономикэкIэ мэхьанэшхо яI
АР-м и ЛIышъхьэу КъумпIыл Мурат промышленнэ паркэу «Инэм» зыфиIорэр зыщагъэ­псырэ чIыпIэм щыIагъ. Ащ игъусагъэх министрэхэм я Кабинет и Тхьаматэу КIэрэщэ Анзаур, муниципальнэ образованиеу «Тэхъутэмыкъое районым» ипащэу Шъэо Аскэр, АР-м икъэралыгъо бюджет учреждениеу «Стройзаказчикым» ипащэ ипшъэрылъхэр зыгъэцэкIэрэ Хьаджымэ Аслъан.
Тэхъутэмыкъое районым, псэупIэу Инэм пэмычыжьэу, промышленнэ паркым пае чIыгу гектар 200 фэдиз къыщыхагъэкIыгъ. Нэужым паркым чIыпIэу ыубытырэм нахь зырагъэушъомбгъун алъэкIыщт. Мы лъэхъаным инфраструктурэу ящыкIэгъэщтым епхыгъэ Iоф­шIэнхэр зэшIуахых: гъогухэр ашIых, электричествэ рыкIуапIэхэр агъэпсых, укъэбзалъэ­хэр, административнэ унэхэр агъэуцух ыкIи нэмыкIхэр.

АР-м и ЛIышъхьэ гъогу картэм дэмыхынхэу пшъэрылъ афишIыгъ. ПIэлъэ гъэнэфагъэ­хэм рахъухьэгъэ инфраструктурэр агъэпсынэу, мы Iофым къыхэлэжьэнэу щытхэм япхыгъэ IофшIэнри нахь агъэчанынэу афигъэпытагъ.
Промышленнэ паркым иапэрэ инвесторхэм ахэхьан ылъэ­кIыщт маркетплейсэу Ozon. Джащ фэ­дэу гофроупаковкэм икъыдэ­гъэкIынкIэ, трубэхэм, фитинг­хэм, медицинэ пкъыгъо зэфэшъхьафхэм, тэрэзэу цIыфхэр гъэшхэгъэнхэм пае ящыкIэ­гъэщт гъомылапхъэхэр ыкIи нэмыкIхэр къэзыгъэхьазырыщтхэ компаниехэри фаех «Инэмым» чIыпIэ щагъотынэу. ЗэрэгугъэхэрэмкIэ, хъызмэтыр зезыхьан зылъэ­кIыщт псэолъэ 50 фэдиз а чIы­пIэм итыщт, инвестициехэр сомэ миллиард 65-м шIокIыщтых. Ащ нэмыкIэу промышленнэ паркым амал къытыщт IофшIэпIэ чIыпIакIэу мини 10 фэдиз щыIэ хъунымкIэ. 2025-рэ илъэсым ар атIупщынэу мэгугъэх. Паркым иIофхэм ягъэзекIон фэгъэзэгъэ­щтыр Iахьзэхэлъ обществэу «Адыгэ Республикэм ихэхъо­ныгъэкIэ корпорациер» зыфи­Iорэр ары.

«Урысыем и Президентэу Владимир Путинымрэ хэгъэгум и Правительствэрэ яшIуагъэ ренэу къы-
тагъэкIы Адыгеим экономикэмкIэ ихэхъоныгъэхэр нахьыбэ хъунхэм пае. ТэркIэ анахь мэхьанэ зиIэ
лъэныкъохэм — зекIонымрэ промышленностымрэ хэхъоныгъэ ядгъэшIыщт, экономикэм нахь зы-
къыIэтынымкIи ахэр амалышIоу щытыщтых. Промышленнэ паркышхоу «Инэм» республикэм ипромышленность хэпшIыкIэу нахь зыкъыIэтынымкIэ гугъэпIакIэхэр етэпхых», — къыхи­гъэ­щыгъ АР-м и ЛIышъхьэ.
КъумпIыл Мурат Тэхъутэмыкъое районэу чанэу хэхъоныгъэ зышIырэм иинфраструктурэ нахь зэтегъэпсыхьэгъэнымкIэ Iофэу агъэцакIэрэм мэхьанэ­шхо зэриIэр къыхигъэщыгъ. Нафэу зэрэщытымкIэ, ащ щыпсэухэрэм япчъагъэ хэпшIыкIэу нахьыбэ мэхъу. Гъогухэм ягъэцэкIэжьын­кIэ ыкIи коммунальнэ хъытыу­хэр уахътэм диштэу шIыгъэнхэмкIэ республикэм ихэбзэ къулыкъу­хэм ащ дакIоу пшъэрылъыбэ зэшIуахы. ГущыIэм пае, илъэсэу икIыгъэм АдыгеякIэм укъэбза­лъэхэр щыгъэцэкIэжьыгъэнхэмкIэ Iофышхо щагъэцэкIагъ. АР-м и ЛIышъхьэ Iофэу зэшIуахыгъэ­хэм защигъэгъозагъ.

Шъэо Аскэр къызэриIуагъэмкIэ, укъэбзалъэхэр 2018-рэ илъэ­сым ашIыгъагъэх, ау цIыф­хэр зычIэсыщтхэ унэхэр нахьыбэу ашIыхэ зэрэхъугъэм, ахэм къяпхыгъэхэм зэрахахъорэм къахэкIэу псэуалъэхэми зэшIуа­хырэр нахьыбэ шIыгъэн фаеу хъугъэ. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Ресурсальянс- Групп» зыфиIорэм ежь имылъ­кукIэ инвестиционнэ программэм тегъэпсыхьагъэу гъэцэ­кIэжьын IофшIэнхэр зэшIуи­хы­гъэх. Ащ ишIуагъэкIэ чэщ-зымафэм псэуалъэхэм аукъэбзырэр кубическэ метрэ 13000-м нэсэу нахьыбэ хъугъэ.
«Тэхъутэмыкъое районым цIыфхэр зычIэ­сыщтхэ ыкIи социальнэ мэхьанэ зиIэ псэуалъэу щашIырэр илъэс къэс нахьыбэ мэхъу. Ахэр зэкIэ ящыкIэгъэ инфра­структурэмкIэ зэте­гъэпсыхьэгъэнхэ фае. Федеральнэ гупчэм къытитырэ IэпыIэгъум ишIуагъэкIэ а пшъэ­рылъхэр зэшIотэхых», — къыIуагъ КъумпIыл Мурат.
АР-м и ЛIышъхьэ Тэхъутэмы­къое районым зыщэIэм пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром трансгаз Краснодар» зыфиIорэм ипащэу Денис Васюковым зэIукIэгъу дыриIагъ. Республикэм гъэстыныпхъэ шхъуантIэр къызэрэIэкIахьэрэм ыкIи щынэгъончъэу ар цIыфхэм агъэфедэн алъэкIыным япхыгъэ Iофыгъохэм ахэр атегущыIагъэх.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.
Сурэтхэр: М. Гордышов.