Гъэмэфэ мэфэ фабэхэм тиIанэхэм атетынхэ, нахьыбэрэ тшхынхэ фэе гъомылапхъэхэм ащыщ хъырбыдзыр.

Хъырбыдз-нашэхэм яуахът, тыдэкIи ахэм ящапIэхэр къащызэIуахыгъэх.
Хъырбыдз лъэпкъ зэфэшъхьафэу щыIэр миным ехъу. Адыгэмэ ижъыкIэ къыщыублагъэу ар къагъэкIыщтыгъ, къое гъугъэ IэшIур игъусэу Iанэм тырагъэуцощтыгъ. Хъырбыдзым узибл пхищэу адыгэмэ алъытэщтыгъ.
Гъэмэфэ мэфэ жъоркъхэм псыфалIэр пщызыгъэгъупшэрэ хэтэрыкIи, пхъэшъхьэ-мышъхьи мыр апэ ит, пкъышъолым лъэшэу къышъхьапэ.
Хъырбыдзым инахьыбэр, процент 90-р, псы, шъоу­щыгъур – проценти 6 ныIэп. Мыщ калориеу хэлъыр макIэшъ, умыщынэу узыфаем фэдиз пшхын плъэ­кIыщт. Витаминэу В1-р, В2-р, С-р, РР-р, фолиевэ кислотар, каротиныр, нэмыкIэу пкъышъолымкIэ зишIуагъэ къакIоу хэлъыр къэлъытэгъуай. Джыри аскорбиновэ ыкIи никотиновэ кислотэхэр, мыбэу, хэлъхэу медицинэ шIэныгъэм къыхегъэщы. ПсыфалIэр зэрэпщигъэгъуп­шэрэм имызакъоу, пкъышъолыр къеукъэбзы.
Хъырбыдзхэм шапхъэхэм ашIокIэу нитратхэр ахэлъ­хэу бэрэ агъэунэфы. Ахэр бэу зыхэлъ гъомылапхъэм псауныгъэмкIэ лъэшэу иягъэ къэкIо. Ащ фэдэ хэтэрыкIхэр, пхъэшъхьэ-мышъхьэхэр цIыфым бэрэ ыгъэфедэхэмэ, гур, лъынтфэхэр, нервнэ системэр, иммунитетыр зэIегъахьэх, адэбз узи къахэкIын ылъэкIыщт.
ШIэныгъэлэжьхэм къызэрэхагъэщырэмкIэ, азот зыхэлъ чIыгъэшIухэр бащэу зэраратыхэрэр ары шапхъэхэм адимыштэнхэм ушъхьагъу шъхьаIэ фэхъурэр, ежь зыфэдэ лъэпкъми мэхьанэ иI.
Угъолъыжьыным ыпэкIэ сыхьат заулэ иIэу пшхымэ нахь тэрэз. ЦIыфым ижъэжъые псынкIэу Iоф регъашIэ.
Шъоум фэдэу хъырбыдзыр агъажъо, агъэшIоIу, ары пакIошъ, ыкIышъо варенье IэшIу хашIыкIы.
ЛIэшIэгъу зыныбжь хъырбыдзыр плъыжьэуи гъожьэуи мэхъу.
Хъырбыдзыр зышхырэм гухахъо хегъуатэ. Шы­шъхьэIум и 3-м хъырбыдзым и Мафэ Дунаим щыхагъэунэфыкIы.
Лъэпшъыкъо Фатим.

Сурэтыр авторым ий.