OLIMPBET Суперлигэм — Урысыем ичемпионат мы илъэсыкIэ ешIэгъум хэлэжьэщт бзылъфыгъэ командэхэр Урысыем гандболымкIэ ифедерацие и Апшъэрэ Совет ыгъэнэфагъэх.

ЗэкIэмкIи зэнэкъокъум командэ 11 хэлэжьэщт, ахэм ащыщ «АГУ-Адыифыр».
ЗэхэщакIохэм къызэраIуагъэмкIэ, чемпионатым хэлэжьэщт командэхэр зыкIэ нахь макIэ хъугъэ. Финанс гумэкIыгъохэм къахэкIэу «Ставропольер» ще­шIэщтэп. Апшъэрэ лигэм текIоныгъэр къыщыдэзыхыгъэ «Уфа-Алисэр» Суперлигэм хэхьаным фэягъэп. Ащ къыхэкIыкIэ къэралыгъом изэнэкъокъу аужырэ чIыпIэр щызыубытыгъэ Ижевскэ икомандэу «Универ­ситетыр» Суперлигэм къыхэнэ­жьыгъ.
Урысыем изэнэкъокъу хэлэ­жьэщт командэхэр: ЦСКА (Моск­ва), «Ростов-Дон» (Ростов-на-­Дону), «Астраханочка» (Астрахань), «Черноморочка» (Новороссийск), «Кубань» (Краснодар), «Лада» (Тольятти), «Звезда» (Звенигород), «Динамо-­Синара» (Волгоград), «АГУ-­Адыиф» (Мыекъуапэ), «Луч» (Москва), «Университет» (Ижевск).

Регламентым къызэрэдилъы­тэрэмкIэ, зэнэкъокъур едзыгъуитIоу гощыгъэщт. Апэ командэхэр гъогогъу тIурытIо зэIукIэщтых. Ащ ыуж ахэр къэгъэлъэгъонэу яIэм елъытыгъэу агощыщтых. Купэу «А-м» хэхьащтых а 1 — 6-рэ чIыпIэхэр къыдэзыхыгъэхэр, купэу «Б-м» — я 7 — 11-рэ чIыпIэхэм щытхэр. Командэхэм очко пчъагъэу къахьыгъэр ятIонэрэ къекIо­кIыгъом къыхалъытэщтых.
ЕшIэгъухэр Iоныгъом и 6-м рагъэжьэщтых, мы мафэм «АГУ-Адыифыр» «Черноморочкэм» Мыекъуапэ щыIукIэщт, Краснодар щешIэщтых «Кубаньрэ» «Динамо-Синарэмрэ». Iоныгъом и 7-м «Звездар» — «Ростов-Доным», «Лучыр» — «Астраханочкэм» адешIэщтых. Къэралыгъом ичемпионэу ЦСКА-р «Университетым» IукIэщт.
Плей-оффым команди 8 ихьащт — купэу «А-м» щешIагъэхэр зэкIэ ыкIи купэу «Б-м» икомандэ анахь лъэшитIур.