Ошъогу десантыдзэхэм я Мафэ фэгъэ­хьы­гъэ мэфэкI зэхахьэ саугъэтэу «ДзэкIолIым ипсынэкIэчъ» зыфиIорэм тыгъуасэ щыкIуагъ.

Iофтхьабзэм хэлэжьагъэх Адыгэ Республикэм ихэбзэ къулыкъушIэхэр, дзэкIолIхэр, зэо зэфэшъхьафхэм яветеранхэр, общественнэ движениехэм ялIыкIохэр, ЮнАрмиер.
ЗэIукIэр къызэIуихыгъ ыкIи зэрищагъ Афганистан ыкIи нэмыкI чIыпIэхэм ащыкIогъэ заохэм яветеранхэм я Союз ипа­щэу Николай Николенкэм. Ошъогу десантыдзэхэр зызэ­хащагъэхэр илъэс 94-рэ зэрэ­хъугъэмкIэ къэзэрэугъоигъэхэм ар къафэгушIуагъ ыкIи ащ тарихъ гъогоу къыкIугъэр кIэкIэу къыIотагъ.
— Урысые десантникхэм ятарихъ 1920-рэ илъэсым къыщежьагъ нахь мышIэми, ­Ошъогу десантыдзэхэм я Мафэ ихэу­гъэунэфыкIын 1930-рэ илъэсым шышъхьэIум и 2-м агъэнэфагъ. Мы мафэм Московскэ дзэ шъо­лъырым, Дзэ Ошъогу КIуачIэхэм яегъэджэнхэм къадыхэ­лъытагъэу, Воронеж пэмычы­жьэу, дзэ пшъэрылъхэр зыгъэцакIэщтыгъэхэ нэбгырэ 12 хъущтыгъэ подразделениер парашютхэмкIэ къыщетIысэхы­гъагъэх. Сыд фэдэрэ лъэхъани, непэ къызнэсыгъэми зэолI гушхоныгъэу десантникхэм ахэ­лъыр лъагапIэм тетэу къэнэжьы, — хигъэунэфыкIыгъ ащ.
АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу, десантникэу Цэй Эдуард зэхахьэм хэлажьэхэрэм закъыфигъэзагъ.

— Адыгэ Республикэм и ЛIышъхьэу КъумпIыл Мурат, депутатхэм ацIэкIэ, сэ сшъхьэкIи Ошъогу десантыдзэхэр илъэс 94-рэ зэрэхъурэмкIэ сышъу­фэгушIо. Мы дзэхэр лIыгъэм, лIыхъужъныгъэм, Хэгъэгум фыряIэ шIулъэгъуныгъэм ыкIи гущыIэ пытэу фатыгъэм язе­хьакIох. Сыд фэдэрэ плъыр-­стыри мыхэр ыгузэгу итых, анахь зыщыкъиным хэтых ыкIи пыир анахь зыщыкIочIэшхоми текIоныгъэр яеу къыхэкIых, — къыIуагъ Цэй Эдуард.
Нэужым Мыекъопэ къэлэ администрацием ипащэу Геннадий Митрофановым ыцIэкIэ генерал-лейтенантэу Юрий Том­чак, АР-м иветеранхэм я Совет итхьаматэу Къоджэ Аслъан къэгущыIагъэх. Ошъогу десантыдзэхэр сыдигъокIи урысые армием ихэшыпыкIыгъэ дзэхэу зэрэщытхэр ахэм хагъэунэфыкIыгъ. ГущыIэ пытэхэу «Никто, кроме нас!» зыфиIохэрэм арыгъуазэхэзэ, анахь щынэгъо ыкIи къин зыхэлъ зэо пшъэрылъхэр щытхъу хэлъэу зэрагъэца­кIэхэрэр япсалъэ къыщыхагъэщыгъ. ЛIыхъужъныгъэр, лIыгъэр, зэо IэпэIэсэныгъэр «тамэ зыгот пехотэм» зэрянэша­нэхэр, ар Хэгъэгу зэошхом илъэхъан къы­щегъэжьагъэу непэ къызнэсыгъэм щыIэ зэпэуцужь зэфэ­шъхьафхэм къызэ­рэщагъэшъыпкъэжьырэр къэгущыIэгъэ пстэуми хагъэунэфыкIыгъ. ХэушъхьафыкIыгъэ дзэ операциеми ти­дзэкIолIхэм те­кIоныгъэр къызэрэщыдахыщтым яцыхьэ зэрэтелъыр зэхахьэм къыщаIуагъ.
Зэпэуцужь зэфэшъхьафхэм ахэкIодагъэхэм яшIэжь агъэ­лъапIэу зы такъикърэ афэшъыгъуагъэх. Къэгъагъ Iэрамхэр саугъэтым кIэралъхьагъэх.
Iэшъынэ Сусан.