КIэлэцIыкIу IыгъыпIэхэм ачIэсхэм гъогурыкIоным ишапхъэхэр джэгукIэ шъуашэм илъэу инспекторхэм арагъашIэх.

ГъогурыкIоным щынэгъончъэу хэлэжьэнхэм фэшI Кощхьэблэ районым икъэралыгъо автоинспекторхэм кIэлэцIыкIухэр яцIыкIугъом къыщегъэжьагъэу рагъаджэх.
Гъогум зэрыфэнхэ ылъэкIыщт чIыпIэ зэфэшъхьафхэр сурэтшIыгъэхэмкIэ къафаIуатэ. КIэлэцIыкIу IыгъыпIэм чIэсхэм а чIыпIэхэм къызэрарыкIыщтхэр джэгукIэ шъуашэм илъэу арагъэлъэгъугъ, яшIэныгъэхэр щыIэныгъэм зэрэщагъэфедэщтхэр агурагъэIуагъ.
Джащ фэдэу анаIэ зытырадзагъэхэм ащыщ самокатхэм ыкIи кушъхьэфачъэхэм атесхэу къачъыхьан зыщалъэкIыщтыр хэушъхьафыкIыгъэ чIыпIэхэм ыкIи ны-тыхэр алъыплъэхэу, зыухъумэхэрэ шъуашэхэр ащыгъхэ зыхъукIэ арэу зэрэщытыр. КIэлэцIыкIу пэпчъ гъогурыкIоным ишапхъэхэр зэригъэшIэнхэ къодыер армырэу, ахэр шIокI имыIэу зэригъэцэкIэнхэ фаер къафаIотагъ.