ГъогурыкIоныр щынэгъончъэным епхыгъэ пэшIорыгъэшъ Iофтхьабзэхэр къыткIэхъухьэрэ лIэужхэм апае зэпымыоу, гъэмэфэ зыгъэпсэфыгъохэми, Адыгеим икъэралыгъо автоинспекторхэм зэхащэх. АныбжьыкIэ зэтефыгъэу кIэлэцIыкIухэр нахьыбэу ахэм къахарагъэубытэнхэм фэшI чIыпIэ зэфэшъхьафхэр къыхахых.

Ащ фэдэ зичэзыу Iофтхьабзэр Мыекъопэ районым ит поселкэу Удобнэм икъоджэ тхылъеджапIэ щырагъэкIокIыгъ.
ЗэIукIэгъур окIофэ хэбзэухъумакIохэм машинэхэр зэрыкIохэрэ гъогу Iахьым пэгъунэгъухэ зыхъукIэ (анахьэу къоджэ псэупIэ чIыпIэм) кIэлэцIыкIухэр зэрэзекIонхэ фэе шапхъэхэр икIэрыкIэу кIарагъэджыкIыжьыгъэх. Гъогум тетхэ зыхъукIэ тхьакIумэ Iулъхьэхэр ыкIи нэмыкI гаджетхэр амыгъэфедэнхэм анаIэ тырарагъэдзагъ.
Джащ фэдэу мэхьанэ зиIэ Iофыгъохэм ащыщэу зылъыIэсыгъэхэр кушъхьэфачъэр ыкIи СИМ-р шапхъэ­хэм атетэу гъэфедэгъэнхэр ары. Ащ фэдэ транспорт амалхэр машинэхэр зэрыкIохэрэ гъогум илъэс 14 мыхъугъэм щызэрифэнхэ зэрэфимытыр агу къагъэ­кIыжьыгъ. А транспорт лъэпкъхэм атесхэм зыухъумэхэрэ шъуашэр ыкIи нэфынэр къэзытырэ пкъыгъохэр агъэфедэнхэу зэрэщытыр араIуагъ.
Мотоциклэ лъэпкъхэр зыгъэIорышIэхэрэри ащыгъуп­шагъэхэп. Ахэр зыгъэIорышIэнхэ зылъэкIыщтыр зефэнымкIэ фитыныгъэ зиIэр ары.
Iофтхьабзэм икIэухым полицейскэхэм Iофыгъоу зытегущыIагъэхэр ныбжьыкIэхэм агу раубытэнхэм фэшI гъогурыкIоным ишапхъэхэр зэрытхэгъэхэ хэушъхьафыкIыгъэ тхьапэ хэутыгъэхэр аратыгъэх.