Бэдзэогъум и 27-м къалэу Керчь Урысые фестивалэу «Чудо лучи-2024» зыфиIорэр щыкIуагъ. Ащ зипсауныгъэ амалхэр зэщыкъогъэ кIэлэцIыкIухэу ыкIи ныбжь зиIэхэу Урысыем ичIыпIэ зэфэшъхьафхэм къарыкIыгъэхэр хэлэжьагъэх.

Фестивалым къекIолIагъэхэр чIыпIэ зэфэшъхьафэу къыздикIыгъэхэр умыгъэ­шIэгъон плъэкIырэп: Белгородскэ, Кемеровскэ, Мурманскэ, Московскэ, Новосибирскэ, Свердловскэ хэкухэр, Пермь, Краснодар, Ставрополь, Красноярскэ крайхэр, республикэхэу Адыгеир, Башкортостан, Коми, Татарстан, нэмыкIхэри.
Фестивалым хэлэжьэнхэм фэшI пэIудзыгъэ шIыкIэм тетэу лъэIу тхылъи 196-рэ къатыгъ. Ухьазырыныгъэ дэгъу зиIэ нэбгырэ 57-рэ финалым ихьагъэр. Iофтхьабзэм социальнэ мэхьанэ куу иI: зипсауныгъэ амалхэр зэщыкъогъэ творческэ цIыфхэр къыхэгъэщыгъэнхэр ыкIи зыкъызэIуахынымкIэ IэпыIэгъу афэхъу­гъэныр, чанэу щыIэныгъэм къыхэгъэлэжьэгъэнхэр, лъэпкъ зэфэшъхьафхэм якультурнэ зэдэлэжьэныгъэ зегъэушъом­бгъугъэныр.
Iофтхьабзэм кIэщакIо фэхъугъэх творчествэмкIэ Урысые фестивалэу «ЛУЧ. Люди, умеющие чувствовать» зыфиIорэм изэхэщакIоу Вероника Зайцевар ыкIи сэкъатныгъэ зиIэ кIэлэцIыкIухэм янэ-ятэхэм я Къырым республикэ общественнэ организациеу «РОСТ» зыцIэм икерченскэ къутамэ ипащэу Наталья Николенкэр.
МэфэкI шIыкIэм тетэу къызэIуахыгъэ концертым хэлэжьагъэх муниципальнэ образованиеу «Къалэу Керчь» зыфиIорэм ипащэу Ольга Солодиловар, администрацием ипащэ игуадзэу Ирина Ивановар. Ахэм къеблэгъагъэхэм ыкIи хьакIэхэм шIуфэс къарахыгъ, фестивалым изэхэщэн чанэу хэлэжьагъэхэм тын лъапIэхэр аратыгъэх.
— Тэ, зэкIэми, зэрэдунэешхоу изы Iахьэу тыщыт. ЗэкIэми тызэфэшъхьаф, ау нэбгырэ пэпчъ зы гъэшIэгъон горэ мы щыIэныгъэм хелъхьэ – зыми фэмыдэ сэнаущыгъэр, гукъэкIхэр ыкIи гухэлъ чыжьэхэр. Непэрэ фестивалым чэфыгъор, нэIосакIэхэр къышъуфихьынхэм, шъуисэнаущыгъэ къыщызэIушъухыным иамал къызэрэшъуитыщтым сицыхьэ телъ, — къыIуагъ Ирина Ивановам.
КъэшъонымкIэ, орэдкъэIонымкIэ, театральнэ жанрэ зэфэшъхьафхэмкIэ, нэмыкIхэмкIи щызэнэкъокъугъэх. Джащ фэдэу культурэм и Унэу «Корабел» зыфиIорэм ифойе Iофтхьабзэм хэлэжьагъэхэм ятворческэ IофшIагъэхэм якъэ­гъэ­­лъэгъон къыщызэIуахыгъагъ.
Фестивалым Адыгэ Республикэр къы­щызыгъэлъэгъуагъэхэр хьафизэхэм я Урысые обществэ и Адыгэ республикэ къутамэ илIыкIохэр, орэдыIо студиеу «Сувенир» зыфиIорэм хэтхэу, зэрамылъэ­гъурэмкIэ сэкъатныгъэ зиIэхэ Владимир Хурс ыкIи Ирина Желябинар.
Владимир Хурс ежь ытхыгъэ орэдэу «Урысыер», Ирина Желябинам Е. Ваенга иорэдэу «Осыр» зыфиIорэр къыщаIуагъ. ТилIыкIохэр а I-рэ шъуашэ зиIэ дипломхэм ялауреат хъугъэх.
Алексей Хлоповыр.
Хьафизэхэм я Урысые обществэ ичIыпIэ организациеу Мыекъуапэ дэтым итхьамат.

Сурэтыр: хьафизэхэм я Урысые обществэ икъэлэ организацие.