акси автомобиль псынкIэхэр зезыфэрэ водительхэр зыхэфэрэ гъогу хъугъэ-шIагъэхэр къэмыгъэхъугъэнхэм фэIорышIэрэ Iофтхьабзэ Адыгеим ишъолъыр бэдзэогъум и 22 — 31-м щыкIуагъ.

Iофтхьабзэр окIофэ гъогу хъугъэ-шIагъэхэр нахь макIэ хъунхэм нэмыкIэу, ащ фэдэ автомобиль лъэпкъ­хэм зэращэрэ цIыфхэм ыкIи пкъыгъохэм ящынэгъончъагъэ зыкъегъэIэтыгъэным анаIэ тырагъэтыгъ.
Ащ кIэщакIо фэхъугъэх Адыгеим и Къэралыгъо автоинспекцие, хэгъэгу кIоцI IофхэмкIэ Министерствэм кощын IофхэмкIэ и ГъэIорышIапIэ, Мыекъуапэ иполицие экономикэ щынэгъончъагъэмкIэ ыкIи ахъщэ къолъ­хьэ тын-Iыхыным пэшIуекIогъэнымкIэ иотдел, транспортымкIэ Министерствэм ыкIи Ространснадзорым яшъолъыр гъэIорышIапIэхэр.
Зы мафэм сыхьат заулэ уплъэкIугъом къыкIоцI укъоныгъэ 12 инспекторхэм къыха­гъэщыгъ. Ахэр: зэрэтаксир къэзыгъэнэфэрэ тамыгъэр тыригъэуцонэу фитыныгъэ зимыIэу – 4, адрэхэм янахьыбэм щынэгъончъэ бгырыпхыр агъэфедагъэп. Ащ имызакъоу, зэрэунэе предпринимательхэр е юридическэ лицэхэу зэрэщытхэр арамыгъэтхыгъэу, цIыфхэр зэрищэнхэмкIэ хэушъхьафыкIыгъэ фитыныгъэ, ОСАГО полисыр ямыIэхэу, путевой тхьапэхэр амыIыгъхэу, нэмыкIхэми япхыгъэу укъоныгъэ зырызхэри агъэунэфыгъэх.
Джащ фэдэу гъогурыкIоным ишапхъэхэр гъогогъу 30-рэ аукъуагъэу гъогу полицейскэхэм къыхагъэщыгъ.