Адыгеим ыкIи Краснодар краим я Къэралыгъо автоинспекциехэр зэгъусэхэу пресс-зэIукIэ зэ­хащагъ.

Гъогу хъугъэ-шIагъэхэм яIофыгъохэм ыкIи гъогурыкIоныр щынэгъончъэу шъо­лъыритIум ащызэхэщэгъэным ар фэ­гъэхьыгъагъ.
Iофтхьабзэм къыщыгущыIагъэх Краснодар краим и Къэралыгъо автоинспекцие и ГъэIорышIапIэ ипащэ игуадзэ иIэнатIэ зыгъэцэкIэрэ полицием иполковникэу Сергей Примаковыр ыкIи Адыгеим и Къэралыгъо автоинспекцие и ГъэIорышIапIэ ипащэ игуадзэу, полицием иполковникэу Едыдж Мурат. Ахэм зэрэхагъэунэфыкIыгъэмкIэ, 2030-рэ илъэсым ехъулIэу гъогу хъугъэ-шIагъэхэм яхэкIуадэхэрэм япчъагъэ фэди 1,5-кIэ нахь макIэ шIыгъэн фаеу УФ-м и Президентэу Владимир Путиным унашъо къышIыгъ.
ЗэрэхагъэунэфыкIыгъэмкIэ, мы шъо­лъыритIум авариехэр бэу зыкIащыхъухэ­рэм ушъхьагъоу иIэр автомобилыбэ зэ­рэщызекIорэр ары. Сыда пIомэ ­Адыгэ Республикэм ыкIи Краснодар краим хы ШIуцIэ Iушъом ыкIи нэмыкI зыгъэпсэфы­пIэ чIыпIэхэм якIурэ федеральнэ гъогушхохэр апхырэкIых.
Полицием иполковникэу Сергей Примаковым къызэрэхигъэщыгъэмкIэ, шъо­лъырхэу зигъогухэм нэбгырабэ зыте­кIуа­дэхэрэм апэ итхэ хъугъэ. 2024-рэ илъэ­сым имэзих зэфэхьысыжьхэм къы­зэрагъэлъэгъуагъэмкIэ, Краснодар краим гъогу хъугъэ-шIэгъэ 2639-рэ ща­тхыгъ, ахэм нэбгырэ 330-рэ ахэкIодагъ, 3248-м шъобжхэр атещагъэх.
— ЦIыфхэр зыхэкIодэхэрэ авариехэм нахьыбэрэмкIэ ушъхьагъоу афэхъурэр псынкIэ зекIоныр ары. Джащ фэдэу имылъэныкъо гъогум техьэхэшъ, ыпэ къикIырэ автомобилым еутэкIых, ащ фэдэ гъогу хъугъэ-шIагъэхэм нэбгыри 185-рэ ахэкIодагъ. ЛъэсрыкIохэм ате­хьагъэхэуи хъугъэ-шIэгъабэ атхыгъ (нэбгырэ 68-мэ ядунай ахъожьыгъ). Гъогу-транспорт хъугъэ-шIагъэхэм нахьыбэу зыкъызаIэтыгъэу агъэунэфыгъэр мэзаер, гъэтхапэр ыкIи мэлылъфэгъур ары, — хигъэунэфыкIыгъ Сергей Примаковым.
ГущыIэр лъигъэкIотагъ полицием иполковникэу Едыдж Мурат:
— Мы илъэсым имэзих республикэм игъогухэм хъугъэ-шIэгъи 188-рэ къате­хъухьагъ, ахэм нэбгырэ 43-рэ ахэкIо­дагъ, 205-мэ шъобжхэр атещагъэх. Нэбгырэ пчъагъэу хэкIодагъэм зыкъызэ­риIэтыгъэм иушъхьагъур хъугъэ-шIэгъи­тфымэ нэбгы­рэ 16 зэрахэкIодагъэр ары. Федеральнэ мэхьанэ зиIэ гъогухэр ары нахьыбэр зытекIодагъэхэр ыкIи ямылъэ­ныкъо гъо­гум техьэхи, апэ къикIырэ машинэм еутэкIыгъэх. Ешъуагъэу автомобилыр зезыфэщтыгъэхэм ялажьэкIэ аварие 14 республикэм щыхъугъ, ахэм нэбгыри 5 ахэкIодагъ, 10-мэ шъобжхэр хахыгъэх.
ГъогурыкIоныр щынэгъончъэу зэхэщэ­гъэнымкIэ АР-м и Къэралыгъо автоинспекцие зэпымыоу зэрихьэрэ Iофтхьабзэхэм анэмыкIэу, амал тедзэхэр хагъэхьагъэх. Нахьыбэу хъугъэ-шIагъэхэр зытехъухьэрэ гъогу Iахьхэм ячIыпIи 6-мэ «шериф-балка» зыфиIорэ пкъыгъохэр (гъогу-патруль къулыкъум иавтомобиль тет къыпшIозгъэшIырэ пкъыгъоу плъыжь-­шхъуантIэкIэ къэнэфырэр) атырагъэу­цуагъэх. Джыри мы мэзи 6-м къыкIоцI ащ фэдэ пкъыгъо 18, макъэ къэзыгъэIурэ рыщагъэхэр чIыпIи 3-мэ, макъэ къэзыгъэIурэ пкъэухэр чIыпIи 8-мэ, сурэт ыкIи видео тезыхырэ камерэ 30 ащагъэуцунхэу агъэнэфагъ.
Республикэм и Къэралыгъо автоинспекцие ипащэ игуадзэ къыхигъэщыгъэ­хэм ащыщ гъогу хъугъэ-шIагъэхэр нахь макIэ шIыгъэнхэмкIэ шIуагъэ къэзытырэ Iофтхьабзэхэр зэрэзэрахьэхэрэр, ахэм ащыщ нахьыжъхэр къызхагъэлэжьэрэ зэхахьэхэу къоджэ псэупIэхэм ащызэха­щэхэрэр. Муниципальнэ образованиехэр яIэпыIэгъухэу ащ фэдэ зэхэхьэ 17 рагъэкIокIыгъ.
Iофтхьабзэм икIэух тапэкIэ анахьэу анаIэ зытырагъэтыщт лъэныкъохэр зэдагъэнэфагъэх. ГъогурыкIоным ишапхъэхэм афэгъэхьыгъэ хэбзэгъэуцугъэу щыIэхэр, ахэр шIокI имыIэу агъэцэкIэнхэу зэрэщытыр икъоу цIыфхэм алъагъэIэсынымкIэ къулыкъушIэхэм къэбар жъугъэм иамалхэм закъыфагъэзагъ.
Iэшъынэ Сусан.